1 Tesalónica 2
2
Tesalónica yakat Pal wark yamna kidika
1Wanaih balna manna yamni amanglatamana yangna yawik manatalna yangna kidika dauh awas dai kidika. 2Baisa nawatkauh, manna amanglatamana karang bik, yangna laih muhnilau kau dutni yanayayamna dai Filipos#Ap.w 16:19-24. sauni yakat, Papang yaklau ilp yanana witing yulni wisam yamni kidika manna yakat manayulna atnikna, kulnikna dadasni karuk dawak bik kalbaunin dadasni kidika pasyakat.#Ap.w 17:1-9. 3Kat yangna laih mistik alahwas yangna dai sumaltayangna yulni kidika, dawak kulnin lani dutni karak bik yultasyangna dai dawak muih as yakat bik alas kalyulnikna yamtasyangna dai. 4Nawatkauh, Papang yaklau yamni yanatalwi yul wisam yamni kidika yulnikna yanayulna, dawak yangna laih kaput yultayangna. Yangna laih muih#Gal 1:10. balna yamni talninna kidika yulni yamtasyangna, kaunah Papang witing isingna lakwi talwa kidika minikpa yakat yamni talnin kidika yamtayangna. 5Manna amanglatamana, yangna laih wat as bik manna yakat yul yayamni kidika dutik manayultasyangna dai, dawak yangna lalah dunikna yulni bik yamtasyangna. Adika dini laih Papang witnis ki. 6Yangna laih muih as bik risnipik lani kidika waltasyangna: manna dawak muih ūk balna risninapik bik awas. 7Yangna Krais aposnitel balna lakina tikini kidika manna mamatna yakat yamtiningkat dakanamna dai karang bik, manna pasmangna yakat muihbinina kapat di yamnayangna dai. Sihm muih nanang as muihbin as muhwa kapat dawak bik walanibis balna maintalwa kapat, 8manna yakat bik kaput dalani manataldi dukih yanana dai kaput, Papang yulni wisam yamni kidika manah bik awas, kaunah yangna palni sangkinaka kat bik. ¡Yangna laih uba palni dalani manatalna yangna! 9Wanaih balna, manna ismangnakatwi yangna amput wark alahwik dawak amput kalbauna yangna kidika sangka atnikna yulni.#Ap.w 18:3; 2 Ts 3:8. Madah dawak pukta wark alahwanayangna, manna namangna yakat truknin dini atnikna awas yulni, yangna laih Papang yulni wisam yamni kidika manasumaltayangna dai mani.
10Manna dawak Papang bik witnis, yangna laih holi, barangni dawak kulyang muihni balna mana yakat manabiltas di balna yamnayangna kidika. 11-12Manna amanglatamana yangna lawik manna yakat kulnamna dulautik dawak walamana-ānnayangna kidika, papang as walanibis balna yakat yamwa kaput. Yangna lawik manayulnayangna Papang dini balna amput kat kaput atnamna, witing kingni lani yakat dawak alasnina yaksihni kidika yakat bik kiwi dunin yulwa kidika.
13Kidika bahang, yangna nikingnakauh laih, niningh ban kaput Papang yakat tingkih kalatayangna, bahang yangna lawik Papang yulni manasumaltiningkat dakanamana mani kat, Papang yulni kapat dunamana dai dawak muih yulni kapat laih awas. Dawak kidika laih rahm Papang yulni, kidika laih manna kulyang balna mana kidika pasyakat lāih kalahwi. 14Wanaihki balna manna saumana muihni#Ap.w 17:5. balna yaklau manauhuiwakat wauhnamana kidika, Judea yakat Papang sutsni balna Jisas Krais yakat balna dikalahna kidika kapat manna yakat bik manakalahna, bahang witingna bik saunina muihni Ju balna yaklau diuhuina dai. 15Adika Ju muihni balna yaklauwi Dawan Jisas yakat ihina, muhnilau kau Prapit balna yakat ihina dai kaput, dawak yangna yakat laih yanakangwi yayakna dai.#Ap.w 9:23,29; 13:45,50; 14:2,5,19; 17:5,13; 18:12. Papang yamni talnin kidika yayamwas ki, dawak di balna bitik kidika niningkauh yaklalauwi, 16Ju muihni balna awas kidika yakat yulbautiningkat witingna bik laihwi yaknin lani duna atninna yamtiningkat, sip yanadadawakat yulbautasyangna. Aput karak witingna dutnina kidika uman kulwi talna ki. Kaunah waralaih, witni kat, Papang wahni yamadangni kidika witingna minitna yakat kaina ki.
Pal witing watwi Tesalónica muihnibalna yakat kiwi ditalna atnin dukih kalawa kidika
17Wanaih balna, yangna ma buas manna kaupak daktik alahwayangna mani kat, manatalasyangna karang bik, isingna yakat ban manadutayangna dai, dawak yawik manatalna atnikna dukih palni yanawa dai. 18Yawinikna traitalna yangna dai; yang Pal, wat mahni yawinik kulnayang dai, kaunah sitan yaklau nikingnakauh yaklauna dai. 19Bahang, ¿mayang matahanik, maalaskina, dawak mayang Madakiwan Jisas watwi kaiwarang kidika muhni yakat mayang manah kapat kaldakanin dini kidika waisyah? Manna awaslaih, muih ūk laih diski. 20Manna laihtakat yangna isingnalak dawak bik alaskinana mana.
Currently Selected:
1 Tesalónica 2: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998