Matiu 2
NTBEP

Matiu 2

2
Tomata Alo mampeliꞌ Iesu
1Iesu rapoánáka i wánuá Beteleme i tampoꞌ Iudá, i tempóna Datu Herode Mahile#2:1 Datu Herode Mahile: Ara bahangapa datu to rahangaꞌ Datu Herode. Básá to teukiꞌ i Kahirámpuá Laluita i taleuꞌ. mepárentá. Tempó iti, araheꞌ bahangapa tauna to haweꞌ i kótá Ierusale hangko i tampoꞌ to karaoꞌ tándáꞌ i mata alo. Tomata Alo iti moisá ntepuꞌuheꞌ mampeita tandaꞌ i betue. 2Mekuneꞌ-kuneꞌheꞌ i tauna to toroꞌ i Ierusale, rauliꞌ, “Iumbá Ánángkóiꞌ to hangko mesupaꞌ, to ina mewaliꞌ daturaꞌ toIahudiꞌ? Kiꞌita miꞌi betue tándáꞌ i mata alo to mopakanótó kamesupaꞌna miꞌi Ánángkóiꞌ iti.#2:2 Hangkoia ara to nauliꞌ nabiꞌ Bilea kana i betue to ina haweꞌ hangko i Iako. To natunggái ia miꞌi pemuleꞌána Iako to ina mewaliꞌ Datu Topehómpóꞌ. Básá Poimbaꞌ 24:17. Onoꞌ miꞌi haneꞌi maiangkaiꞌ, láwiꞌ kipoinao menómbá i Hia.”
3I kanahádina peá Datu Herode bámbári iti, napokalááꞌ, noꞌonoꞌ woꞌo upu-upu tauna to i Ierusale.#2:3 Upu-upu tauna i Ierusale mampakalááꞌ apa to ina nabábehi Herode, láwiꞌ paka mopapate tauna to napekiri ina moala kadatuána. Ia mopapate miꞌi hadua toinána, bahangapa ánáꞌna hai tauna ntániꞌna. 4Hangko ionoꞌ, ia mokióꞌ upu-upu kapalaꞌ tadulako menómbá hai guru-guru agama Iahudiꞌ, bona hirámpuheꞌ. Kahirámpuraꞌ, mekuneꞌ miꞌi Datu Herode i hira, nauliꞌ, “Ambiꞌ iumbá karapoánákaꞌána Datu Topehómpóꞌ to nadándi Pueꞌ Ala hangkoia?”
5Mehániꞌheꞌ, rauliꞌ, “I wánuá Beteleme i tampoꞌ Iudá, láwiꞌ ara miꞌi laluitana Pueꞌ to naukiꞌ nabiꞌ Mika hangkoia,#2:5 Nabiꞌ Mika moukiꞌ wátiꞌ deꞌe rekeꞌ-rekeꞌna pitu átuna lima puloꞌna parena hangko tiꞌara mani Iesu rapoánáka (750sM). to manguliꞌ node:
6‘Wánuá Beteleme i tampoꞌ Iudá,
tiꞌarapokoꞌ ina rauliꞌ wánuá to tepakóika
hangko i oloꞌna upu-upu wánuá to ara i tampoꞌ Iudá,
láwiꞌ hangko i hio ina mesupaꞌ hadua Tadulako Mahile
to ina mokádipurá taunáNgkuꞌ toSáráeliꞌ.’ ” (Mika 5:2)
7I kanahádina peá Herode, nahuoꞌmoheꞌ taunána lao mokióꞌ Tomata Alo bona tiꞌara raisá tauna ntániꞌna. Nakuneꞌheꞌ impirá katoꞌuána betue iti mantepuꞌu mesupaꞌ. 8Rooheꞌ mehániꞌ, nahuoꞌmoheꞌ lao i Beteleme, nauliꞌ, “Nipeliꞌ mpiiꞌ Ánángkóiꞌ iti. Ane nilámbiꞌi, maiaꞌ nihángáꞌá, bona laoaꞌ woꞌo menómbá i Hia.”
