Efesus 6
6
1Walabis balna, papangmana yulni dakanauh, Dawan dukih kalawa kaput, kat kidika laih Papang lani kat bahang.#Col 3:20. 2Lā tatuna yakat adika pramis duwi: “Papangma dawak nanangma yakat risnipik kalatah, 3kaput laih ismanglak atnam dawak sangmaka naini dunam sau akat.”#Ex 20:12; Dt 5:16.
4Dawak manna, Papangmana kidika, yamtanangkat walamanabis kulnin daukalnin awaski,#Col 3:21. kaunah sumaltanauh la kat atnin Dawan dukih kalawa kaput.
5Muih dini yamyang balna, sau akat manna damanawan balna yulni daka yamtanauh. Rispik karuk yamtanauh, yamadunin dawak ismangna yakat alas lani dis, Krais dini yamtamana kapat. 6Dinina yamtanauh, witingna tatalwa minitni yakat manah awaski, yamni manakulnin yulni, kauna Krais dini yamyang balna kapat, rahm palni Papang kulnin lani yayamwa kidika. 7Wark kidika yamkih yamtah, Dawan dini yamtaman kapat, kaunah muih al dini yamtaman kapat laih awas. 8Manna amanglanamna ki muih bitik, muih dini yamyang, pri muihni karang bik Dawan kaupak duduwarang, di yamni balna yayamna kidika minit.#Col 3:22-25.
9Dawak manna, dawan mana kidika, dimana yamyang balna niningna yakat kaput awanauh, niningna yakat dutni yamnin kapat laih awas. Ismangna aitanauh, manna dawak witingna bik, Dawan yakat mana, witing makau kisang yakat sakkidika,#Col 4:1. dawak witing laih muih buas kau dauh dikulwaski dawak ūk balna yakat laih nuhni.#Dt 10:17; Col 3:25.
Kalbaunin spiritni kristian duwa kidika
10Dawak waralaih, wirah balna, parasmana kidika Dawan yakat waltanauh, witing parasni nuhni duwa yakat. 11Papang yaklauwi nanitdaknin dini#Rom 13:12-14; 1 Ts 5:8. manana kidika kau namatna daktanauh, kaput laih manna ridi awanama sitan alas yulwa kidika niningyakat. 12Kat mayang kalbaudaski muih parasni niningyakat, kaunah spirit dutni makau kisang yakat kidika niningyak kalbaudi, witingna parasni duduwa kidika sau akat puksani pasyakat. 13Kidika bahang, Papang yaklauwi kalbauwi nanitdaknin dini manana kidika bitik dutanauh, kaput laih ma dutni yakat sip wauhtanama, yamni ridi kalahna usnit kat parasni awanauh.#6.13 Yamni ridi...awanauh: satuk wirlanin sipki: dawak minit bayakwi, parasni atnin.
14Kaput bahang parasni awanauh, di rahm#Is 11:5. kidika prakmana kapat awanauh, dawak barangni lani kidika karak namatna daktanauh.#Is 59:17. 15Ban kaput ridi awanauh,#6.15 Ban kaput ridi awanauh: Y.y. susma atah. kalahwi sumalnin kidika, kulnin aslah dunin yulni kidik.#Is 52:7. 16Di bitik minityakat, kasak kulnin lani kidika kau namatna daktanauh, di dutni sinibang dahlwa kidika kaupak manalaihwi yaknin.#Sal 7:13. 17Dawak laihwi yaknin kidika laih tunama paknin dini dadasni#Is 59:17. kapat kawang, dawak Papang yulni kidika laih isparah#Hib 4:12. baina kapat kawang, Spirit Holi yaklauwi kalawa kidika. 18Makatyulnin kidika dadawinih:#Col 4:2-4. Papang yakat ban kaput kalyulta awanauh, Spirit yaklauwi manaduwi kiwa kidika. Ismangna abahl awanauh, kulnamna buknin awaski, dawak tawan holi kidika yulni bik mamatnayultanauh. 19Yang yulki bik mamatnayultanauh, Papang yaklauwi yul balna yulnik kidika yāwarang, dawak kaput laih kulnin dadasni karak yulki, kaput laih Papang di malnikau duwa kidika lāih niningnakaki, yul wisamni yamni kau duwa kidika. 20Papang yaklauwi yasihna adika yulnin yulni, kidika yulni waradika silak yakat sakyang. Mamatna yultanauh, kaput laih yamadutas yulki.
Parasna yulni balna witni yakat
21Tíquico,#Ap.w 20:4; 2 Tim 4:12. mawirahki dalani dawak barangni bik kidika Dawan warkni yakat, witing yaklauwi yang yulki balna kidika bitik duwi kiwarang, dawak bik ampatyang kidika. 22Kidika bahang manasihtayang manna yakat, manayulna atnin ampat mayang kidika, dawak kaput laih kulnamna dulaunin.#Col 4:7-8.
23Papang kidika, Dawak Jisaskrais, wirah balna yakat diawang, kulnin aslah lani, dalani lani dawak kasak kulnin karak; 24dawak bik witing yaklauwi tingnikih kidika diwang, Dawan Jisaskrais yakat dalani tatalwa balna kidika, dalani lani satuk kalwas kidika karak.
Currently Selected:
Efesus 6: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998