Mark 2
2
Jisas, muih dutni dawak diswi dawaksininwah buhlana as kau yamni kalyamna
(Mt 9:1-8; Lk 5:17-26)
1Ma buas bayakwak usnit kat, Jisas watwi Capernaum yakat kiwi kana. Ū yakat sakki atwak dakakana kat, 2muih mahni kalududuhna, bahang dūr yakat sip kakawasdai; dawak witing disumalwādai. 3kaput laih, muih arungka kalahwi, muih sininwah buhlana as trukwi duwi uina witing yakat. 4Kaunah muih mahni bangdai bahang sip-awasdai Jisas kat uiwi laknin, bahang ū makaupak alahwi lalakna, krikri kau ihilna kaput ban, Jisas sakyakat. 5Jisas witingna kasak kukulwa kidika, bahang siknis muihni yakat kalyulna:
—Yang walakibis, man dutma balna kidika bitik dawak diswi.
6Lā maestro balna buas yakat bangdai kidika kukulna: 7“¿Amput dawak adika alni kaput yulwih? Yulni balna kidika laih Papang niningkauh dutni yulwi. Papang manah muih dutni dawak disnin sipki.” 8Kaunah usnit kat Jisas amanglana ais kukulwa kidika, bahang diyulwi dakana:
—¿Amput dawak manna kaput kultamanah? 9¿Angkauh isiyah, sininwah buhlana yakat kalyulnin: ‘Dutma balna dāwak disna kalatnin kidika’, kidika awas kat: ‘Lawa pama trukta yawah kalatnin kidika’? 10Lāih niningnakaki muih Walanibis al kidika laih parasni duwi muih dutni dawak disnin sau akat.
Kaput laih, sininwah buhlana yakat kalyulna:
11—Man yakat mayultayang, lawa, pama kidika duta mahka ūma kau yawah.
12Siknis muihni kidika yaklauna, dawak pāni kidika duwi mahka kalahwi kiuna, muih balna bitik talwabangkat. Kidika yulni, muih bitik yamni tatalna dawak Papang ayangni nuhni yamwi aput yuyulna:
—Wat as bik di as apāt taldaski.
Jisas Libai yakat kalyulna kiunin
(Mt 9:9-13; Lk 5:27-32)
13Usnit kat Jisas watwi lakun kungyakat kiuna; muih balna kidika witing yaihnit yakat uina dai, dawak disumalna dai. 14Kidika yakut bayakwi talna dai, Alpius walanibis Libai kidika yalahwi, tunan minit yakwasakkat, Roman dini. Dawak Jisas kalyulna:
—Uskit uitah.
Libai laih yaklauwi Jisas usnit uina.
15Jisas laih Libai ūni yakat di kaswasakkat, di tunan minit yakyang balna manas karak, bahang lalahni kidika laih Roman dini dai, dawak muih dudutni dikukulwa ūk balna bik tibil yakat yalahna bangdai, dawak Jisas disainipil balna bik, kaput bahang muih mahni dai, usnit uhuiwa kidika. 16Lā maestro balna buas, kidika balna laih parisi balna dai, bahang tatalwak Jisas karak di kaswabangdai, dawak disainipil yakat diyulwi dakakana:
—¿Amput man maestro dutaman kidika, di tunan minit yakyang balna dawak dutni muihni balna karak di kaswih?#2.16 Tingkau ulna balna buas kidika laih aput minitlalakwi: dawak didiwi.
17Jisas dakawi diyulna:
—Muihnina yamni balna kidika laih daktar nid awaski, kaunah siknis muihni balna manah laih. Yang holi muihni balna yakat walna aiwasyang, kaunah dutni yamyang balna kidika laih.
Yuh wauhnin yulni yulwi dakakana
(Mt 9:14-17; Lk 5:33-39)
18Ma as kat Jan usnit uiyang balna kidika, dawak fariseo balna karak kalpakwi yuh wauhwa bangdai, dawak muih balna as as Jisas yakat uiwi kalyulwi dakakana:
—Jan usnit uiyang balna, dawak fariseo balna bik yuh wawauhwi: ¿kaunah amput dawak disaimapil balna kidika laih yuh wawauhwasyah?
19Jisas yaklau nangnitnalana:
—¿Marid alasnina as kau yulwak uina balna kidika di kaswas yuh wauhnin sipkatpah, marid al kidika witingna karak sakkat? Marid al kidika witingna karak sakkat di kaswas atninna sip-awaski. 20Kaunah mani kiwi kawarangki, marid al kidika duwi kiuna karang; bahang kidika mani kiwi kawarang kat laih sip karangki yuh wauhnin.
21“Muih as bik asnina umani kidika asna wisam karak pislakwaski, kat asna wisam kidika murawak biswi asna umani kidika, dawak biswa kidika laih baisa nuhni biswi. 22Dawak wain wasni wisam kidika bik sip di utak uni bīna umani yakat utuhwaski, kat wain wasni wisam kidika laih di utak uni bīna umani balna yakat biswi, kaput laih wain dawak di unitak kidika bik laih didisna ki. Kidika bahang wain wasni wisam kidika laih di utak wisam kat utuhna atninki.”
Disaipil balna kidika laihyakurupdinin mani yakatplawar minik dadakwi
(Mt 12:1-8; Lk 6:1-5)
23Yakurupdinin mani#2.23 Yakurupdinin mani: kidika laih yulwi satadi. as kat, Jisas, di dadahna pasmunah lapakna, dawak disainipil balna plawar minik dadakna.#Dt 23:25. 24Fariseo balna yaklau kalyulwi dakakana:
—Dakah, ¿ampadawak disaimapil balna kidika, yakurupdinin mani yakat yamnin awas dini kidika yayamwih?
25Kaunah witing diyulna:
—¿Manna yulta talasmanah, ma as Devid ais yamna kidika, witing karak bangdai kidika muihni balna karak, yuh dilaihna kat? 26Abiatar kidika sumalyang nuhni dai, bahang Devid laih Papang ūni yakat kawi plawar busna Papang dini yakna kidika balna kasna dai, bahang kidika dini balna laih sumalyang balna manah kakaswādai,#Lv 24:9. dawak witing karak muih bangdai kidika balna yakat bik diawak kakasna.#1 Sam 21:1-6.
27Jisas baisa minitlakwi yulna:
—Yakurupdinin mani kidika laih muih al dini yamna, kaunah muih al kidika yakurupdininin mani dini awaski. 28Kidika bahang, muih Walanibis al kidika parasni duwi yakurupdinin mani niningyakat.
Currently Selected:
Mark 2: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998