Ore i mexü̃ ga Márcu ümatüxü̃ 2
2
Ngechuchu rü wüxi ga yatü ga nawãĩxãchicüca̱x nayataanexẽxẽ
(Mt. 9.1-8; Lc. 5.17-26)
1-2Rü yixcama ga ñuxre ga ngunexü̃wena rü wenaxarü Capernáü̃gu naxücu ga Ngechuchu. Rü yexguma duü̃xü̃gü nüxü̃ cuáchigagügu nax marü gumá ĩpata ga nawa nayexmanewa nayexmaxü̃, rü yexma nangutaque̱xegü ga muxü̃ma ga duü̃xü̃gü. Rü düxwa duü̃xü̃gümaxã nanapá ga naa̱xtü ga gumá ĩpata. Rü nüma ga Ngechuchu rü namaxã nüxü̃ nixu ga ore i mexü̃.
3Rü yéma nangugü ga ãgümücü ga yatügü, rü yéma Ngechuchuca̱x nanangetaü̃gü ga wüxi ga nawãĩxãchicü.
4Natürü namuxũchi ga duü̃xü̃gü, rü taxucürüwama Ngechuchuxü̃tawa nangugü. Rü yemaca̱x ínanapogüétü ga gumá ĩpata ga Ngechuchu íyexmaxü̃wa. Rü yéma norü caruxü̃gu ínanachü̱xüxüetaü̃gü ga gumá nawãĩxãchicü.
5Rü yexguma Ngechuchu nüxü̃ da̱u̱xgu nax aixcüma yaxõgüãxü̃ ga yema duü̃xü̃gü ga yéma nangetaü̃güxü̃, rü ñanagürü nüxü̃ ga gumá nawãĩxãchicü: —Pa Chaunex, curü pecadugü rü marü cuxü̃́ nüxü̃ charüngüma —ñanagürü.
6-7Natürü ñuxre ga ngúexẽẽruü̃gü ga Moichéarü mugüwa ngu̱xẽẽtaegüxü̃ rü yéma narütogü. Rü naãxẽwa ñaxü̃gu narüxĩnüe: —¿Ñuxãcü tama namuü̃ nax ngẽmaãcü yadexaxü̃? Rü Tupanape̱xewa rü wüxi i taxü̃ i chixexü̃ nixĩ i ngẽma nüxü̃ yaxuxü̃. Erü Tupanaxicatama nixĩ ya duü̃xü̃güarü pecaduxü̃ irüngümacü —ñaxü̃gu narüxĩnüe.
8Natürü yexgumatama ga Ngechuchu rü nüxü̃ nicua̱xãchi ga yema nagu naxĩnüexü̃. Rü yemaca̱x nüxna naca rü ñanagürü nüxü̃: —¿Tü̱xcüü̃ ngẽmagu perüxĩnüe i pemax?
9¿Ta̱xacü nixĩ i rütauchamaexü̃ nax namaxã nüxü̃ ixuxü̃ ya daa nawãĩxãchicü: “Curü pecadugü rü marü cuxü̃́ nüxü̃ charüngüma”, rü ẽ̱xna: “¡Inachi, rü nayaxu i curü caruxü̃, rü íixũ!” ñaxü̃?
10-11Natürü ñu̱xma rü tá pexü̃ nüxü̃ chadauxẽxẽ nax Tupana Nane ya duü̃xü̃xü̃ ixĩcü, rü nüxü̃́ nangẽxma i pora nax duü̃xü̃güaxü̃́ nüxü̃ iyanangümaxü̃ i norü pecadugü —ñanagürü. Rü ñu̱xũchi gumá nawãĩxãchicüxü̃ ñanagürü: —Cumaxã nüxü̃ chixu rü ¡inachi, rü nayaxu i curü caruxü̃, rü cupatawa naxũ! —ñanagürü.
12Rü yexgumatama inachi ga gumá nawãĩxãchicü. Rü nanayaxu ga norü caruxü̃, rü ínaxũxũ nape̱xewa ga guxü̃ma ga yema duü̃xü̃gü ga yéma yexmagüxü̃. Rü yemaca̱x ga yema duü̃xü̃gü rü naba̱i̱xãchiãẽgü, rü Tupanaxü̃ nicua̱xüü̃gü, rü ñanagürügü: —Taguma nüxü̃ tadau i ta̱xacü i ñaarüxü̃ ixĩxü̃ —ñanagürügü.