9-10Lao mpuꞌumoheꞌ. I tangaꞌ rárá, góeꞌ ntepuꞌuheꞌ moita wopiꞌi betue to raita iaꞌo tándáꞌ i mata alo. Betue iti mampoioruáheꞌ duuꞌna haweꞌ i wongko katoroꞌána Ánángkóiꞌ iti. 11Kahaweꞌraꞌ, mesuaꞌheꞌ i lalu támbi. Kamoitáraꞌ Ánángkóiꞌ iti hai Maria inána, liliuheꞌ molingkudu motóngkóꞌ haweꞌ i tampoꞌ menómbá i Ánángkóiꞌ iti. Roo onoꞌ, mobungkáhimoheꞌ inántiraꞌ haneꞌi mohuhuꞌheꞌ popenómbáraꞌ i Hia. Popenómbáraꞌ iti ia miꞌi buláwá, dupaꞌ hai mire.#2:11 mire: lana to mawongi hai masuliꞌ hólóna, to rabábehi hangko i liteꞌ kau. Rapakeꞌ mominaꞌ-minaꞌi tomate, hai mewaliꞌ woꞌo pákupu. 12Roo onoꞌ, napaingáꞌimoheꞌ Pueꞌ Ala moliu patururaꞌ bona ineeꞌmoheꞌ mesuleꞌ lao i Datu Herode. Onoꞌ miꞌi haneꞌi tiꞌarapoheꞌ lao huleꞌ i Ierusale, agáiáná mesuleꞌheꞌ lao i tampoꞌraꞌ mouláꞌ rárá to ntániꞌna.
Iusupu moánti Maria hai Iesu lao i tampoꞌ Másiriꞌ
13Kapesuleꞌraꞌ Tomata Alo, mampatongawaꞌ wopiꞌi malaꞌekana Pueꞌ i Iusupu moliu paturuna. Nauliꞌ malaꞌeka iti, “Iusupu! Herode ina mampeliꞌ Ánángkóiꞌ iti láwiꞌ napoinao napapate. Mearómokoꞌ, nuánti miꞌi Ánángkóiꞌ iti hai inána lao i tampoꞌ Másiriꞌ! Toroꞌmokou sieruꞌ ionoꞌ duuꞌna molaluita wopaꞌAꞌ i kómu.”#2:13 Pelangkaraꞌ lao i tampoꞌ Másiriꞌ ina mampopambuhinaoá toIahudiꞌ pelimbáraꞌ toSáráeliꞌ hangkoia lao i Másiriꞌ i tempó rimi. (Básá Pewaliꞌána gáláꞌna ka-46.)
14Káindi iti woꞌo, mearó mpuꞌu miꞌi Iusupu, moánti Iesu hai ináNa lao i tampoꞌ Másiriꞌ. 15Toroꞌheꞌ ionoꞌ duuꞌna Datu Herode mate.#2:15 Datu Herode mate wulá katálu ba wulá kaꞌiba pare 4sM.
Upu-upuna iti mewaliꞌ bona tepabukeꞌi miꞌi Ngkóráꞌna Pueꞌ to napahaweꞌ nabiꞌ Hosea hangkoia,#2:15 Hosea moukiꞌ iti rekeꞌ-rekeꞌna pare pitu átuna pitu puloꞌna parena hangko tiꞌara mani Iesu rapoánáka (770sM). to manguliꞌ node: “Hangko i tampoꞌ Másiriꞌ, ÁnáꞌKuꞌ Kukióꞌ mai.”#2:15 Básá Hosea 11:1. To teukiꞌ iti ina mampopambuhinaoá toIahudiꞌ noumbá Pueꞌ Ala moántiheꞌ toSáráeliꞌ mesuwuꞌ hangko i tampoꞌ Másiriꞌ hangkoia.
Ánángkóiꞌ i Beteleme rapapate
16Kanaisána peá Datu Herode Mahile karaꞌákálángina Tomata Alo, rumihi ntepuꞌu kamabukoꞌna, onoꞌ miꞌi haneꞌi ia mampohawaꞌáheꞌ surudadoꞌna lao mopapate upu-upu ánángkóiꞌ tobaleilo to rompare tinuwuꞌna haweꞌ-haweꞌ i ánáꞌmpálei, to i Beteleme hai i wánuá-wánuá to hungkuꞌ ionoꞌ, bona Ánángkóiꞌ to ina mewaliꞌ Datu iti ina kana woꞌo rapahipapate. Nabábehi noꞌonoꞌ láwiꞌ napekuneꞌ miꞌi i Tomata Alo, onoꞌ miꞌi haneꞌi naisá ntepuꞌu impirá pesupaꞌána betue iti.#2:16 Bábehiána Datu Herode iti ina mampopambuhinaoá toIahudiꞌ kana i párentána Piraoꞌ hangkoia, upu-upu ánángkóiꞌ tobaleilo toSáráeliꞌ hangaa-ngaa rapapate. (Básá Pesuwuꞌá 1:15-22.) 17{Handaꞌ pueꞌ wánuá Beteleme moteriahi ánáꞌraꞌ to rapapate surudadoꞌna Herode.} Onoꞌ haneꞌi tebukeki miꞌi laluitana nabiꞌ Ieremia#2:17 Ieremia moukiꞌ iti rekeꞌ-rekeꞌna ini átuna parena hangko tiꞌara mani Iesu rapoánáka. hangkoia {mokana wánuá Rama to hungkuꞌ i wánuá Beteleme}, to manguliꞌ node:
18“I wánuá Rama#2:18 Rama: Iti miꞌi wánuá rekeꞌ-rekeꞌna uwalu kilómete tándáꞌ i wongko Beteleme. Pare 586sM, handaꞌheꞌ toIudá to rarámpu ionoꞌ haneꞌi raꞌánti karaoꞌ lao i tampoꞌ Bábeli. Básá Ieremia 40:1. tehádi toteriaꞌ hai topetatangi.
