Daniel 12
12
Awarni witni yakat
1‘Kidika minitni yakat kiwi kalahwarang Miguel,#Jud 9; Rib 12:7. insal nuhni as witing tawanni nanitdakyang kidika.
‘Kulnin kaidinin awarni karang,
kidika laih minit as, ma uk balna kapat as bik diskarang
nesan balna kalahna kaupak.#Mt 24:21; Mk 13:19; Rib 7:14; 12:7.
Kidika awarni kiwi kawakat,
witing tawanni balna laih bitik laihwi yakna karang
ayangnina wauhtaya yakat ulna balna kidika.
2Sau ū yakat mahni palni kamama balna kidika sahmumuhna karang:
buas kidika ban kaput sangka atnin yakat
dawak ūk balna kidika laih asalni dawak yamadangni ban kaput atnin yakat.#Mt 25:46; Jn 5:29.
3Ahal sins duyang balna kidika
muih mahni ta barangni yakat duwi uinadai kidika
kisang kau yaringwa kapat kakalna karang;
¡yaringni kidika kaput ban karang, yala balna kapat!#Mt 13:43.
4‘Kaunah, man, Daniel, adika dini balna malta apakta dutah, dawak wauhnitaya kidika tamp taihtah,#Rib 22:10. mani witni kaiwi kawarang kat. Muih manas pini aiwarang uiwarang satni bik yayamwarang, sins kidika baisa walwi.’
5“Yang, Daniel, talnayang muih ahal bu bik yaklaunaraudai, waskung nakaskau, nakaskau. 6Dawak as kidika yaklauwi kalyulwi dakana muih al linin asnina kana sakkidika yakat, was balna minit yakat yaklauna sakdai kidika yakat: ‘¿Mampat kat adika dini tanit yamni adika danh yamtanamayah?’ 7Muih al linin asnina kanasakdai kidika tingni ibin yakat dulauna, dawak Papang sangka#Rib 10:5. kidika ayangni kau yakwi, yulna: ‘Taim bās kaupak papusbah,#Dn 7:25; Rib 12:14. pasyakat Papang tawanni parasni daukalwidis yamwa kidika dawakarang kat, adika dini balna bitik laih danhkalna karang.’
8“Yulwa kidika yang dakanayang kaunah sip amanglatas danayang. Kaput laih kalyultik dakanayang: ‘Dakiwan, ¿ais kalahwarangyah, adika balna bitk usnit kat?’ 9Dawak witing yaklauwi nangkitlana: ‘Man tāma munah tamatyakat yawah, Daniel, kat adika dini laih malnikau manah dunin karangki, mani balna witni kiwi kawarang kat. 10Wauhnin kaiwarangti yulna kidika, muih mahni laih wawauhna karang, dawak kidika munah maisihnidis dawak barangni bik kakalna karang. Muih dudutni balna kidika ban dutni yayamwa karang,#Rib 22:11. di balna kalahwa kidika amanglalawas ban karang, kaunah ahal sins duyang balna kidika laih amanglalana karang di balna kidika bitik. 11Ma 1,290 bayakna karang, ma bitik sakripais yayamwadai kidika laihwatwarang kaupak, dawak holi dini kidika resnipik dis#Dn 9:27; 11:31; Mt 24:15; Mk 13:14. dawak wayakani ahawarang kidika Papang ūni yakat. 12Isninglak karang, angdika alni tahawa kidika ramh kulwi, ma 1,335 bayakwarang kat. 13Kaunah man, Daniel, lapakta witni kat ban yakwah, dawak wingmata puhtah, kat mani witni yakat lawa mamat kidika duma.’ ”
Currently Selected:
Daniel 12: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998