Lebíca̱x naca ga Ngechuchu
(Mt. 9.9-13; Lc. 5.27-32)
13Rü yemawena ga Ngechuchu rü wenaxarü naxtaxacutüwa naxũ. Rü muxü̃ma ga duü̃xü̃gü rü yéma naxca̱x naxĩ. Rü nüma rü nanangúexẽxẽ.
14Rü yexguma yéma naxüpetügu ga Ngechuchu, rü yéma nüxü̃ nadau ga Lebí ga Arupéu nane. Rü nüma ga Lebí rü yéma narüto nawa ga yema nachica ga duü̃xü̃güna diẽru ngĩxü̃ ínayaxuxü̃wa naxca̱x ga Rómacüã̱xarü ãẽ̱xgacü, yerü woetama yema nixĩ ga norü puracü. Rü Ngechuchu rü ñanagürü nüxü̃: —¡Chowe rüxũ! —ñanagürü. Rü inachi ga Lebí, rü nawe narüxũ.
15Rü yéma Lebípatawa nachibü ga Ngechuchu. Rü yéma nachibüe ga muxü̃ma ga duü̃xü̃gü ga Lebírüxü̃ Rómaarü ãẽ̱xgacüca̱x diẽru ngĩxü̃ yauxgüxü̃. Rü nayexmagü ta ga togü ga duü̃xü̃gü ga taxúema nacümamaxã taãẽgüxü̃ ga yéma mechawa rütogüxü̃ namaxã ga Ngechuchu rü norü ngúexü̃gü. Yerü namu ga yema nawe rüxĩxü̃.
16Rü yéma nayexmagü ta ga ñuxre ga Parichéugü rü ngúexẽẽruü̃gü ga Moichéarü mugüwa ngu̱xẽẽtaegüxü̃. Rü yexguma nüxü̃ nadaugügu ga yema togümaxã nax nachibüxü̃ ga Ngechuchu, rü norü ngúexü̃güna nacagü, rü ñanagürügü: —¿Ñuxãcü i perü ngúexẽẽruxü̃ rü namaxã nachibü i ngẽma duü̃xü̃gü i Rómaarü ãẽ̱xgacüca̱x diẽru ngĩxü̃ yauxgüxü̃ rü ngẽma duü̃xü̃gü i pecaduã̱xgüxü̃? —ñanagürügü.
17Rü yexguma yemaxü̃ naxĩnügu ga Ngechuchu rü ñanagürü nüxü̃: —Ngẽma tama ida̱xaweexü̃ rü tama nanaxwa̱xe ya dutúru, natürü ngẽma ida̱xaweexü̃ nixĩ i naxwa̱xegüxü̃ ya dutúru. Choma rü tama ngẽma mexü̃güca̱x núma chaxũ, natürü núma chaxũ nax nüxna chaxuxü̃ca̱x i ngẽma pecaduã̱xgüxü̃ —ñanagürü.
Ngechuchuna aurechigaca̱x nacagüe
(Mt. 9.14-17; Lc. 5.33-39)
18Rü wüxi ga ngunexü̃gu rü Cuáü̃ ga baiü̃xẽẽruü̃arü ngúexü̃gü rü Parichéugüarü ngúexü̃gü rü tama nachibüe yerü Tupanaca̱x naxauree. Rü ñuxre ga duü̃xü̃gü, rü Ngechuchuxü̃tawa naxĩ rü nüxna nayacagüe, rü ñanagürügü: —Ngẽma Cuáü̃arü ngúexü̃gü rü Parichéugüarü ngúexü̃gü rü naxauree. ¿Rü tü̱xcüü̃ i curü ngúexü̃gü i tama naxaureexü̃? —ñanagürügü.
19Rü Ngechuchu nanangãxü̃ rü ñanagürü nüxü̃: —¿Ẽ̱xna wüxi i ngĩgüarü petawa rü pexca̱x namexü̃ nax naxaureexü̃ i ngẽma nüxna naxugüxü̃ ega natanüwa nangẽxmagu i ngẽma yatü i ngexwaca ãmaxü̃? Pemaxã nüxü̃ chixu rü ngẽxguma natanüwa nangẽxmayane i ngẽma yatü i ngexwaca ãmaxü̃ rü taxucürüwama naxauree i ngẽma nüxna naxugüxü̃.
