Abdías 1
1
Edom sau kau bukna
1Baisa di kaikalahwas kau yulni balna Abdías duna dai kidika, Papang kaupak.
Papang yulni as dakana mayang;
yul muryang as nisan balna yakat kiuna, diyulna atnin:
“¡Lapaknin! ¡War kalbauna mawang Edom nining yakat!”#Is 34:5-17; 63:1-6; Jr 49:7-22; Ez 25:12-14; 35:1-15; Am 1:11-12; Mal 1:2-5.
Papang yaklauwi Edom yakat kalyulwi:
2“Dibin mayamki, nisan balna bitik pasyakat,
dawak nuhni palni laih sau yakat buknaman karang.
3Man manah kapat kaldakaman kidika yaklauwi alas mayulna.
Kipala sahna walsah yakat yalahtaman,
dawak bik sakman mayakau,
kidika bahang kaldakaman
muih as bik kidika kaupak malakwas karang.
4Yakal-nuh kapat mayak ilyawama,
dawak uma kidika yala yakat yamma bik
kidika kaupak yamting kat bukma.”
Papang kaput yulwi:
5“Di malyang balna kidika pukta aiwi di mamalwarang laih,
bitik laih duwi uiwas karang ki;
wain minik balna kidika man yakat aiwarang kat,
wain minik kidika as as dadawang.
Kauna nawatwakat, man waihmala balna
laih madaukalpamna.
6¡Amput dima duduna yah, Esau!#1.6 Esau: Edom ayangni ūk kidika laih kaput dai.
¡Di minit nuhni balna dutaman balna dai kidika bitik mamalna!
7Aslah alahwanamana muihni balna bitik alas mayuyulna;
man sauma kaupak makangwi yayakna.
Man karak kaltalyang tanit yamni dai kidika
man namangkauh yaklalauna,
dawak malaihnin dini támapas yakat ahana.
¡Edom laih sinsni yudutni awas ki!”
8Papang aput yulwi:
“Yang Edom yakat wiski mani kat,
sins duyang muihni balna duwa sakkidika bitik dismukki,
dawak sinsni yudutni duwa kidika bik dakyakki,
dawak Esau asangnipas kau bangkidika balna bik.
9Temán ahalni war kalbauyang balna kidika diyukwarang,
dawak Esau asangnipas kau muih balna kidika
as bik sangnika duwas karang.
Edom dutni yamna balna
10“Asalni manah mamukwi lakna karang,
dawak madaukalpamwarang ban kaput atnin,
man wirahma Jacob#Jl 3:19. kau dutni kalyamta inaman kidika yulni.
11Waihla kidika yaklauwi tawan nuhni dini balna kidika yakwi duduwakat,
dawak kalbauyang muihni balna sau uk kaupak kidika
Jerusalén durni babahwakat,
¡man pirini yakat islawanaman dai!
Di dakyayakna balna kidika tanka walwi tatalna wais yakat bukwarang kidika,
dawak ritsni balna kidika duwi uina,
¡dawak witingna yayamwa kaput man bik yamna man!
12Man alasna dunam awasdai,
wirahma kidika dutni yakat sakkat,
Judá kidika dutni yakat kana kat
man tala alasna dunam awas dai,
dawak witingna kulninna kaida mani yakat
sarahni diyulnam awasdai.#Sal 137:7; Lm 4:21.
13Yang tawanki nuhni yakat awanam-awas dai,
dalani wauhwa mani yakat,
dawak dutni yakat sakkidika yulni bik alasna dunam awas dai
witing mani dutni dai yakat,
dawak dini minit nuhni balna kidika bik manam awas dai,
witing di dis dana mani yakat.
14Dutni balna amput barangni anin sip-awas dai
kiri yaklalawa balna yakat,
dawak bik kaidinin mani balna yakat
kalahwi kikira balna kidika laihta muih tingni yakat tuk-ánam awas dai.
15Uk balna yakat yamnaman kaput man yaakt bik yamna karang:
¡man mamat duma!
Israel kidika mayakat dulauna karang
“Papang mani kidka ulisdana
nisan balna bitik yakat.
16Ampus tapalhni dai sunitaka manna dinamana kidika,
yang asangki holi yakat,
kaput tapalhni karang sunitak kidika,
bahang nisan balna kidika ulupwi didina karang;
dawak pini didisna karang.
17Kauna Sayan asangni kidika laih ban karang pa as holi,
bahang muih as as kiri yaklalana karang kidika pani yakat.
Jacob sulani balna
saunina kidika watwi duduna karang;
18Jacob dawak José sulani balna kidika laih kuhpau karang,
dawak kuhpau dalhwi kilwa kapat karang,
dawak Esau muihni balna laih dibasta kusuni kapat karang,
bahang kidika kuhnipau yaklauwi bitik palni busna karang.
¡Esau muihni balna kidika as bik yaklawas karang!
Yang, Papangyang kat yultayang.”
19-20Néguev kau Israel balna kidika, Esau sauni kau asang balna yakat kawi panina duduwarang, dawak walang kau bangdai kidika balna laih filisteo balna saunina yakat kawi duduna karang. Kaput bik Efrain sauni kidika duduwarang, dawak Samaria sauni bik, dawak Benjamín muihni balna laih Galaad sauni kidika duduwarang. Israel muihni balna saunina kaupak di kangwi yayakna balna kidika Canaán muihni balna saunina yakat kawi duduna#1.19-20 Canaán muihni balna...duduna: kaput wirlana kidika yamni ki. Hibru kau laih amangladas ki. karang Sarepta kat, dawak Jerusalén muihni balna warau lani kau bangkidika Sefarad yakat, witingna Néguev tawanni nunuhni balna yakat kawi duduna karang. 21Kilwi uiwarang minit bayakna balna bahang Sayan asangni yakat, Esau asangni balna kau muihni balna yakat lanina yamna atnin, dawak Papang laih king kana karang.
Currently Selected:
Abdías 1: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998