Matiu 2
2
NA SOPENA 2.
1Me na rani hi Iesu momalua me Petlehem hi Jutia me na rani hi Herot na moli, te valura tajua taha lolorani temajuri me na lihohina maso momaraha ae tenumai me Jerusalem, 2teaso, Na Moli hi ra Ju momalua tau monie veae? suria amamarena pilana vitiu me na liho hi na maso momaraha ae, tau amamanumai sura lotu mea. 3Tau Herot na moli morohoe tau momamahanu, inie me ra tajua vunuvunu me Jerusalem mono. 4Tau moaso huhurera varese hi na lotu me ra tajua hi na uli pepe, motuhara Na Kristo imalua veae. 5Tau teaso ta mea, Me Petlehem hi Jutia: suria na provet moulia pale a,
6Iniho Petlehem, vanua i Juta,
Osataiti hi ra moli hi Juta,
Suria te varese itea imalua meho,
Inie na moli hi Israel ra uluo hiu.
7Tau Herot moaso pupunu me ra tajua taha lolorani, motuha susuhira na rani hi na vitiu terenia. 8Tau mosulara me Petlehem, moaso, Otovano, ototiro susuhi na paule lele; tau otopasuae tau, ototanumai, otovaraiau, suria inau mono ainumai, ailotu mea. 9Tau hire, teroho na leo hi na moli tau, telaho; tau na vitiu, terenia mine me na liho hi na maso momaraha ae, movano majiha hira, tau moturi toho me na ulu hi na pea na paule lele motoho ae. 10Tau terena vitiu tau teejieji tohova. 11Tau teruhusahamai me na lolona pea, terena paule lele valui Mere tinana; tau tejovi tasivo, telotu mea; tau tesahara pilara sanu tau, terahu ta mea ra rahuvuso, na sule taha majina, na vrankinsens, na mer. 12Tau Atua moaso tau mera me na navuriorio moso tetaliliu me Herot, temule me na vanuara me na rio motatea.
13Tau temule tau, te enjel hi Iehova iteamonumai me Josev me na navuriorio, moaso, Oimaraha, oilava paule lele me tinana, oirovo me Ijip, toitoho ae aiva-raiho: suria Herot itiro na paule lele sura losu meteia. 14Tau momaraha, molava paule lele me tinana me na pohi, movano me Ijip; 15motoho ae me Herot imate: sura ve na leo hi Iehova hi na provet motaraae, moaso, Alavi matuu lamane me raljip. 16Tau Herot, mo-pinisi ra tajua taha lolorani tejihae tau, mopuripuri tohova, mosulara pilana tajua, telosu metei ra paule taiti lamane vunuvunu me Petlehem, me ra vanua taroroi mea, ra tauni hira morua, ra tauni hira mosarua reji mono, pala ranihi ra tajua taha lolorani tevetia ta mea. 17Me na rani hina na leo hi Jeremaia na provet motaraae, moaso,
18Teroho na loena sanu me Rerna,
Na tahi tahajia,
Rejel motahi suri ra matuna;
Mosatahimoti, suria mosaitea ae.
19Maa Herot momate tau, te enjelhi Iehova itea monumai me na navuriorio me Josev me Ijip, 20moaso, Oimaraha, oilava paule taiti me tinana, oivano me na vanua i Israel: suria hire temeje na losu mete na paule taiti temate mine. 21Tau momaraha, molava paule taiti me tinana, monumai me na vanua i Israel. 22Maa morohoe tau Arkelaus inie na moli hi ra Jutia me na tahu i tamana Herot, moine na vano ae; tau Atua moaso mea me na navuriorio tau, movano me na vanua i Kalili, 23monumai, momaraha me na vanua motea tejuria Nasaret: sura ve na leo hi ra provet motaraae, tijuria na tajua hi Nasaret.
Currently Selected:
Matiu 2: TLM9109
Highlight
Share
Copy
Want to have your highlights saved across all your devices? Sign up or sign in
This is a historic text maintained by the British and Foreign Bible Society.