2 Corintios 12
12
Revelacionkunata Pablo rikanqan
1Aläbakunqäwan imata mana jipirpis kanan willayäshayki Señor Jesucristo revelacionkunata rikätsimanqanta. 2Chunka chusku watanam päsan Jesucristuman creyikuq reqinqä runata#12.2a Juk runaman jitarllam kikinpaq Pablo parlarqan. Tsaynömi parlarqan orgullösu kayta mana munar. Kikinpaq parlanqantam Pablo willamantsik versïculu 7-chö. kimsa kaq ciëluman#12.2b Punta kaq ciëlum pukutay kaykanqan. Ishkay kaq ciëlum qoyllurkuna, killa y rupay kaykäyanqan. Kimsa kaq ciëlunam Dios Yaya täkunqan. Dios Yaya apanqan. Peru manam musyätsu cuerpuntin aywanqanta o almallan aywanqanta. Tsaytaqa Dios Yayallam musyan. 3Cuerpuntin aywanqanta o almanlla aywanqanta Dios Yayalla musyaptinpis 4paraísuman#Luc. 23.43. apanqantam musyä. Tsaychömi pipis mana wiyanqankunata wiyarqan. Tsay wiyanqankunataqa imanö tantiyatsiyta manam puëdintsu.
5Tsay runa ciëluman chanqanpitam aläbäman. Peru kikïmi sïqa aläbakushaqtsu, sinöqa poderninnaq kanqällatam willayäshayki. 6Aläbakuyta munarqa rasun kaqtam aläbaküman. Peru tsaynö kaptinpis santuna kanqäta runakuna yarpäyänanta mana munarmi aläbakütsu. Manam aläbakunqäta wiyartsu pipis alli runa kanqäta yarpanman, sinöqa imanö kawanqäta rikar y imata parlanqätapis wiyarmi.
7Ciëluchö rikanqäkunapita mana aläbakunäpaqmi alläpa ñakanäpaq Dios Yaya permïtishqa. Tsay ñakayqa cuerpüchö kasha tukshiqnömi kaykan. Kikin Satanás kachamunqan ñakaynöraqmi alläpa ñakatsiman. 8Tsay ñakaypita jipimänanpaqmi Señornintsikta kimsa kuti mañakurqä. 9Mañakuptïmi nimarqan: <<Kuyanqallaqwan contentakuy. Tsaynö ñakar kallpannaq kaptikiraqmi podernïwan yanapashayki>>.
Tsaynö nimaptinmi tsay ñakaywan ñakar kallpannaq karpis kushikü. Kallpannaq kaptïraqmi Jesucristo yanapaykäman. 10Tsaymi Jesucristuta servir llakikütsu qeshyarpis, ashayämaptinpis, faltäpukurpis, chikiyämaptinpis y imaykata ñakarpis. Kallpannaq karpis kallpasapam kä.#12.10 Tsaynömi Pablo nirqan: Tsaynö ñakar kallpannaq kaykarpis Jesucristo yanapamaptinmi kallpasapa kä.
Corintuchö wawqikunapaq y panikunapaq Pablo llakikunqan
11Löcunö aläbakur parlanäpaqqa kikikikunam ashipäyämashkanki. Aläbakunqäpa rantinqa qamkunam aläbayämankiman karqan. Kikilläpita imatapis rurayta mana puëdirpis tsay apóstol tukuqkunapitaqa mas allim kä. 12Apóstol kanqäta musyayänaykipaqmi qamkuna kaqchö ñakarpis mantsakaypaq milagrukunata y señalkunatapis rurarqä. 13Peru wakin markakunachö gastükunapaq wawqikunata y panikunata mañakunqänöqa manam mañakuyashkaqtsu. ¿Imanirtan tsaypaq jaqayashqa kaykäyanki? ¿Mana mañakuyanqaqtsuraq jutsä?
14Alistakushqanam kaykä qamkuna kaqman yapay shamunäpaq. Kananwanqa kimsa kutinam shamushaq. Manam kikïpaq imatapis ashirtsu qamkunaman shamushaq, sinöqa qamkunata llakipäyarniki yanapanäpaqmi. Musyanqantsiknömi pï taytapis wamrankunata mañakuntsu, masbienmi yanapan. 15Tsaynöllam noqapis qamkunata mañakuyanqaqpa rantin imätapis ushashaq y qamkuna rayku wañunäpaqpis listu kä. Llapan shonqüwan llakiparnikikuna yanapaykäyaptiq ¿imanirtan noqapita jaqayashqa kaykäyanki?
16Musyayanqaykinömi yanapayämänaykipaq manam mayqaykitapis mañakuyashkaqtsu. Tsaynö kaptinpis wakikish nikäyanki waktsakunapaq niq tumpalla kikïkunapaq qellayta qoritsiyanqaqta. 17¿Imanirtan tsaynö yarpäyanki? Tantiyakuyay. ¿Imayllaqa qamkunaman kachamunqä wawqikuna mayqallanpis engañayäshurqaykiku? 18Juk wawqitawan Tituta qamkuna kaqman kachamuptï#2Cor. 8.6, 16-18. manam ni imatapis engañayäshushkankitsu. Tito mana engañakuq kanqannömi noqapis engañakütsu. Paywanmi tsay yarpaylla kayä.
19Kay cartata apatsiyämunqäta liyir talvez yarpäyanki favornïkunallapaq qellqayämunqäta. Kuyashqa wawqikuna y panikuna, manam favornïkunallapaqtsu qellqaykämü, sinöqa tantiyakur Dios Yaya munanqannö kawayänaykipaqmi. Jesucristuta serviq karmi Dios Yayapa puntanchö qamkunata yätsiyaq. 20Qamkuna kaqman shamur llutanta ruraykaqta tariyänaqpaq kaqtam llakikü. Tsaynöllam llakikü tsaynö kaykaqta tarir piñapäyänaqpaq kanqanta. Talvezchi qamkunata tariyaqman piñanakuykaqta, chikinakuykaqta, rabyatsinakuykaqta, rimanakuykaqta, musyapänakuykaqta, orgullösu kaykaqta y mana allikunata ruraykaqta. 21Talvezchi melanaypaq kaqkunata, fornicación jutsata y jukwan jukwan puriyanqaykita dëjayashkankitsu. Jutsata ruraykaqta tarir qamkunapita Dios Yayapa puntanchö penqakuytam yarpachakü.
Currently Selected:
2 Corintios 12: qxn
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.