Nüxíraxü̃xü̃ ga popera ga Techarónicawa yexmagüxü̃ ga yaxõgüxü̃tanüwa namuxü̃ ga Pauru 4
4
Maxü̃ i Tupanaxü̃ taãẽxẽẽxü̃chiga
1Ñu̱xma Pa Chauenexẽgüx, rü tórü Cori ya Ngechuchuégagu pexü̃ taca̱xaxü̃ rü pexü̃ tamu nax yema pexü̃ tangúexẽẽxü̃rüxü̃ wüxichigü i ngunexü̃gu yexeraãcü Tupanaca̱x mea pemaxẽxü̃ nax ngẽmaãcü penataãẽxẽẽxü̃ca̱x ngẽma marü pexüxü̃rüxü̃.
2Pema rü marü nüxü̃ pecua̱x ga yema torü ucu̱xẽgü ga tórü Cori ya Ngechuchu toxü̃ muxü̃ nax pexü̃ tangúexẽẽxü̃ca̱x.
3Rü ngẽma Tupana naxwa̱xexü̃ nixĩ nax aixcüma namexü̃ i perü maxü̃ rü naxca̱xicatama nax pemaxẽxü̃. ¡Rü taxṹ i pexenearü ngúchaü̃ pexü rü nai i ngexü̃maxã pemaxẽ!
4Rü wüxichigü tanaxwa̱xe nax aixcüma tümama̱xü̃ tangechaü̃xü̃, rü ngĩmaxãxicatama nax tamaxü̃xü̃.
5Rü tama name i nagu pemaexü̃ i ngẽma naxü̃nearü ngúchaü̃gü i nagu namaxẽxü̃ i ngẽma duü̃xü̃gü i tama Tupanaxü̃ cua̱xgüxü̃.
6Rü tama name i texé tümaenexẽxü̃ tawomüxẽxẽ. Rü Tupana tá poraãcü tüxü̃ napoxcu ya guxãma ya yíxema ngẽmaãcü maxü̃́xe, yema marü pemaxã nüxü̃ tixuxü̃rüxü̃.
7Erü Tupana tüxü̃ nade nax mea imaxẽxü̃ca̱x rü tama chixexü̃ ixügüxü̃ca̱x.
8Rü ngẽmaca̱x ega texé tama naga ĩnügu i ñaa ngu̱xẽẽtaegü, rü tama wüxi i duü̃xü̃ga nixĩ i tama taxĩnüxü̃, natürü Tupanagatama nixĩ i tama taxĩnüxü̃. Rü gumá nixĩ ga pexna namucü ga Naãxẽ ya Üünexü̃.
9Rü ngẽma nax pegü pengechaü̃güxü̃chiga, rü taxuca̱xma pexca̱x chanaxümatü i poperawa. Yerü Tupanatama nixĩ ga marü pexü̃ ngúexẽẽcü nax pegü pengechaü̃güxü̃.
10Rü aixcüma nixĩ i nüxü̃ pengechaü̃güxü̃ i guxü̃ma i taenexẽgü i Machedóniaanewa ngẽxmagüxü̃. Natürü, Pa Toenexẽgüx, pexü̃ taca̱xaxü̃gü nax yexeraãcü nüxü̃ pengechaü̃güxü̃ca̱x.
11¡Rü pora pexü nax mea pemaxẽxü̃ca̱x rü wüxichigü tümame̱xẽmaxã tümaarü puracü taxügüxü̃ca̱x, yema marü pemaxã nüxü̃ tixuxü̃rüxü̃!
12Rü ngẽxguma ngẽmaãcü pepuracüegu, rü ngẽma duü̃xü̃gü i tama yaxõgüxü̃ rü tá pexü̃ nangechaü̃gü, rü taxúeme̱xẽwa tá pengẽxmagü.
Ñuxãcü tá nixĩ i ngẽxguma nataeguxgu ya tórü Cori
13Pa Chauenexẽgüx, tanaxwa̱xe nax nüxü̃ pecuáxü̃ i ta̱xacü tá namaxã naxüpetüxü̃ i ngẽma yuexü̃ nax tama pengechaü̃güxü̃ca̱x naxrüxü̃ i ngẽma togü i duü̃xü̃gü i taxuxü̃ma ínangu̱xuxẽẽgüxü̃ nax wena tá namaxẽxü̃ i ngẽma yuexü̃.
14Rü yixema nax yaxõgüxü̃ nax Ngechuchu nayuxü̃ rü wena namaxü̃xü̃, rü ngẽxgumarüxü̃ ta tayaxõgü nax Tupana tá wüxigu Ngechuchumaxã ínadagüxẽxẽxü̃ i guxü̃ma i ngẽma nüxü̃́ yaxõgüãcüma yuexü̃.
15Rü ngẽmaca̱x pemaxã nüxü̃ tixu ga yema ngu̱xẽẽtae ga tórü Cori namaxã ngu̱xẽẽtaexü̃. Rü ngẽxguma wena núma naxũxgu ya tórü Cori, rü yixema nax imaxẽxü̃ rü taxũtáma yixira ngẽma yuexü̃pe̱xegu taxĩ.
16Erü nümatama ya Cori rü daxũwa tá ínarüxĩ, rü tá nüxü̃ taxĩnüe i wüxi i naga i daxũwa inaxũxü̃ i tüxü̃ muxü̃, rü naga i Tupanaarü orearü ngeruxü̃güarü ãẽ̱xgacü. Rü tá nüxü̃ taxĩnüe nax yacuexü̃ ya Tupanaarü cornéta. Rü ngẽxguma i ngẽma yuexü̃ i Cristuaxü̃́ yaxõgüxü̃ rü tá nüxíra ínarüdagü.
17Rü ngẽmawena i yixema nax imaxẽxü̃ rü tá wüxigu caixanexü̃gu tüxü̃ nigagü namaxã i ngẽma duü̃xü̃gü i yuwa írüdagüxü̃. Rü ngẽmaãcü tá daxũgu tórü Corixü̃ tayangaugü nax guxü̃gutáma naxü̃tawa ingexmagüxü̃ca̱x.
18Rü ngẽmaca̱x chanaxwa̱xe i ñaa oremaxã pegü petaãẽxẽẽgü.
© 2022, Wycliffe Bible Translators, Inc. All rights reserved.