Efesus 3
3
Pal laih ju awas balna yakatyul wisamni yamni kidikaduwi kiunin pakna
1Kidika yulni yang, Pal, Krais Jisas yulni silak yakat yang, manna yamni atnamna yulni, ju balna awasmana kidika. 2Manna uman amanglanamna ki, Papang witing minikun talnin duwa kidika munah yapakna adika warkni yamnin,#3.2 Papang witing minikun talnin...warkni yamnin: satuk wirlanin sipki: Papang kulnin dalani talwa lani kidika yamnin yapakna. manna ilpmana.#Col 1:25. 3Amana kau kapat munah nikingkana,#Gal 1:12. Papang malni kau di yamwa balna kidika, yulni parahni uman manayulnayang kaput. 4Yulta talnama kat, amanglatanama yang amanglatayang kidika di malnikau Krais yamna balna kidika, 5ma bayakna balna yakat muih as yakat bik niningnakawasdai, kaunah waradika laih Papang yaklauwi lāih yakwi niningnakana aposnitel balna dawak pranipit balna yakat bik, witing Spiritni munah. 6Di malni kau kidika laih adika ki: yul wisamni yamni kidika munah Papang yaklauwi nisan balna bitik uinin yulwi Krais Jisas yakat, dawak prisantni sakkidika dunin, sihm muihni nuhni kidika, sihm pranimis yamna kidika Israel tawanni yakat.#Col 1:26-27.
7Dawak yang laih kidika yulni sumalnin warkni yana, Papang dalani lani duwa kidika munah yang nikingyakat, dawak kaput bik parasni nuhni kidika nikingkana. 8Yang laih dibin Papang tawanni muihni balna bitik niningna yakat;#1 Kor 15:9. kaunah yang akat kidika yamni kidik yana ju awas balna yakat sumalnik, Krais ritsni balna mahni duwa kidika. 9Dawak yāpakna muih bitik yakat niningnakanik angdika Papang warknipa, di bitik yamyang kidika, tanit kaupak malni yakat duwadai kidika. 10Kaput laih waradika, suts munah, makau kisang parasni balna sipkarang amanglanin, Papang sinsni nuhni kidika, di satni kau yamwi kidika manikingkawa kidik. 11Papang adika yamna, witing wark balna yamnin ridi yamna dai kidika, dawak Dawan Jisas Krais yakat yamna kidika. 12Dawak Krais yakat pri lani dudi, Papang yaihnit yakat kiunin, dawak mayang kasak kulda munah, witing yakat makulnik ādi duda munah. 13Kidika bahang manayultayang, kulnamna buknin awaski manna yulmana wauhtayang kidika yulni, kat adika laih manna namangna yakat rispik as ki.
Krais dalani lani
14Adika yulni yang limbabahtayang Papang ki muhni yakat,#3.14 Tingkau ulna kidika laih minit kau lakwi: Madakiwan Jisaskrais kaupak. 15witing ayangni kidika walanibis balna bitik duduwi, makau kisang yakat dawak sau akat bik. 16Papang kau yultayang, witing alasnina yaksihni ritsni kidika manna kau manawang, kulnamna yakat, parasni kidik Papang Spiritni munah, 17dawak Krais kidika kulnamna yakat yalahwang, kasak kulnin munah, dawak dalani lani kidika rikni dawak rahni kaput kawang sangmanaka yakat. Manna bik rahni balna parasni pawatnamnaki yulni dalani lani kau. 18Dawak kaput laih amanglalawang tawan holi balna kidika bitik, Krais dalani lani duwa kidika ampus panuhni, naini, maluihni dawak tuhni kidika. 19Yultayang, kidika dalani lani amanglatanauh, kidika laih tanit nuhni ki, di ūk balna amangladarang karak dawakat, Papang amput kidika bitik amangladak maibuhng dawarang.
20Dawak waralaih, Papang kidika alasnina yaksihni karang, dawak mayang yulda kidika dawak kulda kidika minitkau yamnin sipki, witing parasni mayang yakat kidika tingnikih karak. 21¡Alasnina yaksihni kidika Papang yakat, sutsni yakat dawak Krais Jisas kau bik, kurih andat andat balna bayakwarang yakat! Amén.
Currently Selected:
Efesus 3: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998