Matewu 5
5
Txhumayelo ya Mmangoni
( Sipimo sa 5 kala 7)
1Ngako Jesu a txi wona mabutho a to kwela txitimwi ka mmango. Msana ka kuva a di khalahatshile, vagondiswa vakwe va to mtshuketela hafuhi. 2Se ene a to tula txisofu, e khata ku va gondisa,
Kutska ka ditshuri
(Luka 6:20-23)
Jesu a ti khene:
3“Va katekile ava i ku sisiwana moyani,
nguko Mfumo wa nzumani mbwawe!
4Va katekile ava va dilako,
nguko va na thavelelwa!
5 # Wona ni ka: Mas. 37:11. Va katekile ava vo thutha,
nguko va na mana thomba ya mafu!
6Va katekile ava va ku ni nzala ni ditora da wululami,
nguko va na khuriswa!
7Va katekile ava va ku ni wumbilu,
nguko va na mahelwa wumbilu ni vona!
8 # Wona ni ka: Mas. 24:3-4. Va katekile ava va nga basa timbilu;
nguko va na wona Txizimu!
9Va katekile ava va thumelako kudikha,
nguko va na dhanwa ku mbanana va Txizimu!
10Va katekile ava va xaniswako,
ngu kumaha kuranda ka Txizimu,
nguko Mfumo wa nzumani mbwawe!
11Mi katekile, ngako va txi mi ruketela ni ku mi xanisa, ni ku mi hembela, ve mi lumbeta makuhu ngu mhaka yangu. 12Tsakani ta tinene mi txi nengela, nguko nja hombe hakhelo yanu nzumani. Nguko va va xanisisile toneto vaprofeti va va nga mi thangela.”
Mnyu ni liwoningo
(Marku 9:50; Luka 14:34-35)
13“Anu mi m'nyu ka vathu. Ngako m'nyu wu txi guma mtamo, wu na lungwa wona ngu txani kani? Kha wu vhuni txilo kambe, hahanze ka kutheketwa kule, kasi wu na kandetelwa ngu vathu.”
14 # Wona ni ka: Joh. 8:12; 9:5. “Anu mi liwoningo ka ditiko. Kha di sikoti kusisala didhoropa di di ku txitimwi ka mmango. 15#Wona ni ka: Mar. 4:21; Luk. 8:16; 11:33. Hambi dilambu kha va di lumekeli ku di khubhunyewa ngu txirundu, aniko va di hayeka txitimwi ka phande, ti to di woninga votshe va va ku nyumbani. 16Ngu toneto, kwanu ku na woninge masoni ka vathu, kasiku, ngako va txi wona mithumo yanu ya yinene, va na dhumisa Tate wanu a ku nzumani.”
Mlayo wa Mosi
17“Mi nga alakanyeni ti to ni tete ku ta fuvisa Mlayo wa Mosi mwendo gondo ya vaprofeti. Kha na tela ku ta fuvisa, aniko ni tete ku ta tatisa. 18#Wona ni ka: Luk. 16:17. Nguko kha ditshuri na mi gela ku khani: Ku na za ku txi pinda nzuma ni mafu, na txima ku sa pfhutwa ni m'bhalo wawumwewo hambi ni txisesana txidotho txa Mlayo kala totshe ti txi tatiseka! 19Ngu mhaka yeto, awule a no ndaka wawumwewo ka milayo yileya, hambi i di wa wudotho, a txi gondisa toneto ka vathu, a na va i di wam'dotho ka Mfumo wa nzumani. Aniko awule a veketako milayo, e yi gondisa, a na va i di wa hombe Mfumoni ka nzumani. 20Nguko ani na mi gela ti to ngako anu mi si mahi kuranda ka Txizimu ngu kuthembeka kupinda vabhali ni Vafarisi, kha mi na mbi wulela Mfumoni ka nzumani.”
Livengo
21“Mi ti engisile ati ti nga wombwa ka vakale, va txi kha vona: ‘U nga daye; awule a dayako a fanete kuthethiswa.’ 22Aniko ani ni khani: Awule a henyelako mkwawe a na yiswa kuthethiswani. Awule a rukako mkwawe a txi khene: ‘Txiphukuphuku’ a na ya lamulwa banzani. Ani wule a rukako mkwawe a txi khene ‘Dihundwa’, a na sungwa e rinzwa mndiloni ka Gehena. 23Ngu toneto, ngako u txi phaxa mhamba yako ha txiluveloni, se u txi khumbuka konaho ti to mkwanu ana ni mhaka ni nawe, 24yi leke konaho mhamba yako txitimwi ka txiluvelo, u thanga ngu kuya khongotelana ni mwananu; se ngu msana, wuya u ta ningela mhamba yako.”
