Nüxíraxü̃xü̃ ga popera ga Techarónicawa yexmagüxü̃ ga yaxõgüxü̃tanüwa namuxü̃ ga Pauru 5
5
1Natürü, Pa Chauenexẽgüx, rü ngẽma norü ngunexü̃ rü taunecü i tá nagu nangupetüxü̃ i ngẽma pemaxã nüxü̃ chixuxü̃, rü taxuca̱xma pexca̱x chanaxümatü i ngẽmachiga.
2Erü pematama mea nüxü̃ pecua̱x rü ngẽma ngunexü̃ i taxúema nagu ínangũ̱xuxẽẽxü̃gu tá nixĩ i ínanguxü̃ ya tórü Cori ya Ngechuchu. Rü ñoma wüxi i ngĩ́ta̱xaxü̃ i ngürüãchi chütacü ínguxü̃rüxü̃ tá nixĩ.
3Rü ngẽxguma duü̃xü̃gü nagu írüxĩnüegu nax guxü̃ma mexü̃ rü taxuxü̃ma nüxü̃ üpetüxü̃, rü ngẽma ngunexü̃gu rü ngürüãchi tá ínangu i taxü̃ i guxchaxü̃gü. Rü ñoma wüxi i ngecü i ãxacücü rü ngürüãchi ngĩxacümaxã ngu̱xnecacürüxü̃ tá nixĩ nax taxúema naxcha̱xwa iñaxü̃ i ngẽma.
4Natürü pemax, Pa Chauenexẽgüx, rü marü meama nüxü̃ pecua̱x i Cristuarü nguchiga. Rü ngẽmaca̱x taxuca̱xma ngürüãchi pexü̃ ínayabaixgü ya Cori ya Ngechuchu ñoma wüxi i ngĩ́ta̱xáxü̃ tüxü̃ íbaixgüxü̃rüxü̃.
5Erü guxãma i pema rü Tupanaarü duü̃xü̃gü pixĩgü, rü ngẽmaca̱x ngóonexü̃wa pengẽxmagü. Rü yixema rü tama ẽanexü̃wa tangexmagü rü tama tanaxü i ngẽma chixexü̃ i ẽanexü̃wa üxü̃.
6Rü ngẽmaca̱x tama name i taechita tamaxẽmare naxrüxü̃ i ngẽma duü̃xü̃gü i tama yaxõgüxü̃. Rü name nixĩ i taxããẽgü, rü mea taãxẽgu tarüxĩnüe.
7Erü ngẽma duü̃xü̃gü i naechitamare maxẽxü̃ rü ñoma duü̃xü̃gü i chütacü peexü̃rüxü̃ nixĩgü. Rü ngẽma duü̃xü̃gü i axegüxü̃ rü chütacü nixĩ i nügü nangãxẽxẽẽxü̃.
8Rü yixema nax ngóonexü̃wa ingẽxmagüxü̃, rü tanaxwa̱xe i guxü̃guma taxũãẽgü. Rü tanaxwa̱xe i tórü õmaxã rü tórü ngechaü̃maxã rü tórü maxü̃ i taguma gúxü̃ i ínanguxẽẽxü̃maxã yigü ítapoxü̃gü ñoma wüxi i churara rü norü poxü̃remüruxü̃maxã rü napate̱xemaxã nügü ípoxü̃xü̃rüxü̃.
9Erü Tupana rü tama tüxü̃ nade nax tüxü̃ napoxcuexü̃ca̱x, natürü tüxü̃ nade nax tórü Cori ya Ngechuchu ya Cristugagu nayauxgüxü̃ca̱x i maxü̃ i taguma gúxü̃.
10Rü Ngechuchu ya Cristu rü taxca̱x nayu nax wüxigu namaxã imaxẽxü̃ca̱x i daxũguxü̃ i naanewa. Rü woo marü iyueyane ínanguxgu rüẽ̱xna imaxẽyane ínanguxgu, rü wüxiwa tá namaxã tamaxẽ.
11Rü ngẽmaca̱x, Pa Chauenexẽgüx, rü name nixĩ i wüxichigü pegü petaãẽxẽẽgü rü pegü peporaexẽxẽ i perü õwa ngẽxgumarüxü̃ i ñu̱xma nax marü ípenaxügüxü̃.
