Ore i mexü̃ ga Márcu ümatüxü̃ 1
1
Cuáü̃ ga báiü̃xẽẽruxü̃ nüxü̃ nixu ga Tupanaarü ore ga chianexü̃ ga taxúema íxãpataxü̃wa
(Mt. 3.1-12; Lc. 3.1-9, 15-17; Jn. 1.19-28)
1Ñaa nixĩ i norü ügü i ore i mexü̃ ya Ngechuchu ya Cristu ya Tupana Nanechiga.
2Rü nũxcümaü̃cü ga Tupanaarü orearü uruxü̃ ga Ichaía ümatüxü̃ ga Tupanaarü ore, rü ñanagürü:
“Cupe̱xegu chayamu i chorü orearü ngeruxü̃ nax namexẽxẽãxü̃ca̱x i cumaü̃.
3Rü dauxchitawa i taxúema íxãpataxü̃wa rü tá nangẽxma i wüxi i duü̃xü̃ i ngéma tagaãcü ñaxü̃:
‘¡Corica̱x penamexẽxẽ i nama! ¡Naxcax peyanawe̱xãchixẽxẽ i nama!’ ”
ñaxü̃.
4Rü Cuáü̃ rü chianexü̃wa ga taxúema íxãpataxü̃wa nango̱x rü yéma ínanabaiü̃xẽxẽ ga duü̃xü̃gü. Rü namaxã nüxü̃ nixu nax Tupanaca̱x nawoeguxü̃ rü ínabaiü̃xü̃ nax Tupana nüxü̃́ nüxü̃ narüngü̃maxü̃ca̱x ga norü pecadugü.
5Rü guxü̃ma ga duü̃xü̃gü ga Yudéaanecüã̱x rü Yerucharéü̃cüã̱x rü yéma Cuáü̃xü̃tawa naxĩĩxü̃ nax iyanaxĩnüẽxü̃ca̱x. Rü nüxü̃ nixugüe ga norü pecadugü, rü nüma ga Cuáü̃ rü natü ga Yudáü̃wa ínanabaiü̃xẽxẽ.
6Rü naxchiru ga Cuáü̃ rü caméyuta̱xanaxca̱x nixĩ, rü norü goyexü̃ rü naxcha̱xmüü̃naxca̱x nixĩ. Rü beruremaxã rü munümaxã naxãwemü.
7Rü Cuáü̃ rü yema nüxü̃ yaxuxü̃ ga orewa, rü ñanagürü: —Choweama tá ínangu ya wüxi ya poraãcü choxü̃ rüyexeracü. Rü choma rü taxuwama chame rü bai nax ichayarümaxãchixü̃ nax íchayawẽxü̃ca̱x i norü chapatucunügü.
8Choma rü dexáwamare pexü̃ íchabaiü̃xẽxẽ, natürü nüma rü tá Tupanaãxẽ ya Üünecü pexna nanguxẽxẽ —ñanagürü ga Cuáü̃.
Ngechuchuarü baiechiga
(Mt. 3.13-17; Lc. 3.21-22)
9Rü yema ngunexü̃gügu, rü Ngechuchu rü ínaxũxũ nawa ga guma ĩane ga Nacharétu ga Gariréaanewa yexmane. Rü Cuáü̃ rü natü ga Yudáü̃wa ínanabaiexẽxẽ.
10Rü yexguma dexáwa ínaxü̃ãchigu, rü Ngechuchu nüxü̃ nadau nax yangenaxü̃ ga daxũwa. Rü yema Tupanaãxẽ ya Üünecü rü wüxi ga muxtucurüxü̃ inanago, rü Ngechuchuna nangu.
11Rü daxũwa inanaxũ ga wüxi ga naga ga ñaxü̃: —Cuma nixĩ i Chaune i cuxü̃ changechaü̃xü̃chixü̃ rü cumaxã chataãẽxü̃ —ñaxü̃.
Ngechuchuxü̃ naxü ga Chataná
(Mt. 4.1-11; Lc. 4.1-13)
12Rü yemawena rü Tupanaãxẽ ya Üünecü rü chianexü̃wa ga ngextá taxúema íxãpataxü̃wa Ngechuchuxü̃ naga.
13Rü yéma nayexma ga 40 ga ngunexü̃. Rü naeü̃gü ga idüraexü̃ íyexmagüxü̃wa nayexma, rü ngo̱xo ga Chataná rü nüxü̃ naxü. Natürü Tupanaarü orearü ngeruü̃gü ga daxũcüã̱x rü Ngechuchuxü̃ narüngü̃xẽẽgü.
Ngechuchu rü Gariréaanewa inanaxügü ga norü puracü
(Mt. 4.12-17; Lc. 4.14-15)
14Rü nawena nax Cuáü̃xü̃ napoxcugüxü̃, rü Gariréaanewa naxũ ga Ngechuchu nax yéma nüxü̃ yanaxuxü̃ca̱x ga Tupanaarü ore i mexü̃.