20Natürü wüxi i ngunexü̃ rü ngẽma yatü i ngexwaca ãmaxü̃ rü namücügüna tá nayagagü. Rü ngẽma ngunexü̃gu tá nixĩ i naxaureexü̃.
21Rü taxúema tanapaita i wüxi i naxchiru i ngauxü̃ namaxã i wüxi i naxchirutüchi i ngexwaca̱xü̃xü̃ i tauta nañaãchimüxü̃. Erü ngẽxguma nayaxugu i ngẽma naxchiru rü tá nügü ínanañaãchi i ngẽma naxchirutüchi i ngexwaca̱xü̃xü̃, rü tá yexera nanagáuxẽxẽ i ngẽma ngauxü̃ i naxchiru.
22Rü ngẽxgumarüxü̃ ta taxúema ngexwacaxü̃cü ya bínu rü wüxi i marü ngauxü̃ i naxchixü̃ i naxcha̱xmünaxca̱xgu tayabacuchi. Erü ngẽxguma ngẽmaãcü naxü̱xgu rü yimá bínu ya ngexwacaxü̃cü rü narüngu, rü tá nayawã̱ĩ̱xẽxẽ i ngẽma naxchixü̃ i ngauxü̃ i naxcha̱xmünaxca̱x. Rü ngẽxma tá inayarüxo ya bínu rü naxchixü̃ rü ta. Rü ngẽmaca̱x tanaxwa̱xe ya ngexwacaxü̃cü ya bínu rü ngexwaca̱xü̃xü̃ i naxchiü̃gu tayabacuchi —ñanagürü ga Ngechuchu.
Ngechuchuarü ngúexü̃gü rü trigu nicauetanü ga ngü̃xchigaarü ngunexü̃gu
(Mt. 12.1-8; Lc. 6.1-5)
23Wüxi ga ngü̃xchigaarü ngunexü̃gu rü Ngechuchu rü norü ngúexü̃gümaxã trigunecüwa nachopetü. Rü nümagü ga norü ngúexü̃gü rü inaxĩãcüma inanaxügüe ga trigu nax yacãũetanüxü̃.
24Rü yema Parichéugü rü Ngechuchuna nacagü rü ñanagürügü: —Dücax ¿tü̱xcüü̃ i curü ngúexü̃gü rü nanaxügü i ngẽma ngü̃xchigaarü ngunexü̃gu chu̱xuxü̃ nax naxüxü̃? —ñanagürügü.
25Natürü nüma ga Ngechuchu rü ñanagürü nüxü̃: —¿Taguma ẽ̱xna poperawa nüxü̃ pedau ga ta̱xacü nax naxüxü̃ ga ãẽ̱xgacü ga Dabí rü natanüxü̃ ga yexguma õna nüxü̃́ taxu̱xgu rü nataiyaegu?
26Rü yexguma chacherdótegüarü ãẽ̱xgacü yixĩxgu ga Abiatáru, rü Dabí rü Tupanapatagu naxücu. Rü nanangõ̱x ga yema paũ ga üünexü̃ ga chacherdótegüca̱xicatama ixĩxü̃. Rü nüma ga Dabí rü natanüxü̃maxã rü ta nangau ga yema paũ —ñanagürü.
27Rü ñanagürü ta ga Ngechuchu: —Ngẽma ngü̃xchigaarü ngunexü̃ rü duü̃xü̃güca̱x nixĩ ga naxüxü̃. Rü tama ngü̃xchigaarü ngunexü̃ca̱x nixĩ ga naxüxü̃ ga duü̃xü̃gü.
28Rü ngẽmaca̱x ya Tupana Nane ya duü̃xü̃xü̃ ixĩcü rü woo ngü̃xchigaarü ngunexü̃ rü namaxã inacua̱x —ñanagürü.
Currently Selected:
Ore i mexü̃ ga Márcu ümatüxü̃ 2: tcaP
Highlight
Share
Copy
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.