Raheli moteriahi ánáꞌnaheꞌ#2:18 Raheli ia miꞌi toinána Iako, ináraꞌ Iusupu hai Benami. Hungkuꞌ rosábu parena hangko tiꞌara mani Iesu rapoánáka, Raheli ratawu hungkuꞌ i Beteleme. (Básá Pewaliꞌána 35:16-20.) I lalu wátiꞌ deꞌe, hangaꞌna Raheli hai wánuá Rama mosulewátái ináraꞌ upu-upu ánángkóiꞌ to napapate Herode.
láwiꞌ tiꞌarapoheꞌ ara,
onoꞌ miꞌi haneꞌi tiꞌara mau rapalindó.” (Ieremia 31:15)
Iusupu moánti Maria hai Iesu mesuleꞌ hangko i tampoꞌ Másiriꞌ
19Tangaꞌraꞌ mani Iusupu, Maria hai Iesu i tampoꞌ Másiriꞌ, mate miꞌi Datu Herode. Roo onoꞌ, haweꞌ wopiꞌi malaꞌekana Pueꞌ i Iusupu moliu paturuna. 20Nauliꞌ malaꞌeka iti, “Tauna to mampoinao mopapate Ánángkóiꞌ iti mate miꞌi. Mewaliꞌ mearómokoꞌ, nuánti miꞌi Ánángkóiꞌ iti hai ináNa mesuleꞌ lao i tampoꞌ Sáráeliꞌ.”#2:20 ToIahudiꞌ ina mambuhinao apa to nauliꞌ Pueꞌ Ala i Musa hangkoia. Básá Pesuwuꞌá 4:19. 21Liliu mearó Iusupu, moánti Ánángkóiꞌ iti hai ináNa mesuleꞌ lao i tampoꞌraꞌ toSáráeliꞌ. 22Agáiáná i kanahádina Iusupu, Akelau ánáꞌna Herode Mahile#2:22 Akelau mepárentá i tampoꞌ Iudá, Idumea hai Samaria pare 4-6sM. Ia masodo ntepuꞌu. Herode Antipa halaluna to mepárentá i tampoꞌ Galilea. mopaháwángi miꞌi umána mewaliꞌ datu i tampoꞌ Iudá, malááꞌ Iusupu mesuleꞌ lao ionoꞌ. Ánti kanapatuntuna wopiꞌi Pueꞌ Iusupu iti moliu paturuna, hangaa-ngaa laoheꞌ toroꞌ i tampoꞌ Galilea, onoꞌ miꞌi haneꞌi laoheꞌ ionoꞌ, 23hai toroꞌheꞌ i wánuá Nasare. Mewaliꞌ tepabukeꞌi miꞌi laluitaraꞌ nabiꞌ hangkoia kana i Datu Topehómpóꞌ, to manguliꞌ node: “Ia ina rauliꞌ toNasare.”#2:23 toNasare: Laluita “Nasare” tiꞌara teukiꞌ i Pototowiá to Sae. Babilaꞌ rapakeꞌ ieneꞌ moparembe bahangapa wátiꞌ to raukiꞌ nabiꞌ-nabiꞌ hangkoia to motunggái Datu Topehómpóꞌ to ina haweꞌ, ia miꞌi Iesu. Rápáꞌna, ara wátiꞌ mokana i “tumbeꞌ kau” to ina haweꞌ. I lalu básá Iberani “tumbeꞌ kau” ia miꞌi netser. (Básá Ieremia 23:5; 33:15; Sakaria 3:8; 6:12; Iesaia 4:2; 11:1-2.)

Bahasa Behoa Shorter Bible © Indonesian Bible Society, 2015.

Learn more about Sura Magasaꞌ: Bahangapa sura Pototowiá to Sae hai Pototowiá to Woꞌu