2 Corintios 13
13
Dios Yaya munanqannö kawayänanpaq Pablo yätsinqan
1Kananwanqa kimsa kutinam qamkunaman watukayaqniki shamushaq. Dios Yayapa palabranchö ninqanta yarpäyay: <<Ishkay o kimsa testïgukuna shimpiyaptinraqmi pipis jutsayuq kanqan musyakanqa>>.#Deut. 19.15.
2Qamkuna kaqman shamurmi jutsa ruraqkuna jutsankunata dëjayänanpaq unayna nirqä. Kananpis puntaykikunachö kaykaqnömi llapaykita yapay niyaq: Kanan kutimur tsaynölla jutsata ruraykaqta tarirqa manam llakipäyäshaykitsu. 3Tsayraqmi musyayanki niyanqaqkuna Jesucristo munanqannö kanqanta.
Jesucristupis manam ni mayqaykita jutsaykikunapita tsapäyäshunkitsu. Tsaypa rantinmi jutsa rurayta mana dëjayaptiki poderninwan corrigiyäshunki. 4Poderninnaq runanö cruzchö wañuptinpis Dios Yayam poderösu kayninwan kawaskatsimushqa. Tsaynöllam noqakunapis Jesucristuman creyikur kikilläkunapitaqa poderninnaq karpis Dios Yayapa poderninwan corrigiyäshayki.
5Jesucristuman rasunpa creyikuyanqaykita o mana creyikuyanqaykitapis kikikikuna tantiyakuyay. ¿Manaku tantiyayanki Jesucristo qamkunawan kaykanqanta? Payman mana creyikuyaptikiqa manam qamkunawantsu kaykan. 6Rasunpa payman creyikurqa Jesucristo kachamanqantam tantiyayankiman.
7Dios Yayatam mañakuyä ninqäkunata chaskir jutsaykikunata dëjayänaykipaq. Manam poderyuq kayanqäta tantiyayänaykipaqtsu mañakuyä, sinöqa poderninnaq kayanqäta yarparpis Dios Yaya munanqannö kawakuyänaykipaqmi. 8Tsaynö niyaq Dios Yayapa alli willakuyninpaq ima tsapapis mana kananpaqmi. Paypa willakuynintaqa pïmaypis chaskikuyänantam munayä.
9Tsaymi Dios Yayata mañakuyä llapan imaykachöpis pay munanqannö kawayänaykipaq. Pay munanqannö kawakuyaptikim poderninnaq kayanqäta runakuna yarpäyaptinpis kushikuyä. 10Kay qellqamunqäkunata cäsuyaptikiqa qamkuna kaqman chämur mananam imatapis niyäshaykitsu. Manam llakikatsiyänaqpaqtsu apóstol kanäpaq Dios Yaya churamashqa, sinöqa animatsir yanapayänaqpaqmi.
Cartapa ushanan
11Wawqikuna y panikuna, imaypis kushikuyay. Dios Yaya munanqannö kawayänaykipaq juknin jukninwanpis animatsinakuyay. Mana chikinakur juk shonqulla kawakuyay. Tsaynö kawayaptikim llakipäkuq y alli kawakunapaq yanapamaqnintsik Dios Yaya imaypis yanapayäshunki. 12Juknin jukninwan qaqllaykikunachö mutsanakur saludanakuykuyay. 13Kaychö kaykaq llapan wawqikuna y panikunam saludayämushunki.
14Señor Jesucristo, Dios Yaya y Espíritu Santu imaypis llakipaykuyälläshuy. [Amén.]
Currently Selected:
2 Corintios 13: qxn
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.