MATEO 2
2
1Eci Yesu a citiwa vo Beteleme yo vo Yudea voloneke viosoma Herode, oco olonoño viokutundilo vieya ko Yerusalãi kuenje via popia, viti, 2O li pi u wa citiwa ha lingi Soma ya va Yudea? Momo tua mola olumbungululu luaye kutundilo kuenje tueya oku u fendela. 3Eci Soma Herode a ci yeva wa sonda, kuenda Yerusalãi yosi ya sondavo. 4Oco wongolola ovitunda viosi vinene la vakuavisonehua vofeka, yu wa va pula hati, Kristu o citiwila pi? 5Vo sapuila vati, Vo Beteleme yo vo Yudea; momo oco ca sonehiwa luprofeto, hati,
6Kuenda ove, a Beteleme, afeka ya Yuda,
ku sule lakamue pokati kolombiali via Yuda.
Momo kokuove ku tunda ombiali
yi linga ungombo womanu vange va Isareli.
7Oco Herode wa pañinya olonoño viaco uyombeki kuenje wa kũlĩhisa lutate eteke olumbungululu lua moleha. 8Oco wa va tuma ko Beteleme hati, Kuendi, ka puliliyi lutate okañaña kaco kuenje nda wa ka sangi, ndo sapuiliko oco ngende ha ka fendelevo. 9Eci va yeva ondaka ya Soma va enda, kuenje tala, olumbungululu va lu muila kutundilo lua va pitila kovaso toke lueya, lua talama oku kua kala okañaña kaco.
10Eci va mola olumbungululu luaco va yolela onjolela ya lua. 11Kuenje, oku iñila vonjo, va mola okamõla kaco kumue la Maria inako, yu va kekamela posi kuenje va ka fendela. Oco, oku kutulula akolombele avo, va ka avela olombanjaile, ulu, umbafu la mura. 12Oco, omo va lunguiwa lonjoi okuti ka va tiukila ku Herode, va enda lonjila yiñi kofeka yavo.
13Pana okuti va enda ale oco ungelo wa Ñala wa tukulukila ku Yosefe vonjoi hati, Pasuka, yelula okamõla la inako. Tilila ke Egito. Oko o ka kala toke hu pañinya, momo Herode o sanda okamõla ha ka ipa. 14Oco Yosefe wa pasuka, wa yelula okamõla kuenda inako kuteke, kuenje wa enda ke Egito. 15Oko a kala toke kokufa kua Herode. Oco yi lingiwe ondaka ya popia Ñala luprofeto yokuti, Nda kovonga Omõlange ke Egito.
16Oco Herode, eci a limbuka okuti wa limbikua lolonoño, wa fungula kuenje wa tuma oku ipa omãla valume vosi vo vo Beteleme lava vovovaimbo osi a sungueko, okuti omãla vosi tunde koloñaña toke kuava va tẽla alima avali. Okutenda kuaco wa ku sokisa lotembo ya tukuiwa lolonoño. 17Oco ondaka yuprofeto Yeremiya ya lingiwa, yokuti,
18Ondaka yokulila lokulisiõsiõla kua lua
ya yevalela vo Rama.
Rahele o lila omãla vaye,
ka tava oku lembiwa momo omãla vaye kavemo.
19Puãi, eci Herode a fa, oco ungelo wa Ñala wa tukulukila ku Yosefe vonjoi ve Egito, hati, 20Katuka, yelula okamõla la inako, kuende kofeka ya Isareli, momo ava va yonguile omuenyo wokamõla va fa. 21Kuenje Yosefe wa katuka, wa enda lokamõla la inako, yu weya kofeka ya Isareli. 22Puãi, eci a yeva okuti Arkelau o viala ko Yudea komangu ya isiaye Herode, oco wa kuata ohele yoku endako. Kuenje, omo a lunguiwa lonjoi, oco wa pinyanyuhila konele ya Galilea. 23Kuenje wa enda, wa tunga vimbo lia tukuiwa Nasara, oco yi lingiwe ondaka ya popiwa luprofeto, yokuti, O tukuiwa u Nasara.
Currently Selected:
MATEO 2: EMB63
Highlight
Share
Copy
Want to have your highlights saved across all your devices? Sign up or sign in
Umbundu Bible © United Bible Societies, 1963.