Mat 3
3
Ũtavany'a wa Yoana Mũvatisi
(Mk 1.1-8; Lk 3.1-18; Yoa 1.19-28)
1Ĩvindanĩ yĩu Yoana Mũvatisi nĩwaendie weũnĩ wa Yutia na ambĩĩa kũtavany'a ayasya atĩĩ, 2#Mat 4.17; Mk 1.15 “Ĩlilei kwondũ wa naĩ syenyu, nũndũ ũsumbĩ wa ĩtu nĩ mũthengeeu!” 3#Ĩsa 40.3 Ũũ nĩwe ũla mwathani Ĩsaia wawetaa yĩla waisye:
“Ve mũndũ ũkũneena weũnĩ na wasya mũnene ayasya,
‘Seũvĩsyai Mwĩai nzĩa, na mũilũngalya kũla eĩsĩla!’ ”
4 #
2Asu 1.8
Yoana eekĩĩte ngũa yaseũvĩtw'e na w'ĩa wa ngamĩle, na akeyova mũsivi wa kĩthuma kĩnyunyunĩ. Lĩu wake waĩ ngie na ũkĩ wa nzũkĩ wa kĩthekanĩ. 5Andũ aingĩ mũno nĩmaendie vala ũĩ maumĩte Yelũsalemu, na Yutia, na isio ila syĩ ũtee wa Ũsĩ wa Yolotani. 6Nĩmaumbũlile naĩ syoo, nake amavatisĩa Ũsĩnĩ wa Yolotani.
7 #
Mat 12.34; 23.33 Yĩla Yoana woonie Avalisi na Asatũkai aingĩ mokĩte kũvatiswa nĩwameie atĩĩ, “Inyw'ĩ andũ nzeleke ta nzoka! Nũũ ũla ũmũkanisye mũkĩe ũsilĩlo ũla wũkĩte kuma kwa Ngai? 8Onany'ai kwa meko maseo kana nĩmwĩlilĩte kwondũ wa naĩ syenyu. 9#Yoa 8.33 Mũikambĩĩe kwĩana atĩĩ, ‘Avalaamu nĩ ũmae waitũ!’ Ekai nĩmũtavye, Ngai e na ũtonyi wa kũalyũla mavia aa makatw'ĩka nzyawa sya Avalaamu! 10#Mat 7.19 Oyu tũĩ ĩthoka nĩyĩkwetwe yelekelw'e ĩtinanĩ ya mũtĩ. Kwoou mũtĩ ũla ũtasyaa ũsyao mũseo nũũtemwa na ũyĩkw'a mwakinĩ. 11Nyie nĩmũvatisa na kĩw'ũ ta wonany'o wa kana nĩmweelila kwondũ wa naĩ syenyu, ĩndĩ mũndũ ũla wũkĩte ĩtina wakwa nĩ mũnene mũno kwĩ inyie, o na ndyaĩlĩtwe nĩ kũkua iatũ syake. Ũsu akamũvatisa na Veva Mũtheu na mwaki. 12Kw'okonĩ kwake nũkwete kĩndũ kya kũũlũkya, aũlũkye nganũ ĩvathũkane na mavuti. Akoombany'a nganũ amie ĩkũmbĩnĩ, ĩndĩ mavuti akamavĩvya na mwaki ũtavoaa.”
Kũvatiswa Kwa Yesũ
(Mk 1.9-11; Lk 3.21-22)
13Nĩvo ĩndĩ Yesũ waumie Kalilii athi Ũsĩnĩ wa Yolotani akavatiswe nĩ Yoana. 14Yoana nĩwatatie kũlea kwa kũmwĩa atĩĩ, “Nyie ninyie naĩlĩte kũvatiswa nue; ũtonya ata kũka vala nĩĩ ngũvatise?”
15Ĩndĩ Yesũ amũsũngĩa amwĩa atĩĩ, “Eka kwĩthĩwe ũu ũmũnthĩ, nĩkwĩthĩwa kwa nzĩa ĩsu twĩĩthĩwa tweanĩsya kĩla Ngai ũkwenda.” Kwoou Yoana nĩweetĩkĩlile kũmũvatisa.
16Yesũ avatiswa nĩwaumie kĩw'ũnĩ mĩtũkĩ, na oona ĩtu yavingũka, na Veva wa Ngai atheete ta ĩvũĩ na amũvũĩla. 17#Mwa 22.2; Sav 2.7; Ĩsa 42.1; Mat 12.18; 17.5; Mk 1.11; Lk 9.35 Nĩvo ĩndĩ wasya weew'ĩkie kuma ĩtunĩ ũkwasya atĩĩ, “Ũũ nĩwe Mwana wakwa mwendwa, na nĩnendeeaw'a mũno nĩwe.”
Currently Selected:
Mat 3: KAMBA
Highlight
Share
Copy
Want to have your highlights saved across all your devices? Sign up or sign in
BIBLE SOCIETY OF KENYA © 2011