AMOSE 2
2
1Jehova o itse: Ka baka la melato e meraro, kapa e mene ya Moabe — teng nke ke ka fetoha — kahobane ba tjhesitse masapo a morena wa Edomo, ba a etsa molora; 2ke tla akgela mollo Moabe, o tle o tjhese matlo a borena a Keriothe, mme Moabe o tla timela moferefereng oo hara mokgosi le modumo wa terompeta; 3ke tla timetsa moahlodi mahareng a hae, le marena a hae ke a fedise hammoho le yena: ho itswalo ke Jehova.
4Jehova o itse: Ka baka la melato e meraro, kapa e mene ya Juda — teng nke ke ka fetoha — kahobane ba nyedisitse molao wa Jehova, ba sa ka ba boloka ditaelo tsa hae, ba mpa ba kgeloswa ke mashano a bona ao bontata bona moholo ba ileng ka wona; 5ke tla akgela mollo Juda, o tle o tjhese matlo a borena a Jerusalema.
6Jehova o itse: Ka baka la melato e meraro, kapa e mene ya Iseraele — teng nke ke ka fetoha — kahobane ba reka tjhelete ka ya lokileng, le ka mofumanehi ba reka dieta, 7ba lakatsa ho bona lerole la lefatshe hodima hlooho ya mofutsana, mme ba kgopamisa taba tsa ba banyenyane; motho le ntatae ba kenela mosadi a le mong, ba tle ba tlotlolle lebitso la ka le kgethehileng; 8mme ba robala dikobong tse nketsweng molato pela dialetare tsohle, ba nwa veine ya ditefo tsa bona tlung ya Modimo wa bona ... 9Athe ke nna ke neng ke timetse Baamore pela lona, bao bolelele ba bona bo neng bo le ka ka bolelele ba dikedare, ba le matla jwaloka dieike, ka timetsa tholwana tsa bona hodimo le metso ya bona tlase. 10Hape, ke nna ke neng ke le ntshe lefatsheng la Egepeta, ka le tsamaisa feelleng ka dilemo tse mashome a mane, le tle le rue naha ya Baamore; 11mme ke tsositse baporofeta hara bana ba lona, le hara bahlankana ba lona ke tsositse banasari. Na ha ho jwalo, bana ba Iseraele? ho bolela Jehova. 12Empa le nositse banasari veine; haele baporofeta, le ba laetse, la re: Le se ke la porofeta. 13Bonang, ke tla le hatisa, jwaloka koloi e tletseng mangata ha e hatisa lefatshe; 14ya lebelo o tla sitwa ho baleha, ya matla a ke ke a itiisa ka matla a hae, senatla se ke ke sa boloka ho phela ha sona. 15Ya tshwereng seqha a ke ke a ema, ya maoto a bobebo a ke ke a ipholosa, ya palamang pere a ke ke a boloka ho phela ha hae; 16leha e le eo e leng senatla hara dinatla, o tla baleha a hlobotse ka tsatsi leo: ho itswalo ke Jehova.
Currently Selected:
AMOSE 2: SSO61-SO
Highlight
Share
Copy
Want to have your highlights saved across all your devices? Sign up or sign in
© Bible Society of South Africa 1961. Used with permission. All rights reserved.