MATIUS 2
2
Mian-mian molubat doi Tolopot
1Yesus nasinuungan doi kota Betlehem doi lipu Yudea doiya kosinggatoo Herodes nabapamarentaan. Doiya kosinggatoo daano komoimoiya komian mopandoiy kitayo komandala doi tolopot motokita doi Yerusalem. 2Yanila mansadai doi inde-indee komiano, “Inaando kai do paudoo, mo sosuung teali Yahudi miano natomundo? Kami kitayo Komandalano sumbut doi tolopot taalikon, tukon kami lubat mososubaiyo Yana.”
3Sambuno Tomundo Herodes lengele langgedoo, yana masaingding tuuno, bunomo lakon sasaibino ko Yerusalem miano. 4Maka yana sumboliiyo koimam kapalano tukon guru-guru agama Yahudi miano nalubat pototongi. Maka sadaiyo doi yanila, “Doi naando kona tosuungan do Tomundodoo Mian Bisa mo paradandikene?”
5Yanila timbiliyo, “Doi kota Betlehem doi lipu Yudea. Baikon sabab buno naiya daano komeeng konabi motulise,
6 #
Mik. 5:2
‘Komuyu Betlehem miano, doi lipu Yehuda,
komuyu tutuuno bolikon mian mo poi-poisik doi mian bailon doi kota-kota moutama doi Yehuda.
Sabab luwedoi koomo naikon kona lubatan komeeng kokatua
naikon mo katuayo Daku umat Israel.’ ”
7Sambuno lapa malaat do katalanganoo, Herodes uange domianoo mopandoiy mokita mandala doi tolopot tukon laasiakanggene. Maka yana sadaiyo doi yanila indee kosinggatoo do mandaladoo natambunan tokita. 8Sambuno lapa doiya yana sumboliiyo yanila ampakon doi Betlehem tukon bateteba, “Poampakono, poumbale do Paudoo tukon monomonondok tukon kalu komuyu posuunggenemo Yana, pobontiikanaku, sulano mau yaku kutaus sosuba doi Yana.”
9-10Maka yanila ampakono, yanila kitayo koidan domandaladoo napai kinita loolukonoo doi tolopot taalikon. Buka maen konapoo laba-labaan padungga yanila mokitayo do mandaladoo! Do mandaladoo loolukoniyo yanila, maka natade potimbang doi Paudoo nadungolan bunggono. 11Yanila usok doi bonuadoo lalomo yanila kitayo do paudoo tukon tinano Maria. Yanila tootukuiyo tukon sosubaiyo do Paudoo, maka yanila bukayo konapo mangabosan buat, tukon mososubakon doi Yesus, mosoni, kemenyaan, tukon pobilat. 12Mian Bisa ingotiikene yanila doi napoo monii lalomo inai napo abali doi Herodes. Jadi yanila mule loloiyo kololoon bailon.
Dampas doi Mesir
13Sambuno do mianoo mopandoiy mokita mandala paloosano tauso, do Temenenodoo namalaekat batokitakon doi Yusuf doi namonii lalomo. Malaekatoo bantile, “Herodes kona tetel umboliiyo do paudoo sulano naakateyo. Tobikon doiya banguno, babayo do Paudoo tukon Tinano podampas doi Mesir. Podungolo imbali tukon mototiili nadaano Daku bantilan koidan doi komuyu.”
14Yusuf polaing bangun, tukon do popookoo yana taus babayo do Paudoo tukon Tinano yanila dampas doi Mesir. 15#Hos. 11:1 Yanila dungol doi Mesir sampe Herodes mate.
Bunomo doiya kona tealian indee komo lapamo Temeneno bantile lolo doi Nanabi mopelenggene, buno naiya, “Yaku uange Daku Pau luwedoi Mesir.”
Labuk-labuk nainakatean
16Sambuno Herodes toiyo baikon do mianoo mopandoiy mokita mandala paloosano doi tolopot taalikon yanila mokala-kalaiyo yana, yana nggimal tuuno. Maka yana bintekene sulano nainakate sasaibino kopau-pau malaneno mo umur lua kotaun doi bilit doi Betlehem tukon kampung-kampung bailon mopokolanikon. Doiya pokokonoi do mianoo mopandoi mokita mandala paloosano nabantilano yana molaate tempono do mandaladoo natokitaan.
17Bunomo doiya kona tealian indee komo sidutu Nabi Yeremia bantile doiyamo,
18 #
Yer. 31:15
“Doi Rama tololongol komandaungan alalo,
kobebean tukon kokiilan.
Rahel mandaunggene kona labuk-labuk;
yana aki nayase inoluuliy sabab dona labuk-labuk kiyono.”
Abali luwedoi Mesir
19Sambuno Herodes mate, Yusuf daano doi Mesir meeng do Temenenodoo Namalaekat batokita doi Yusuf doi namonii lalomo. 20Malaekatoo bantile, “Domianoo mo yase akateyo do Paudoo yana matemo. Tobikon doiya banguno, babayo do Paudoo koidan tukon Tinano poabalimo doi Israel.” 21Yusuf bangun maka kanggiyo do Paudoo tukon Tinano yanila abali doi Israel.
22Boobus doibundu Yusuf lengele Arkelaus, Herodes namalane soboliyomo kotamano moteali tomundo doi Yudea. Jadi Yusuf matakut komo ampakon indaa. Sambuno yana malaat pongotunggul molobian doi Temeneno doi namonii, yana ampakon doi meeng kolipu doiyamo Galilea. 23#Mrk. 1:24; Luk. 2:39; Yoh. 1:45 Idoo yanila dungol doi meeng kolipu mo sinombuikon Nasaret. Tobikon bunomo doiya maka teali indee komo lapamo nabi-nabi bantile kokaliangano do Paudoo: “Yana binantil Nasaret Miano.”
Currently Selected:
MATIUS 2: LAIBGZ
Highlight
Share
Copy
Want to have your highlights saved across all your devices? Sign up or sign in