SEFANIA 3
3
Katlholo le tsholofetso ya Jerusalema
1A bo go latlhega ene yo o serukhutlhi yo o itshekologileng, e bong motse o o patikang! 2Ga o a ka wa utlwa lentswe; ga o a ka wa amogela thuto; ga o a ka wa ikanya mo go Jehofa; ga o a ka wa atamela Modimo wa one. 3Dikgosana tsa one mo gare ga one ke ditau tse di dumang; baatlhodi ba one ke matlonkana a lotlatlana; ga a sadisetse moso sepe. 4Baperofeti ba one ke batho ba ba bofafalele ba bonongwana, baperesiti ba one ba tlhapaditse felo ga boitshepo, ba sokile molao. 5Jehofa o tshiamo mo gare ga one; ga a ketla a dira boikepo; o tle a ntshetse katlholo ya gagwe mo leseding ka meso le meso, ga a tlhaele; mme basiamolodi ga ba itse ditlhong.
6“Ke kgaotse merafe, dikago tsa yone tsa tlhabanelo tse di godileng di swafetse; ke kgakgabaditse mebila ya bone, go bo go se na ope yo o fetang; metse ya bone a sentswe, go bo go se na motho, go se na monni. 7Ke rile: O tlaa bo o mpoifa o tlaa amogela thuto; jalo bonno jwa one bo ne bo se ketla bo kgaolwa, ka fa go tsotlhe tse ke di o laoletseng; ba ne ba phakela ba senya ditiro tsotlhe tsa bone.
8“Ke gone, ntetang,” go bua Jehofa, “go tsamaya letsatsi le fitlha le ke tlaa nanogelang thopo ka lone; gonne boikaelelo jwa me ke go phutha merafe, gore ke kokoanye magosi, go tla ke gorometsa tšhakgalo ya me mo go one, e bong bogale jwa me jotlhe jo bo fisang; gonne lefatshe lotlhe le tlaa lailwa ke molelo wa lefufa la me.
9“Gonne foo ke tlaa fetolela ditšhaba puo e e itshekileng, gore ba bitse leina la ga Jehofa, go tla ba mo direla ka tumalano e le ngwe fela. 10Barapedi ba me, e bong morwadia bafaladi ba me, ba tlaa lere tshupelo ya me, ba tswa kwa moseja ga dinoka tsa Ethiopia.
11“E tlaa re mo motlheng oo ga o ketla o tlhajwa ke ditlhong ka ditiro tsotlhe tsa gago, tse o tlodileng fa pele ga me ka tsone; gonne foo ke tlaa tlosa mo gare ga gago babelafadi ba gago ba ba gwantang, mme ga o ketla o tlhola o nna boikgodiso mo thabeng ya me e e boitshepo. 12Ke tlaa tlogela mo gare ga gago batho bangwe ba ba patikegileng, le ba ba humanegileng, mme ba tlaa ikanya leina la ga Jehofa. 13 Masalela a Iseraele ga a ketla a dira boikepo, le fa e le go bua maaka, loleme lo lo tsietsang ga lo ketla lo fitlhelwa mo melomong ya bone; gonne ba tlaa ja ba robala, mme ga go na ope yo o tlaa ba boifisang.”
Sefela sa boitumelo
14Opela, wena morwadia Sione;
thela lošalaba, wena Iseraele;
o ipele o itumele ka pelo yotlhe
wena morwadia Jerusalema.
15Jehofa o tlositse
ditshekiso tsa gago;
o lelekile mmaba wa gago;
kgosi ya Iseraele, e bong Jehofa
o mo gare ga gago;
ga o ketla o tlhola o boifa bosula.
16Mo motlheng oo
go tlaa rewa Jerusalema go twe:
“O se ka wa boifa, wena Sione,
a diatla tsa gago di se repe.
17Jehofa Modimo wa gago
o mo gare ga gago,
e le mothata yo o tlaa bolokang;
o tlaa go itumelela ka boitumelo,
o tlaa ritibala
mo loratong lwa gagwe,
o tlaa go dudueletsa ka kopelo.”
18“Ke tla phutha
ba ba hutsafalelang
phuthego e e masisi,
ba e neng e le ba gago;
ba mokgweleo o o mo go ene
e neng e le kgobo mo go bone.
19Bonang,
e tlaa re ka motlha oo
ke tlaa tsena mo mafokong
a botlhe ba ba go patikang;
mme ke tlaa phutha ene
yo o ne a lelekilwe;
ke tlaa ba dira pako le leina,
e bong bone ba ditlhong tsa bone
di ntseng di le mo lefatsheng
lotlhe.
20Mo motlheng oo
ke tlaa lo lere mo teng,
mo motlheng oo ke tlaa lo phutha;
gonne ke tlaa lo dira leina la pako
mo ditšhabeng tsotlhe tsa lefatshe,
mogang ke lo busang
mo botshwarong
fa pele ga matlho a lona,”
go bua Jehofa.
Currently Selected:
SEFANIA 3: TSW08NO
Highlight
Share
Copy
Want to have your highlights saved across all your devices? Sign up or sign in
© Bible Society of South Africa 1992. Used with permission. All rights reserved.