15Rü ñanagürü: —Marü nawa nangu i ngunexü̃ ga Tupana nagu unetaxü̃. Rü marü pexna nangaicama nax perü ãẽ̱xgacü yixĩxü̃. ¡Rü nüxü̃ perüxoe i pecüma i chixexü̃ rü peyaxõgü i norü ore i mexü̃! —ñanagürü.
Ngechuchu rü ãgümücü ga püchaetanüxü̃ca̱x naca
(Mt. 4.18-22; Lc. 5.1-11)
16Rü yexguma naxtaxa ga Gariréaanacügu yaxũxgu ga Ngechuchu, rü yéma nüxü̃ nadau ga Chimóü̃ rü naenexẽ ga André. Rü nümagü rü woetama püchaetanüxü̃ nixĩgü rü yéma naxtaxawa napüchaegü.
17Rü Ngechuchu rü ñanagürü nüxü̃: “¡Chowe perüxĩ rü tá pexü̃ charüngü̃xẽxẽxü̃ nax chauxü̃tawa penagagüxü̃ca̱x i duü̃xü̃gü!” ñanagürü.
18Rü yexgumatama ga yema taxre, rü yéma nanawogü ga norü püchagü. Rü Ngechuchuwe narüxĩ.
19Rü yéamaxü̃ra naxũ ga Ngechuchu, rü yéma nüxü̃ nadau ga Chantiágu rü naenexẽ ga Cuáü̃. Rü nümagü rü Chebedéu nanegü nixĩgü. Rü wüxi ga nguewa nayexmagü, rü yéma ínanangáitagü ga norü püchagü.
20Rü Ngechuchu rü naxca̱x naca. Rü nümagü rü yéma nguewa tüxü̃ nata̱xgü ga nanatü ga Chebedéu namaxã ga tümaarü puracütanüxü̃, rü Ngechuchuwe narüxĩ.
Wüxi ga yatü ga ngo̱xo nawa yexmaxü̃chiga
(Lc. 4.31-37)
21Rü ĩane ga Capernáü̃wa nangugü. Rü yexguma ngü̃xchigaarü ngunexü̃wa nanguxgu, rü Ngechuchu rü ngutaque̱xepataü̃wa naxũ rü inanaxügü ga nax nangúexẽẽtaexü̃.
22Rü duü̃xü̃gü rü naba̱i̱xãchiãẽgü namaxã ga norü ngu̱xẽẽtae, yerü aixcüma Tupanaarü poramaxã mea nanangúexẽxẽ rü tama ngúexẽẽruü̃gü ga Moichéarü mugüwa ngu̱xẽẽtaegüxü̃rüxü̃ nixĩ.
23-24Rü guma ĩanearü ngutaque̱xepataü̃wa nayexma ga wüxi ga yatü ga ngo̱xo nawa yexmaxü̃. Rü aita yéma naxü, rü ñanagürü: —¿Tü̱xcüü̃ totanüwa cuxũ, Pa Ngechuchu Pa Nacharétucüã̱x? ¿Nua cuxũ nax toxü̃ cuyada̱i̱xü̃ca̱x? Choma rü cuxü̃ chacua̱x nax Tupana Nane ya Üünecü quixĩxü̃ —ñanagürü.
25Rü Ngechuchu nananga ga yema ngo̱xo, rü ñanagürü: —¡Iyarüngea̱x rü ínaxũxũ nawa ya yimá yatü! —ñanagürü.
26Rü yexguma ga yema ngo̱xo rü gumá yatüxü̃ niyoyoxẽxẽ, rü tagaãcü aita naxüãcüma nawa ínaxũxũ.
27Rü guxü̃ma ga duü̃xü̃gü rü naba̱i̱xãchiãẽgü, rü nügüna nicachigü rü ñanagürügü: —¿Ta̱xacü nixĩ i ñaa? Maneca wüxi i ngexwaca̱xü̃xü̃ i ngu̱xẽẽtae nixĩ. Nüma rü aixcüma Tupanaarü poramaxã mea nangu̱xẽẽtae. Rü woo i ngo̱xogü rü naga naxĩnüe i ngẽxguma namuãgu —ñanagürügü.
28Rü yemaacü paxa guxü̃ma ga Gariréaanewa nangu ga Ngechuchuchiga.
Ngechuchu rü Chimóü̃ ga Pedru na̱xẽca̱x nayataanexẽxẽ
(Mt. 8.14-15; Lc. 4.38-39)
29Rü yexguma ngutaque̱xepataü̃wa ínaxũxũxgu ga Ngechuchu, rü Chantiágumaxã rü Cuáü̃maxã Chimóü̃ rü Andrépatawa naxũ.
30Rü Chimóü̃ na̱xẽ rü ngürücarewa iyexma, yerü iyaxaxüne. Rü Ngechuchumaxã ngĩxü̃ nixugüe.
31Rü ngĩxca̱x nixũ, rü ngĩxme̱xgu nayayauxãchi, rü ngĩxü̃ ínarüdaxẽxẽ. Rü yexgumatama iga̱u̱xãchi ga nax yaxaxünexü̃. Rü íirüda, rü inaxügü ga naxca̱x nax namexẽẽãxü̃ ga õna.
