Mateu 3
3
Ulalya wa Yohani Mpattisa
Marku 1.2-6; Luka 3.1-9
1Yaayo mahuku ayo Yohani Mpattisa ahorwaa itakhwa yo'Yuteya ni ahopacera ulalya, eeraka: 2Nrukunuse mirima cinyu, kontha umwene wo wirimu uri wakhiviru. 3Kontha Yohani, phi yooyo ahiminye ni nnapiyu Isaya eeraka:
Ncu na ntthu nokhuwela ntakhwani niiraka:
Nlokihe iphiro ya Apwiya,
mookole mittala caya.#3.3 Isaya 40.3
4Yohani aawara ikuwo co mapururu o'nkamira, eetthukelaka nnyununi mmo isintu yo nrapala. Iyolya awe yaari mattettentte ni urawo wo ntakhwani. 5Vano atthu othene o'Yerusalemu, uYuteya wothene ni owaattamanana mooloko Yortani, yaarwa wenwe. 6Yaanapattisiya ni yooyo umoolokoni Yortani, alaphululaka itampi caya.
7Nanso, woonawe wiira, mafarisi ni masatusi enci yammwa wupattisoni, aheerela: Ikhapila yo'vili, tipani oohimenryeni utthawa uviruwa wa Nluku, unhala uwa? 8Paahi, nkhalane mihokorokho coocuwaneha urukunusa winyu mirima; 9ni nhancere wiira ayaayoru: Nihaana athumwanihu Aparahamu, kontha mi kinawuhimeryani wiira Nluku nawoorya utatusa ala maluku ala ukhala asaana a Aparahamu. 10Ciicammo iheesiya ipaco wamititharini co miri, ni mwiri wothene uhinvaha mihokorokho comaana, unaathikiliya ni uvonyeriya umooroni.
Yohani naavaha usaahiti wa Yesu
Marku 1.7-8; Luka 3.15-17; Yohani 1.19-28
11Mi kinoopattisani ni maasi wiira nrukunuse nrima, nanso nohala uwa uttuli waka, haana ikuru impwaha yawaka, ni mi akimphwanela wiira kitthukule miripwe co'kwakwatta cawe. Uyo naahala wuupattisani ni Nnepa Nttakattifu ni mooro. 12Haana ithokwa mmatatani mwawe, naahala uveerela itiriku, wahoolo naahala usunka itiriku iyo nnikhupini nawe, nanso macasi ayo naahala upaha ni mooro uhinttiphyaa.
Upattisiya wa Yesu
Marku 1.9-11; Luka 3.21-22; Yohani 1.32-34
13Yoole ukati ule, Yesu ahophiya uYortani akhumaka uKalileya wiira apattisiye ni Yohani. 14Vano Yohani ahomananiha unkhottela eeraka: Phi mi kimphwanela upattisiya ni we, vano waneera cani ukiweelaka mi? 15Nanso Yesu ahomwaakhula eeraka: Nna va uhiyeke ciicammo kontha ninlamuliya uttharihelela isariya yothene. Vaavale ahonkupaleela.
16Yesu napattisiyene, ahokhuma mmaasini. Yooyo ukati uyo irimu yahohulya ni uyo ahoona Nnepa wa Nluku toko ikhuntta inkhuruwelaka. 17Vano naheewiya ncu no wirimu niiraka: Ula mwanaka oofentiya, nokitteeliha nrima.
Currently Selected:
Mateu 3: NNI
Highlight
Share
Copy
Want to have your highlights saved across all your devices? Sign up or sign in
© 2021, Wycliffe Bible Translators, Inc. All rights reserved.