MATIUS 3
3
Yohanes Owe Bwi Bakupimtaer Ipit akoretame atakam
(Mrk. 1:1-8; Luk. 3:1-18; Yoh. 1:19-28)
1Emesare. Era barerawa, Yohanes Owe Bwi Bakupimtaer Ipit Yudea tapirmi tame apok asan aesosen. 2Are atakam akoretamen. “Allah owe aobaomep bare ere, setepnak asisiamesmara. Erarawa tare tadosa takes bamakemteteray, wanam Allah atakam ji aeay.” Emes atakam aesimen. 3Bonaknak ere, Allah atakam bakoretam ipit juas Yesaya atakam aesimtamen:
“Jipit taka, tame apok asan atakam afaketaatem. ‘Tuhan ajarto bokotpu ajasosotiiay. Era bokotam imtuuar.’ Emes atakam aesimtem.”
Yesaya emes atakam aesimen. Me Yesaya atakam akore ipit, ere Yohanes aren.
4Me Yohanes ajiimome pakaian, binatang juas unta fini pakaianen. Aasemak banam pak ere, binatang pitiniin. Me abanda pak, pikamo anama embore bwiin. 5Me Yerusalem oweam, Yudea tapirmi owe takesam, ju juas Yordan owe takesam, armat ipitpu ajukusiromesen. 6Era oweam adosa afafasimteteresen. Me Yohanesam era owe Yordan bwi akupimtaeren.
7Armat ipit, Parisi owe tananeam, Saduki owe tananeam, ajukusiromdaes aporen. Era owe, Yohanes, bwi ara bakupimtaer ajukusiromdaesen. Me Yohanes arawa, “Amber jii kosere! Tare Allah ajurusumto pak ombare baesos atakam tao esimtamen? 8Tare tadosa ambakemmakam apaye, ere Allah atakam ji aemakam, owe aporomtamay. 9Tanom, ‘Abraham darerokor,’ emes bimak binip batetaram bas. Allah, ara aemansa eka tanane, Abraham arurupis bajaorom, emes fiak pak aoemommar. 10Waa, sai, wus tamao setepkope aemapem. Jipit taka, akot eek bape apok wus, ambatiitem. Are era wus jisimak asapimapomtem. 11Dere dosa ambakemmakam owe, wanam Allah atakam ji aeemakam owe, bwi akupimtaerey. Ere tadosa ambakemmakam baporomtam are. Me defe asaramtan Ipit ere, juas aptam. Dere ere, juas apok. Erarawa dere Armat Ipit sendal baemetoomtintam asan apok. Armat Ipit, Allah Jipam, jisimakam, tara akupimtamteman. 12Armat Ipit ofepu ajatemapomum. Are amos apimi afamdaemkoromtem. Are amos, tame atoomdaetem. Me, Are era apimi jisimak ambotiitem. Era jisimak ere, baemesapiames asan apok.” Yohanes emes atakam aesimen.
Yohanes, Yesus bwi akupimtaere atakam
(Mrk. 1:9-11; Luk. 3:21-22)
13Emesare. Yesus Galilea tapirmi beken ajiose, wanam Yordan ju tapirmi aombaremen. Are Yohanes bwi Ara bakupimtaer akot ajien. 14Me Yohanes ere, “Dere bwi Wora bakupimtaer bas. Wore bwi dera bakupimtaer, ere erare. Wore ere, dera fomommanim?” Ajiepore apoken. 15Me Yesus ere, “Emesare, bwi bakupimtaeran. Emes aemtam, dare Allah akot apormar pak jipu aemtemarom.” Emes atakam aesimen. Emesare, Yohanesam Yesus atakam ji aeen. 16Me Yohanes arawa, bwi Yesus akupimtaeren. Bwi akupimtaererawa, Yesus era bwi ametekuemen. Wonamo oupam ambuemen. Yesusam Allah Jip, sakao saii tamen epiendae aporen. Are Allah Jip adamo ten andaepiape aporen. 17Allah atakam Surga oup aekorendaemen. “Ara aememar Ipit deTii. Dere Armat Ipit afaimmin. Dere Armat Ipit akotnak.” Emes atakam aesimen.
Currently Selected:
MATIUS 3: LAIASC
Highlight
Share
Copy
Want to have your highlights saved across all your devices? Sign up or sign in
@LAI 1994