Oseas 13
13
Di bitik yakat kaldaukalna kidika Israel
1Efraín muihni balna kidika yulbabauwa kat,
Israel muihni ūk balna laih rispik lani kat dai;
kauna Efraín dauna witing alas pāt duwi
Baal yakat minit yulna kidika yulni.
2¡Dawak baisa dutni yayamwi!
Lalahnina balna yakau arwi dawan dauh wayani yayamwi,
witingna amput yamkih diawa yakat.
Usnit dawak yuyulwi: “¡Sakripais yamta kalatanauh!”,
muih balna laih turuh almuk wayani dawan dauh balna yayamna yakat uhumwi.
3Kaput bahang witingna kidika sihm mapiris mukusni kapat karangki,
dawak payahlawarah yalawas bukwa kapat bik karang ki,
bahang kidika laih payahlawak dislawi,
di unitak wing wauhwi dukiwa kapat bik karangki,#Sal 1:4; Jr 13:24; Sof 2:2.
dawak wayau kapat bik karang ki.
4Papang yulwi:
“Yang man Papangma yang,
Egipto kau sakman dai kidika kaupak;
ūk balna yakat dawan kapat ditalwinih,
kauna yang akat manah yatalah,
kat yang manah ki malaihyakyang yang kidika.#Ex 20:2; Is 43:11; 45:21.
5kauhmak wanilang sauni daihni yakat yang mainmatalnayang.
6“Kauna manna kasnamna kidika minit bayak dunamana kat,
manna manah kaldakamana ismangna yakat,
dawak yang laih damatnakahna dai.#Dt 8:11-17.
7Kaput bahang, witingna niningna yakat layan kapat awaki,
dawak nawah bulni tapas kau tahawa kapat lik awaki.
8Nawah yal walanibis disna kat walwa kapat
witing yakat alahwana awaki isning kidika bitik daktik dis yamki.
Layan kapat kidika yakat kasna awaki.
9Madaukalna awaki, Israel,
muih as bik sip-awas karang malaihwi yakna atnin.
10¿Waralaih angkat sakyah kingma kidika,
tawanma nunuhni balna bitik kau laihwi yaknin?
¿Tamatuna muihni balna angkat bangyah,
kidika balna yakat kingma yulnaman dai kidika?#1 Sam 8:5-6.
11Antik man yakat king manayang dai,#1 Sam 10:17-24.
dawak antik man kaupak king kidika madakyaknayang.#1 Sam 15:26.
12“Efraín dutni yamna kidika ulna sakki;
witing dutni yamna kidika ulna sakki.
13Israel laih batanh danin awarni kidika kaina ki,
kauna walanibis kidika mutu,
sip amput batanh dawarang pāni kat bik duwas ki.
14¿Dawak sau ū parasni kaupak laihtik yaknik kidika sip karang yah?
¿Daunin kaupak laihtik yaknik karang yah?
¿Angkat sakyah#13.14 ¿Angkat sakyah grik kau laih kaput ulna. Hibru kau laih yulwi yang awaki. daunin man parasma kidika?
¿Angkat sakyah sau ū man dutma kidika?#1 Kor 15:55.
¡Adika muihni balna akat wattik minikun dakanin kidika dutas awaki!”
15Israel kidika dibasta kapat#13.15 Dibasta kapat: kaput ulna kidika yamni kapat ki. Hibru kau laih yulwi kalwirah balna walaninabis. puluwarang bik,
ma kilwa kaupak wing kaiwarang,
kauhmak wanilang kaupak wing parasni wauhwa kidika yaklauwi kusulawarang,
dawak wasni balna kidika bitik laih buhlana karang.
Witing waihnila balna kidika yaklauwi
lalahni balna kidika dakyayakna karang.
16 # S.b. 13:16 kaupak 14:9 kidika laih libitna ki S.b. 14:1-10 kat hibru kau ulna yakat.Samaria tawanni kidika wah duna karang
kat Papangni niningkauh yaklauna dai bahang.
Isparah kau dadauna karang,
dawak walaninabis balna kidika sau yakat ruhwi babahrna karang,
dawak, yayal muih kararuk balna kidika laih pipitna karang.
Currently Selected:
Oseas 13: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998