25“Kuluveta u txi divalelana ni wu u phikizanako nayo, u di ngadi ha nzila kumweko nayo, kasiku asi ku ningeli ka mlamuli, awuwa nene a no kuningela ka diphoyisa, se ve kurumela ku khotelwani. 26Ngu ditshuri na kugela ku khani: Eho khu na mbi humiswa kala kuza u txi dihela yotshe male.”
Wugango
27“Mi ti engisile ati ti nga wombwa va txi kha vona: ‘U nga mahe wugango.’ 28Aniko ani ni khani kwanu: Awule a wonetelako wamsikati ngu ku mu navela, se a mahile nayo wugango mbiluni kwakwe. 29Ngako diso dako da txinene di txi kukhuvekisa, di phokonyole, u txi di tshotsha kule ni nawe nguko i txhuko kuluzekelwa ngu txihango txako txa tximwetxo, kupinda kutshotshwa mndiloni ka Gehena wotshe mmidi wako. 30#Wona ni ka: Mat. 18:8; Mar. 9:43. Ngako diwoko dako da txinene di txi kukhuvekisa, di wile u txi di tshotsha kule ni nawe, nguko i txhuko kuluzekelwa ngu txihango txako txa tximwetxo, kupinda kutshotshwa mndiloni ka Gehena wotshe mmidi wako.”
Kudaya wukati
(Matewu 19:1-9; Marku 10:1-12; Luka 16:18)
31“Ti wombilwe kambe va txi kha vona: ‘Awule a tovelako msikati wakwe, a na mu ninge dipasi da kum'sengula.’ 32Aniko ani ni khani: Awule a tovelako msikati wakwe, hahanze ka kuva a sa tekana nayo ngu mlayo, a mu mahisa wugelegele; se awule a tekanako ni wu a nga tovelwa, a maha wugango.”
Sixambanyo
33“Mi ti engisile kambe ati ti nga wombwa ka vakale va txi kha vona: ‘U nga thuke u tshumelela msana kuxambanyani kwako, aniko veketa ati u nga xambanyela Mkoma.’ 34Kasi ani ni khani: Mi nga xambanyeni ni ka kudotho. Mi nga xambanyeni ngu nzuma, nguko njikhalo txa wukoma txa Txizimu. 35Mi nga xambanyeni ngu mafu, nguko njikhigetelo txa mikondo yakwe. Mi nga xambanyeni ngu Jerusalema, nguko ndidhoropa da mfumeli wa hombe. 36U nga xambanye ni ka kudotho ngu msungo wako, nguko khwa ningwa mtamo wa kuhindula hambi msisi wumwewo wu txi maha wo basa mwendo wa mtima. 37Kambe kuwomba-wombani kwanu, ‘Ina’, a nave i di ‘Ina’, ‘Ahim-him’ a nave i di ‘Ahim-him’; totshe ti ti engetelwako ka tiya, ti huma ngu ka m'bihi.”
Ku ti photela
(Luka 6:29-30)
38“Mi ti engisile atiya ti nga wombwa va txi kha vona: ‘Diso di na dihwa ngu diso, dikwasa, ngu dikwasa.’ 39Aniko ani ni khani kwanu: Mi nga lambeleni m'thu wo biha, ngako m'thu a txi ku haphata mpama ka dithama da txinene, tshembereka u txi ningetela dimwani. 40Ngako m'thu a txi kumangala ngu kulava ku kutekela dibhaji, mu ninge ni dona dijasi. 41Ngako m'thu a txi kukurumeta ku mu heleketa mnava wumwewo, mu helekete minava yimbidi. 42Mu ninge awu a ku kombelako, ani wu a lombako txomaha kwako, u nga mtshuralele.”
Kuranda valala
(Luka 6:27-28,32-36)
43“Mi ti engisile ati ti nga wombwa va txi kha vona: ‘U na randa muakelani wako, u txi vengela mlala wako.’ 44Aniko ani ni khani: Randani valala vanu, mi txi khongelela avale va mi xanisako. 45Ngako mi txi maha tiya, mi na va vanana va Tate wanu a ku nzumani; nguko nene wa humisela ditambo vavanene ni vo biha, ni kumaha ti to nzuma yi txi nela vo lulama ni vo mbi lulama. 46Nguko, ngako mi txi randa ava va mi randako dwe, ditshungulo muni mi na ku di mana kani? Hi nga toneto va ti mahako ni vona vakhupisi kani? 47Ngako mi txi losa vananu vokha, nji txani mi txi mahako txo pala vamwani kani? Ina vamatiko kha va ti mahi toneto ni vona kani? 48Ngu kota yeto, mahani vo hetiseka nga ti nene Tate wanu wa nzumani i ku wo hetiseka.”
Currently Selected:
Matewu 5: BEC2016
Highlight
Share
Copy
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.