Pauru rü nayaxucu̱xẽgü ga yema yaxõgüxü̃
12Pa Chauenexẽgüx, pexü̃ taca̱xaxü̃gü nax nüxü̃ pengechaü̃güxü̃ i ngẽma taenexẽgü i petanüwa puracüexü̃ rü pemaxã icua̱xgüxü̃ rü pexü̃ ngúexẽẽxü̃ i Cori ya Ngechuchuarü ore.
13Rü name nixĩ i namaxã petaãẽgü rü aixcüma nüxü̃ pengechaü̃gü i ngẽma taenexẽgü, erü nümagü nixĩ i pexü̃ nangü̃xẽẽgüxü̃. Rü name nixĩ i pegü pengechaü̃güãcüma pemaxẽ.
14Rü pemaxã nüxü̃ tixu ta nax penaxucu̱xẽgüxü̃ i ngẽma duü̃xü̃gü i oexü̃ i tama puracüechaü̃xü̃. ¡Rü nüxü̃́ penangúchaü̃xẽẽgü i ngẽma duü̃xü̃gü i marü nüxü̃ rüxoechaü̃xü̃ nax yaxõgüãxü̃! ¡Rü nüxü̃ perüngü̃xẽxẽgü i ngẽma duü̃xü̃gü i turaexü̃ i norü õwa! ¡Rü yáxna namaxã pexĩnüe i guxü̃ma i ngẽma taenexẽgü!
15Rü ngẽxguma texé chixexü̃ pemaxã ü̱xgu, rü tama name i chixexü̃maxã penataeguxẽxẽ. ¡Rü pora pexügü nax guxü̃guma mexü̃ pexügüxü̃ i pegütanüwa rü guxü̃ma i ngẽma togütanüwa rü ta!
16Rü name nixĩ i guxü̃guma petaãẽgü.
17¡Rü guxü̃guma peyumüxẽgü!
18¡Rü woo ta̱xacü pexü̃ ngupetügu, rü Tupanana moxẽ pexãgü! Erü ngẽma nixĩ ya Tupana naxwa̱xexü̃ nax penaxüxü̃ i pema ya Ngechuchu ya Cristuarü duü̃xü̃gü nax pixĩgüxü̃.
19Rü tama name i nüxü̃ pexoe i Tupanaãxẽ ya Üünecü.
20Rü ngẽxguma norü orearü uruü̃wa pemaxã yadexaxgu ya Tupana rü tama name i nüxü̃ pexoe.
21Natürü name nixĩ i meama penangugü i guxü̃ma i ore nax nüxü̃ pecuáxü̃ca̱x rü aixcüma yixĩxü̃ i ngẽma ore rüe̱xna tama. ¡Rü ngẽma ore i aixcüma mexü̃xicatama pixõgü!
22¡Rü nüxna pixĩgachi i naguxü̃raü̃xü̃ i chixexü̃gü!
23Rü chanaxwa̱xe i nümatama ya Tupana ya tüxü̃ taãẽxẽẽcü pexü̃ imexẽxẽ nax aixcüma nape̱xewa pimexü̃ca̱x. Rü chanaxwa̱xe i guxü̃wama pexna nadau i peãẽwa, rü perü ĩnüwa, rü pexenewa nax nataxuxü̃ca̱x i ta̱xacü i perü chixexü̃ i ngẽxguma wenaxarü núma naxũxgu ya tórü Cori ya Ngechuchu ya Cristu.
24Rü nüma ya Tupana ya pexü̃ decü rü tá nayanguxẽxẽ i guxü̃ma i ngẽma pemaxã nüxü̃ yaxuxü̃.
Pauru rü wenaxarü yema duü̃xü̃güxü̃ narümoxẽ rü naxca̱x ínaca nax Cori ya Ngechuchu ya Cristu nüxü̃ rüngü̃xẽẽxü̃ ga yema yaxõgüxü̃
25Pa Chauenexẽgüx, ¡Toxca̱x peyumüxẽgü!
26Rü chanaxwa̱xe i nüxü̃ pengechaü̃güãcüma nüxü̃ perümoxẽgü i guxü̃ma i taenexẽgü.
27Rü Cori ya Ngechuchuégagu pexü̃ chamu nax guxü̃ i taenexẽgüpe̱xewa nüxü̃ pedaumatüxü̃ i ñaa popera i pexca̱x ngéma chamuxü̃.
28Rü chanaxwa̱xe i tórü Cori ya Ngechuchu ya Cristu pexü̃ narüngü̃xẽxẽ i guxãma i pemax.
© 2022, Wycliffe Bible Translators, Inc. All rights reserved.