YouVersion Logo
Search Icon

Maatiyoosi 2

2
Xojjenee Hiddechinaꞌo Aabi-keyo Waanee Womo
1Heroodisi Yihudee showooch taateꞌi bi beetaa, are showooch beeti Beetilehemi katemooch Yesuusi shiijjehe. Arooba xojjenee hiddechinaꞌo aabi-keyoochee Yerusaalem waaꞌi, 2“Katinoon shiijjeti Ayihudeenaꞌochi taatoo aabiichiye? Bi xojjenoon aabi-keyoochaa beeggaꞌa, biich goyinneya waato noone” iyeete.
3Taatoo Heroodisi ishin waayeꞌi keqqiye; wotta Yerusaalem beetinaꞌo bulliyoo keqqiyeete. 4Aroochee Heroodisi qeeshee ukkireenaꞌonaa Muusichi Sheeree dojjechinaꞌonon kiciꞌi, “ ‘Kiristoosi shiijjemmone’ getteeto, aabiichiye?” iꞌi echehe.
5-6Boonoshiyoo ishichiyeete: “Yihudee showooch beeti Beetilehemiye;
‘Hini Yihudee showooch beeti Beetilehemi asheenaꞌote,
ta macceenaꞌo tuneti Israꞌeeleenaꞌon quyemmi woraaferashoo
ittoshi daggoochee kechemmone;
ebich Yihudee showooch beeti katemeenaꞌoyee
ittoshi katemoo cir shappaachemmone’#Mik. 5:2
iꞌi Yeeri gettiton keemecho kooritone” iyeete.
7Ebiyee gubb, Heroodisi xojjenee hiddechinaꞌon aashoona ceekkiiꞌi xojjeno bekketi aaboon boonoshi waanee manjii echee waayehe. 8Aroochee boonoshin Beetilehem ishichiꞌi daachiihe: “Hamiree bushoo beeti xaaꞌoon nibboona qaawibote; ittoshi danegaata, waaree taach getote; tawoo hamiree biich goyinnemmo taane” iye.
9-10Boonoshiyoo ishin taatoo waanee boonoshi waayetoyee gubb, tiyiꞌi hammiyeete. Aabi-keyoochaa boonoshi beeggiti xojjenoon wochinnoon beeggiꞌi oogichii emiriyeete; boonoshich bekkeebee gaggeroo beeti xaaꞌooch waa bi neexemmi wottoon boonoshin yaabii beehe. 11Are kexooch giyiꞌi bi indee Maariyamina tookkii beeti gaggere bushoon beeggiyeete. Yittiꞌinoo biich goyinneheete; boonoshi saaxenoon qechiꞌi aachoon, ixaanoonaa hareboonon kichii immiyeete.
12Ebiyee gubb, Yeeri gumona “Wotteree Heroodis waan hammaahote” iꞌi bi gettitoyich, bare gommona boonoshi showooch wotteꞌi hammiyeete.
Gibitsee Showooch Maxxo
13Xojjenee hiddechinaꞌo hammitoyee gubb, Doonochi maraakoo gumona daneꞌi, Yooseefin “Heroodisi hini gaggere bushoon wuxiyoyich qaawii beetone; ebich tiyiree gaggeroonaa bi indeenon yeshiree, Gibits maxxebe; neech ta gettemmi wottoon, arooch kotebe” iye.
14Ebina Yooseefi tiyii gaggeroonaa bi indeenon yechiꞌi, xumoona Gibits maxxehe; 15Heroodisi qitimmi wottoon arooch kotehe. Ebi tuneto, Doono keemechochi noonoona, “Ta Bushoon Gibitsee ceeggoye”#Hos. 11:1 iꞌi bi gettito ceennemmoyichiye.
Taatoo Heroodisi Gaggereenaꞌon Wuxiyoo
16Heroodisi xojjenee hiddechinaꞌo biin dawushoon ariiꞌi oogichii kaarehe; xojjenee hiddechinaꞌon manjii bi echee waayeti aaboon shalligiꞌi, bi ginechinaꞌon daachii Beetilehemi katemoonaa bi katinoonooch shiijjeti gutte natonaa gutte natoyee deshina tuneti gaggere anaami bushiisheenaꞌon wuxiihe. 17-18Arooba Yeerichi keemechi Erimiyaasina,
“Eefonaa wodde bunnee qaaroona
Raami katemooch waayeehe;
Raaheeli bi bushiishoyich eeppahane;
bi bushiisheenaꞌo qititoyich, goggoon hakkaaneene”#Erim. 31:15
ii bi gettito ceenniye.
Gibitsee Showoochee Wotto
19Heroodisi qititoyee gubb, Doonochi maraakoo Gibitsaa gumona Yooseefina daneꞌi, 20“Bushoon wuxiya qaawitinaꞌo qititinaꞌone. Tibe, bushoonaa bi indeenon yeshiree Israꞌeelee showooch wotteree hambe” iye.
21Ebich Yooseefi tiyii bushoonaa bi indeenon yechiꞌi Israꞌeelee showooch wottee hammiye. 22Arikaliyoosi bi nihoo Heroodisichi keroon Yihudee showooch bi taatoon waayeꞌi, arooch hamon shattiye. “Yihudee showooch hammaahine” immi gumon beeggiꞌi Galiilee showooch hammii, 23Naazireeti katemooch kotehe. Ebich Yeerichi keemechinaꞌona “Kiristoosi Naazireetecho getteyemmone” iꞌi bi gettito ceenniye.#Maar. 1:24; Luqa. 2:39; Yowa. 1:45

Currently Selected:

Maatiyoosi 2: KBRC

Highlight

Share

Copy

None

Want to have your highlights saved across all your devices? Sign up or sign in