Joel 3
3
1Papang yulwi:
“Kidika mani balna kiwi kawakat,
Judá dawak Jerusalén suerniti kidika satuk yamna awaki.
2Sau muihni balna kidika bitik uduhki dawak,
duyawaki Josafat#3.2 Hibru kau Josafat, tanka laih Papang yaklauwi lani yamna. sauni langni yakat,
dawakat lanina yamki,
yang tawanki Israel kau yayamna kidika yulni.
Kat Israel balna kidika witingna yayamwakat
pini ruhwi kiuna sau bitik yakat,
dawak sauki kidika sahyakwi duduna.
3Tawanki kidika sahyayakna, suerte ruhmwi,
muih ahal binina dawak yayal binina kidika wauhwi bakakanna,
dawak sirihni lalahni kidika dahnyayamna
wain dawak yayal dudutni balna karak.
Sau muihni balna niningna yakat Papang la yamwi
4“¿Tiro, Sidón,#Is 23:1-18; Ez 26-28; Am 1:9-10; Zac 9:1-4; Mt 11:21-22; Lc 10:13-14. Filistea#Is 14:29-31; Jr 47; Ez 25:15-17; Am 1:6-8; Sof 2:4-7; Zac 9:5-7. yang kaupak ais dukih manawih? ¿Birita yayamnin kultamanah? ¿Di as minityakkih manawih? ¿Tihn dawakat mamatna dunamna kidika manaki? 5Manna lalahki malnamana dawak kulki bik, di minit nunuhni balna dai kidika bitik mamatna yultamana uni yakat duyawanamana. 6Naikau duwi uina Judá muihni balna kidika, dawak Jerusalén muihni balna bik, dawak wauhwi bakakanna warau kapat, grik balna yakat. 7Kauna yang lawik yakna awaki bakakanna pāni yakaupak, dawak yang manayamtingkat sihm wauhna awanama. 8Walamabis ahal dawak yayal balna bik wauhtik bakanna awaki, Ju balna yakat, dawak witingna yaklauwi wauhwi bakakanna karang, Sabeo muihni pa naikau balna yakat. Yang Papangyang kat yultayang.”
9Adika yulni yultanauh sau muihni balna yakat:
¡Wār kalbaunin as maisihnidis kidika yultanauh!
¡Kulninna dadasni balna kidika yultanang aiwang!
¡Aiwang, dawakat, kalbauyang balna kidika awi-uiwang!
10Isparah kidika sau tuknin dini yayamwang
dawak langsa kidika laih di minik daknin dini yayamwang,#Is 2:4; Mi 4:3.
dawak parasni dis kidika yulwang:
“¡Yang laih parasni yang!”
11Yaihnitkau sau ūk mana kidika,
manna bitik bainah aiwa kaluduhtanauh.
¡Baisa muih kulnin yamni kidika,
war kalbauyang muihni kalwang!#3.11 Baisa muih kulnin yamni...kalwang: grik kau laih kaput ulna. Hibru kau laih yulwi Papang datang aiwang kulninna pararasni balna kidika.
12Sau muihni balna ridi alahwa
Josafat pāni langni yakat yawanauh,
yakat Papang la yamwarang ki sau bitik yaihnitkau balna yakat.
13Witingna kidika uba dudutni balna bahang,
di minik pihna kat dakwa kapat daktanauh,
kat bahnin mani kidika kaina bahang#Rib 14:14-16.
wain minik taihwi sikitnin kapat,
taihta sikittanauh,
kat wain yamnin kidika bitik ridi kalna bahang.#Is 63:3; Lm 1:15; Rib 14:19-20; 19:15.
14Muih mahni palni bang ki, La Yamwarang pāni yakat,
kat Papang kaiwarang mani kidika ulisna bahang.
15Ma, dawi waiku kidika puksani kalwi,
dawak yala balna kidika yaringni duwas ki.
16Jerusalén, Sayan asangni kaupak
Papang yulni parasni alwana kapat kidika kalawak dakana ki,#Jr 25:30; Am 1:2.
dawak sau, makau kisang, sau kidika yukwi.
Kauna Papang kidika yakat yakmaldinin pāni,
dawak nanit daknin pāni bik ki,
Israel balna niningna yakat,
kat witing tawanni bahang.
Judá, witing tanit yakat alasnina kidika
17“Manna watta amangkilatamana,
yang laih Dawan yang, Papangmana,
Sayan yakat yalahdayang asangki holi kidika.
Jerusalén laih tawan nuhni as holi karang:
pa ūk muihni balna kidika wat as bik aiwi dakyakwi duduwas karang ki.
18Kidika mani yakat, wain dawi tāwas kidika
asang balna kaupak was kapat kirarang ki.
Yang ūki kaupak was burhwi kalahwarang ki,
kaput laih Sitim#Ez 47:1-12. sauni langni yakat suihna karangki.
19Egipto kidika bitik bahwi diswarang ki,
dawak Edom bik kauhmak wanilang kalna karang,
kat witing yaklauwi Judá muihni balna niningna yakat yaklauna bahang,
dawakat kidika pāni yakat dutni yamwas muihni ani bik utuhna bahang.#Abd 10.
20-21Yang lawik biritik kalyamki dauna kidika yulni,
dutni yamna muihni yakat dutni kidika dating diswas karang.#3.20-21 Yang lawik...diswas karang: hibru kau ulna kidika laih amangladas ki.
Kauna Judá dawak Jerusalén kidika balna laih ban muih yalalahna karang,
dawak yang Papangyang, Sayan asangni yakat yalahki.”
Currently Selected:
Joel 3: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998