Matewu 3
3
Mapswi a Johani M'bhabhatisi
(Marku 1:1-8; Luka 3:1-9,15-17; Johani 1:19-28)
1Ka ale masiku, ku humelete Johani M'bhabhatisi e txhumayela txiwulani ka Judheya, 2#Wona ni ka: Mat. 4:17; Mar. 1:15. a txi khene:
“Hundulukani, nguko wu hafuhi Mfumo wa nzumani.”
3Johani ngene wu a nga wombwa ngu mprofeti Isaya, a txi khene:
“Dipswi da wu a huwelelako txiwulani di kha dona:
Longiselani nzila ya Mkoma
lulamiselani magondo akwe.”
4Ene Johani a ti ambate tinguwo to mahwa ngu madhowo a makamelu, e sunga libhande la didhowo txiwununi. Sakudya sakwe i ti humbi ni wulombe wa txitinga. 5Se va txi huma veya kwakwe vathu va Jerusalema ni va dotshe ditiko da Judheya ni va wotshe wukhalo wa Jordhani. 6Va txi bhabhatiswa ngu ngene mnamboni ka Jordhani, va txi ti tshanza sionho sawe.
7Mbimo yi a nga wona Vafarisi ni Vasadhusi va txi lava ku ta bhabhatiswa ngu ngene, a txi khene kwawe:
“Lixaka la timamba#3:7 Timamba: Lixaka la minyoka ya tshofu ngutu, yi txi luma m'thu kha sweli kufa. i mani a nga mi laya, ti to mi thava txiviti txi txi tako kani? 8Humisani mihando yi yi dinganako kuhunduluka kwanu; 9mi nga ti kanganyiseni mi txi khanu: ‘Hi ni tate wathu Abrahamu’, nguko na mi gela ti to Txizimu txa sikota kuhindula marigwi awa ma txi maha vanana va Abrahamu. 10#Wona ni ka: Mat. 7:19. Kambe ndzanga yi vekilwe ha mikolotini ka mindonga. Ngu toneto, mndonga wuhi ni wuhi wu si velekiko mihando ya yinene, wu na gangwa wu tshotshwa ha mndiloni. 11Ani ni bhabhatisa ngu mati kasiku mi sikota kutilaya, kambe awule a tako msana kwangu, ana ni mtamo kupinda ani, se ani kha ni nga ni fanelo yo ñola hambi tikathula takwe. Ene a na mi bhabhatisa ngu Moya wo Sawuleka ni mndilo. 12Manzani kwakwe a ni txiselo, a na hiyela txithathe txakwe, se a na sengeleta fulaho yakwe txisangalani, aniko makamba a na ma hisa ngu mndilo wo mbi timeka.”
Kubhabhatiswa ka Jesu
(Marku 1:9-11; Luka 3:21-22)
13Sekoko ka yoneyo mbimo, Jesu a tile ngu Galileya e ta manana ni Johani Mubhabhatisi, mnamboni ka Jordhani, kasi ku ta bhabhatiswa ngu ngene. 14Aniko Johani a to lamba a txi khene:
“Ani ngani ni fanelako kubhabhatiswa ngu ngawe, se awe u ta kwangu kani?”
15Kambe Jesu a to mu xamula a txi khene:
“Konakuwa ti leke eto, kulaveka hi txi londetela totshe ti hi fanelako ku ti maha.”
Se Johani e mu tumelela.
16Jesu msana ka kuva a di bhabhatisilwe a to huma ngu matini. Konako, nzuma yi to tuleka, se Jesu e wona Moya wa Txizimu, wu nga ti relela nga dituva txitimwi kwakwe. 17Sekoko, kupfala dipswi da kuta ngu nzumani, di txi kha dona:
“Awuwa i Mwanana wangu wo randeka, awu ni tsakiswako ngutu ngu ngene.”
Currently Selected:
Matewu 3: BEC2016
Highlight
Share
Copy
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.