Éxodo 2
2
Moses batahndana
1Leví sulani kaupak al as kalahwi yal as duna sihm kidika sulani kaupak, 2bahang yal kidika muihbin as duna dai al bin kat. Yal kidika talwak muih bin al bin kidika nuhni palni bin kat, malwi duna dai kurih bās witing ūni yakat;#Ap.w 7:20; Hib 11:23. 3Kaunah sip-awas kalahna dai baisa walwi duna atnin ma mahni ki, dawak kuring bin kapat as yamna dai dawak kidika pasyakat muihbin kidika awi putwi dawi Nilo wasni yakat āna dai. 4Kidika minit yakat muihbin kidika wirahni as yakat kalyulna dai yaihnit ulah yakat kiwi talna atnin, ais kalahwarangpa muihbin kidika.
5Usnitkat, fero walanibis kidika waskana yaklakwi kiuna, dawak dini yamyang balna tatalna dai, kuring bin kapat dai kidika. Kaput laih sihna dai dini yamyang as yakwi, witing yakat laihwi duwi kiuna atnin. 6Putnin kidika apahwi talwak muihbin al bin nuhni bin kat kaidatusdai pasyakat, fero walanibis witing minikun talwi aput yulna:
—Adika muih albin adika laih hibru bin as ki.
7Kaput laih muihbin wirahni kidika yaklauwi fero walanibis yakat kalyulna:
—¿Man yamni talaman, muihbin muhyang yalni as yulting kainin, hibru yal kat, witing yaklauwi ta bayahna atnin?
8Fero walanibis yaklauwi kalyulna:
—Yawa waltah.
Kaput laih yal bin dai kidika muihbin nanangni yakat kiwi kalyulna atnin, 9dawak fero walanibis yal dai kidika yaklauwi kalyulna:
—Muihbin adika duta muhta yatah, kaput laih yang lawik minitlautik maki warkma minit.
Nanangni dai kidika walanibis bin duwi kiwi muhna, 10barakna kalwa kat, fero walanibis tingni yakat kalana, dawak witing#Ap.w 7:21. walanibis kapat duna dai dawak ayangni pakna Moses,#2.10 Hibru kau laih Moses dawak yulni kidika tanka laih yaknin yulni yulwa kidika sihm kaput parah yulwi. Kidika laih Egipto muihni ayangni as ki tanka laih “batahndana”. Kidika laih ayangni ūk karak libitna sihm Tutmosis dawak Ramsés karak kapat. dawak yulna:
—Yang lawik waspa kaupak yaknayang.
Moses Egipto kaupak kiri
11Moses kidika uman muihbarak kalna kat, ma as kat witing wanaihni balna yakat talna kalahwi kiuna, bahang witing amanglana dai wark parasni kalahwa kidika.#Hib 11:24. Witing talwakat, witing wanaihni balna kidika Egipto muihni as yaklauwi wisna dai. 12Kaput laih yaihnit balna bitik yakat talwak muih as bik disdai, bahang Egipto muihni kidika iwi kauhmak yakat nuna dai. 13Payahwak watwi kalahna, dawak talwak hibru muihni balna bu kalbauwa tuludai. Kaput laih kalyulwi dakana dai muih bauwa muihni yakat:
—¿Ais yamta man nimasan yakat bautamahn?
14Dawak hibru muihni dai kidika yaklauwi kalyulna:
—¿Wais yaklauwi wihta mahanayah yangna paskingna yakat? ¿Bahang yaīnin kultaman Egipto inaman kapat?#Ap.w 7:23-28,35.
Moses adika yulni dakawi yamaduna, kat Egipto muihni dauna kidika amanglalana bahang. 15Kaput laih fero dakana Egipto muihni dauna kidika, Moses yaklauwi ina kidika, walnin sihna dai ipamna atnin yulni; kaunah Moses laih kiri Madián sauni yakat kiwi yalahna dai.#Ap.w 7:29; Hib 11:27. Dawak kidika yakat was pāni kuhrna kung as kat yalahna.
16Reuel Madián sumalniyang nuhni kidika walanibis yayal tiaskaubu duwadai. Kidika mani yayal balna kidika uina dai kidika pāni yakat was yakna atnin, tinglau balna bayahnin, papangni sīpni balna. 17Kaunah sīp maintalyang ahalni balna aiwi yayal balna kidika kangwi yayakna dai. Dawak Moses yaklauwi ilpnina kanadai, dawak sīp balna kidika was bayayahna dai. 18Kaput laih sirarau balna kidika papangnina yakat uiwak, witing yaklauwi diyulwi dakana:
—¿Ampadawak warmani laih ma baisa aiwamanah?
19Dawak yayal balna yaklauwi nangnitlalana:
—Egipto muihni as yaklauwi ilpkina kana sīp maintalyang balna niningnakauh, dawak bik was yakwi tinglau balna yakat bayahna dai.
20Kaput laih Reuel yaklauwi diyulna:
—¿Kidika alni angkat sakyah? ¿Ais yamta alas dapamnamanah? ¡Yawa kalyultanang kaiwi di kaswang!
21Kaput laih Moses witing Reuel ūni yakat watnadai, usnit Reuel yaklauwi witing walanibis yal Séfora kidika kalana dai yalni dunin, 22kaput laih Séfora walanbis as yakna dai, dawak ayangni pakna Gersón#2.22 Hibru kau laih Gersón dawak yulni tanka kidika laih pā ūk kaupak yulni yulwa kidika sihm kaput parah yulwi. bahang kidika laih aput yulna: “Yang laih tringsar as yang pa tringsar pāni yakat.”
23Ma balna bayakwi kiuna bahang kaput laih Egipto kingni dauna. Kaunah Israel balna lain ban kakaida dai warau lani yakat. Kaput laih Papang dakana dai kakaida kidika 24dawak witingna yulnina kidika dakana, dawak Abraham, Isaac dawak Jacob karak bik pramis#Gn 15:13-14. yamna dai kidika isningkatna dai. 25Papang talna dawak bik amanglana witingna wawauhwa kidika.
Currently Selected:
Éxodo 2: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998