Galacia 2
2
Apostel ūk balna kidika Pal yakatyamni kalduduna
1Kurih 14 bayakwak Jerusalén yakat#Ap.w 11:30; 15:2. yawanayang Bernabé karak, dawak Tito bik duyawanayang. 2Yawanayang kat Papang yaklauwi nikingkana dai bahang yawinik kidika. Kidika yak, muih balna muhnina yakat yulnayang yul wisamni yamni ju awas balna yakat sumaltayang kidika. Dawak kaput bik laih, lā muihni kidika pāni yakat bangkidika yakat bik diyulnayang lāih palni yang di yamnayang balna kidika dauh awasdai. 3Kaunah Tito witing yang karak likki, dawak bik witing laih grik kauna taihwi kalyayamwasdai Papang sainni dunin. 4Wirah dauh balna kidika buas yangna paskingna yakat kakana dai yakmaldi, yakpakwi talnin Jisas Krais yakat pri lani duda kidika dawak watwi la diniyamyang yakat maiāna atnin. 5Kaunah minit as bik datining yanadukiwasdai witingna, kat dukih yanana bahang manna yakat yul wisam yamni kidika ban atnin.
6Kaunah di wisamni as bik minit yakat lalakwasdai lā muihni nunuhni balna kidika, (yang laih kultasyang dai witingna ais amput kidika, kat Papang laih muih muhni yakat talwi lani yamwas bahang#Dt 10:17.). 7Nawatkauh laih, amanglalana dai Papang yaklauwi yasihna kidika yul wisamni yamni kidika sumalna atnin, ju awas balna yakat, Pita yakat sumalnin paknadai kaput ju balna yakat. 8Kat sihm Papang kidika yaklauwi Pita yakat sihna dai ju balna yakat Apostel kapat, yang akat bik kaput yasihna dai Apostel kapat ju awas balna yakat.
9Jims, Pita, dawak Jan, kidika balna laih suts rahni balna kapat duduna dai, dawak amanglalana Papang yaklauwi kaput yamni yakulna dai kidika, bahang kaput kukulwa kidika lāih kalahnin yulni, witingna tingnina yayana yang akat dawak Bernabé yakat bik, bahang kaput laih witingna yamni tatalna yangna adika ju awas balna pasyakat yawik wark yamnikna, dawak witingna laih ju balna pasyakat wark yayamwarang. 10Witingna yanayuyulna muih miniknakunni balna kidika kulta atnikna, bahang kidika laih yang yamni maintalnayang.
Pal yaklauwi Pita yakat bilnaAntioquía yakat
11Kaunah Pita kidika Antioquía tawanni nuhni yakat kiuna kat, witing muhni kat bilnayang, kat witing yamwa kidika laih dutni dai bahang. 12Kat tatuna laih witing di kaswādai ju awas balna karak,#Ap.w 11:2-17. kaunah Jims muihni balna buas uina kat, witing dakwi kalahna, watwi witingna karak kalpakwi di kaswasdai, kat yamaduna dai bahang Papang sainni lani nuhni kukulwa muihni balna niningna yakat. 13Ju muihni kulyang balna ūk kidika Pita yamwa yakat usnit uhuina, dawak Bernabé bik witingna yayamwa kaput yamna. 14Kaput bahang talingkat yul wisamni yamni yulwa yakat yayamwas kat, Pita yakat kalyulnayang, muih bitik muhnina yakat: “Man laih ju man kaunah ju awas man kapat dai; ¿bahang ais yamta ju awas balna yakat paktamahn ju balna kapat atnin?”
Ju dawak ju awas balna kidika bitiklaihwi yaknin duduwi kasak kulnin munah
15Mayang laih ju mayang, batahndana mayang kaupak, dawak Papang tatalwas dutni yamyang balna kapat awas mayang. 16Kaput kauna, amangladi muih as bik pātni kidika kaupak pri kalahwaski, Moses lāni kat yamwa yulni,#Sal 143:2; Rom 3:20. kaunah, tingkih lani dawak Jisaskrais yakat kasak kukulwa munah laih.#Rom 3:22. Kidika yulni, mayang bik Jisaskrais yakat kuldi, bahang Papang yaklauwi barangni muihni maikulnin, tingki, kidika kasak kulnin munah, kaunah lā yulwa yakat yamda munah laih awas ki. Kat muih as bik barangni kalkulwas karang ki, lā yulwa yakat yamwa kidika yulni.
17Waralaih, Krais munah waldakat barangni muihni kalna atnin, kaput kat mayang bik dutni yamyang mayang, ¿kaput kat sipyah yulna atnin Krais yaklauwi maiyamwih dutni yamyang mayang? ¡Kaput awaski! 18Kat di as daukaltayang kat, usnit kat wattik yamtayang, bahang kaput kat yang silp pātki. 19Kat lā munah laih yang daunayang lā yakat, witni kat Papang yakat sangka atnik. Krais karak pan prihni yakat yapana ki, 20dawak yang kuduh sangka awasyang kidika, kaunah Krais kidika yang akat sangka ki.#Fil 1:21. Dawak waradika sangkika dutayang adik muihki yakat, Papang walanibis yakat kasak kultayang munah sangkayang, kat yang akat dalani yatalna dawak daunin yakat kana yang yulki. 21Papang minikun talnin duwa kidika ruhmtik danik kultasyang; kat lā munah barangni yakulnin kat, Krais kidika laih dauh palni dauna.
Currently Selected:
Galacia 2: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998