2 Kurint 13
13
Isning paknin lani dawak witni parasnin yulni balna
1Adika karak wat bās yawik manatalki ki. Di balna bitik kidika witnis bu kidika awaskat witnis bās yuyulwakat barangni kalna karang ki.#Dt 17:6; 19:15. 2Muhnilau kau dutni yamnamana kidika, dawak bitik mana yakat bik, waralaih naikau sakyang akaupak yang palni wat bu yawik manatalik ismangnapaknayang dai kidika yulni balna wattik ismangnapaktayang: wattik yawik manatalki mani kat, manakultik dakas awaki ki, 3uman manna laih walta talamana Krais yaklau yang yulki yulwa kidika yulni. Dawak Krais laih yudutni awaski manna karak yulbauna kidika, kaunah witing parasni kidika manna pasmangna yakat lāih yakwi namangnakawi. 4Witing laih rahm yudutni kapat pan prihni yakat ilwi papana dai, kaunah Papang parasni karak sangka ki. Sihm kaput, yangna bik witing sip wauhwi bayakwas dini kidika yakat āwayangna, kaunah witing karak aslah yangna laih Papang parasni karak sangka awanaki ki manna dimana yamna atnikna yulni.
5Manna silp kallakta talnauh, rahm kulnin lani yakat barangni manapa; traini talnin yakat āwa talnauh. ¿Manna amanglatasmanah Jisas Krais laih manna yakat sakkidika? ¡Traini talnin yakat bayaktas danamana karang laihtakat! 6Kaput bik manna yakat yamni manakultayang, manna amanglanamana karang yangna laih takitna yakat ban yawayangna kidika. 7Dawak Papang yakat mikitna yultayangna manna di dutni as bik yamnamna awas yulni; yangna traini talnin munah bayaknayangna laih awaski, kaunah manna di yamni kidika yamnamna yulni, yangna laih sihm bukyawanayangna kapat karang bik. 8Kat di rahm kidika niningyakat laih di as bik yamnikna sipawas yangna, kaunah di rahm kidika manah laih yulnikna sipyangna. 9Kidika bahang paraskina dis mani kat alasna yangna, manna parasni atnamna manah yulni; dawak yangna laih takitna yakat ban mikitna yultanaki ki manna barangni kalnamna yulni. 10Adika wauhnitaya manaultayang baisa yawik manatalasyang tanityakat, yang yawaki mani kat laki balna kidika parasni yamnik awas yulni, kidika laih Dawan yaklau yana, daukalnin laih awas, kaunah yamtingkat spirit niningyakat baraknamna yulni.
11Wirah balna saran laihnin yakat, yang dukih yawi manna alasna yalahnamna dawak manna sangmanaka yakat barangni lani kidika waltanauh. Kulnamna dulautanauh dawak aslah yalahdanauh kulnin aslah lani karak; dawak dalani lani dawak kulnin aslah lani Papangni kidika laih manna karak karang. 12Biri biri kalparastanauh kalumnin holi as karak. 13Rahm kulnin lani niningkauh wanaih balna kidika bitik yaklau manna yakat parasnin lani manasisihwi.
14Dawan Jisas Krais minikun talnin lani duwa kidika, Papang dalani lani duwa kidika dawak Spirit Holi kidika kauna manna karak karang.
Currently Selected:
2 Kurint 13: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998