Ngechuchu rü muxü̃ma ga ida̱xaweexü̃ca̱x nayataanexẽxẽ
(Mt. 8.16-17; Lc. 4.40-41)
32Rü yexguma marü yanaxücu̱xgu ga üa̱xcü nax nachütaxü̃, rü Ngechuchuxü̃tawa nanagagü ga guxü̃ma ga duü̃xü̃gü ga ida̱xaweexü̃ rü yema ingo̱xoã̱xgüxü̃.
33Rü guxü̃ma ga yema ĩanecüã̱x rü yexma gumá ĩpataarü ĩã̱xgu naxca̱x nangutaque̱xegü.
34Rü nüma nanameexẽxẽ ga muxü̃ma ga duü̃xü̃gü ga naguxü̃raü̃xü̃ ga da̱xawemaxã ida̱xaweexü̃. Rü ínanawoxü̃ ga muxü̃ma ga ngo̱xogü, natürü nüxna nanachu̱xu nax yadexagüxü̃, yerü nümagü ga ngo̱xogü rü nüxü̃ nacua̱xgü nax texé yixĩxü̃ ga nümax.
Ngechuchu rü nüxü̃ nixuchigü ga ore ga ngutaque̱xepataü̃güwa
(Lc. 4.42-44)
35Rü ngunetüxü̃ ga tauta yangóonegu, rü inaxũãchi ga Ngechuchu. Rü ínaxũxũ ga ĩpatawa, rü wüxi ga nachica ga taxúema íxãpataxü̃wa naxũ nax yéma yayumüxẽxü̃ca̱x.
36Rü Chimóü̃ rü namücügümaxã Ngechuchuca̱x nayadaugü.
37Rü yexguma nüxü̃ iyangaugügu, rü ñanagürügü nüxü̃: —Guxü̃ma i duü̃xü̃gü rü cuxca̱x nadaugü —ñanagürügü.
38Natürü ga nüma rü nanangãxü̃ rü ñanagürü nüxü̃: —¡Ngĩxã rü tóxnamana taxĩ náigü ya ĩanexacügü ya ngaicamagünewa nax ngéma rü ta nüxü̃ chixuxü̃ca̱x i ore i mexü̃! Erü woetama ngẽmaca̱x núma chaxũ —ñanagürü.
39Rü yemaacü ga Ngechuchu rü guxü̃ma ga Gariréaanegu nixũãgüchigü. Rü wüxichigü ga ĩanearü ngutaque̱xepataü̃wa rü nüxü̃ nixuchigü ga ore ga mexü̃, rü ínayawoxü̃ẽtanü ga ngo̱xogü.
Ngechuchu rü wüxi ga rüchaxünexü̃ca̱x nayataanexẽxẽ
(Mt. 8.1-4; Lc. 5.12-16)
40Rü Ngechuchuca̱x nixũ ga wüxi ga yatü ga chaxünemaxã ida̱xawexü̃. Rü nape̱xegu nayacaxã́pü̱xü rü ñanagürü nüxü̃: —Pa Corix, ngẽxguma cunaxwa̱xegu nax choxü̃ curümexẽxẽxü̃, rü cuxü̃́ natauxcha nax cha̱u̱xca̱x cuyataanexẽxẽxü̃ —ñanagürü.
41Rü Ngechuchuaxü̃́ nangechaü̃tümüxü̃ ga gumá yatü. Rü nüxü̃ ningõgü rü ñanagürü nüxü̃: —Ngü̃, chanaxwa̱xe. Marü curüme —ñanagürü.
42Rü yexgumatama nüxü̃́ inayarüxo ga nax nachaxü̃nexü̃ ga gumá yatü. Rü meama naxca̱x nitaane.
43-44Rü Ngechuchu rü yexgumatama ínayamu. Rü meama nanaxucu̱xẽ rü ñanagürü nüxü̃: —¡Dücax, taxũtáma texémaxã nüxü̃ quixu! ¡Natürü ngéma chacherdótexü̃tawa naxũ, rü cugü nüxü̃ yadauxẽxẽ! ¡Rü curü mexẽẽca̱x nüxna yaxuaxü̃ i curü ãmare ga yema Moiché tüxü̃ muxü̃ nax nüxü̃ nacuáxü̃ca̱x nax curümexü̃ nawa i curü da̱xawe! —ñanagürü.
45Natürü nüma ga gumá yatü rü ínixũ rü inanaxügü nax guxãmaama nüxü̃ yaxuxü̃ ga yema nüxü̃ ngupetüxü̃. Rü yemaca̱x ga Ngechuchu rü marü taxucürüwa ngóxü̃wama duü̃xü̃güpe̱xewa ĩanegügu naxücu. Natürü chianexü̃gu i duü̃xü̃gü ítaxuxü̃gu narüxã̱ũ̱x. Rü woo chianexü̃gu nax naxã́ũxü̃ natürü yéma naxca̱x naxĩĩxü̃ãma ga duü̃xü̃gü ga guxü̃anewa ne ĩxü̃.
Currently Selected:
Ore i mexü̃ ga Márcu ümatüxü̃ 1: tcaP
Highlight
Share
Copy
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.