MATIUS PEU INTAT HABA
PEU INTAT HABA
Kitab Matius geupeusampoe ubak geutanyoe Haba Gét bahwa Isa na kheueh Raja Peuseulamat nyang geupeu janji lé Po teu Allah. Rot Isa nyan kheueh Po teu Allah geupeu peunoh peue nyang ka geumeujanji lam Peujanjian Awai ubak umat Gobnyan. Bahpih Isa lahé nibak keuluwarga ureuëng Yahudi dan udeb sibagoe ureuëng Yahudi, Haba Gét nyan bukon kheueh keu bansa Yahudi mantong teuma keu bansigom donya.
Kitab Matius nyoe teususon seucara teu-atoe; phon nibak lahé Isa, óh lheueh nyan keuhai pumanö dan godaan nyang geurasa keudroe, laju sampoe ubak karya Gobnyan di Galilea. Disinan Gobnyan geukhutubah, geupeurunoe dan geupeu puléh gob. Óh lheueh nyan kitab nyoe meuasoe teuma keuhai meuneujak Isa nibak Galilea u Yerusalem, dan peue nyang teujadi deungon Isa bak watée akhé aleuhat lam udeb Gobnyan ateueh rhueng donya nyoe dan sampoe ubak watée maté dan Geubeudôh teuma.
Sapeue-peue hai nyang geutitek brat lé Matius na kheueh bahwa Isa na kheueh Gurée rayeuk, dan geupurunoe bahwa Allah geumat peurintah sibagoe Raja. Isa na teuma wibawa keu geupeu trang keuhai makna Huköm Allah. Leubeh lé nibak ajaran-ajaran Isa nyan teukeulompok meunurot pokok-pokok jih. Na limong boh keulompok: (1) Khutubah di Bukét nyang meumakna sikeueb, keuwajéban, hak-hak, dan tujuan udeb bandum anggota umat Allah (Pasai 5-7); (2) peutunyok-peutunyok ubak ban dua blaih murit Isa keu jipeubuet tugaih (Pasai 10); (3) keuhai miseue-miseue lagée keuadaan watée Po teu Allah geumat peurintah sibagoe Raja (Pasai 13); (4) ajaran keuhai makna jeuet keu murit Isa (Pasai 18); dan (5) ajaran keuhai jamén dan keuhai teuka Aneuëk Manusia (Pasai 24-25).
Asoe jih
Dafeutar asai usui Isa Almaseh dan keuhai lahé Gobnyan 1:1–2:23
Meuneubuet Yahya Pumanö 3:1-12
Pumanö dan godaan ateueh Isa 3:13–4:11
Peulayanan Isa nibak teungoh-teungoh masyarakat Galilea 4:12–18:35
Nibak Galilea u Yerusalem 19:1–20:34
Akhé aleuhat di Yerusalem dan silingka nyan 21:1–27:66
Keuhai Isa geubeudôh dan geupeuleumah droe Gobnyan 28:1-20
Currently Selected:
MATIUS PEU INTAT HABA: LAIACE
Highlight
Share
Copy
Want to have your highlights saved across all your devices? Sign up or sign in
Old and New Testament in Today's Aceh Language @ LAI, 1997.