2 MAKABAYO 8
8
Yuda Makabayo akhola induli
(1 Mak. 3:1-26)
1Naye Yuda, oweliralie lindi liali Makabayo, halala nende abetsabe, bachenda mutsisoma masilisi okhuula olwa bakhung'aasia Abayahudi abelihe aboola ebikhumila bisasaba (6,000), abali nibashitinyile khudini yabwe. 2Bamusaya OMWAMI Nyasaye akhonyelele abandube, abali nibasenachililwa hasi nende amahanga kandi. Khandi mbu achikholele aketsimbabasi Ihekaluye, eyali niyafwolwa nende abandu abalamumanyile Nyasaye ta, 3nende okhulolela Litookho lia Yerusalemu eshisa, eliali nilialikululwa nilili ahambi okhuhwa. Bamusaya mbu areche amarwi khumabanga akamuhaabilanga, 4niyetsulila obumululwi bwabaana ababula eshikha, nende okhunyekwa okhweliralie, nalolosia shinga olwa yakiya obumayanu.
5Olunyuma olwa Yuda Makabayo okhurechekha abalihebe, abandu abamahanga bakhaywa okhulwana ninaye shichila oburuma obwa Omwami yali nabeele ninabwo khu Isiraeli bwali nibukalukhaane okhuba tsimbabasi. 6Yuda yaseera amatookho nende tsisoma metsukhana, nabihaafia omulilo. Yahamba ebikwenyi tsialolekhangakhwo etsikhoyeele, niyelusia abasuku abanji. 7Yekhoonyela eshiilima mushilo okhuseera amahe kano, obusitsabwe nibutswana buli habundu.
Tolemai aruma Nikanori okhuseera Yuda
(1 Mak. 3:38-41)
8Olwa Filipo, owali omukafuna wa Yerusalemu, yalola mbu Yuda hatutu na hatutu atsiilililanganahula, yamuhandichila Tolemai, omukafuna welitookho likhulundu lia Siria nende elia Foinike ibarwa, mbu yetse akhonyelele omuruchi. 9Mubwangu Tolemai yamwahula Nikanori omwana wa Patrokilo, mulala khubetsa abomuruchi abakhulundu nende okhumuruma, niyemilile abelihe abahela ebikhumila bibili okhurula mumahanga akahukhaane, okhutsia okhumululila elala lihanga lia Abayahudi. Khandi yamulobola Giogia, omusesia owali niyakhupana amahe oluhoono olurambi okhutsia ninaye. 10Omuruchi Antioko yali nabanzungwa likofi nende Abaroma elihela etsikilo ebikhumila amakhumi kasasaba nende munane etsia ifeetsa. Nikanori yalola mbu alalirunga nakusia ababohe abelihe aba Eshiyahudi shinga abasumba. 11Kho yarumana omulome khumatookho akali nikarondokhana neinyanza, mbu keetse kakule abasumba aba Eshiyahudi. Yakalaka mbu alakusia abasumba amakhumi shienda obukusi obwaitalanda ndala eyaifeetsa. Nebutswa shiyamanya eshinyaasio eshia Nyasaye Owunyala Biosi yali namubishiile ta.
Yuda amanyilisia aka Nikanori yali narecheeshe okhukhola
(1 Mak. 3:42-54)
12Yuda yaboolelwa mbu Nikanori yali niyetsanga okhumuseera. Kho namanyia abelihebe. 13Balala khubo abali abari, khandi abalaasuubila mbu Nyasaye anyala okhubakholela aka habwene ta, beelukha. 14Abandi nabo bakusia emiandu chiabwe echiali nichitoong'ile chiosi, nibamusaya Omwami mbu abahonokosie nomukhono kwa Nikanori, owali nabakhupile obukusi kata nashili okhuula ewa bali. 15Bamusaya mbu naba naranyala okhubahonokosia khulwabwe abeene ta, akhole ario khulwa tsindakano etsia yalakana nende abakuuka babwe, khandi khulwa okhubeela ye, Nyasaye Omukhulundu Owokhuhuchisia, yali niyabalanga okhuba abandube. 16Nebutswa Makabayo yakhung'aasia abelihebe halala, abandu abahela ebikhumila bisasaba, nabatinyisia mbu baleshe okhuria kata okhwilukha olwa balola obunji obwa abelihe liomusuku nibubetsela, aharali eshikha ta. Habula bali balwane neitsoni, 17nibetsulilanga ebikhole ebia abamahanga bali nibakholeele Muhekalu, khandi shinga olwa basandia Yerusalemu nibayiniaho emilukha echia Eshiyahudi. 18Yabatinyisia nababoolela ari: “Balia bo beletanga khubimanulwa biabwe, nebutswa ifwe khwileetanga khu Nyasaye Owunyala Biosi, ounyala okhumulula balia abakhuseeranga ifwe nibakhulwana lihe, halala kata nende eshibala shiosi eshilamba olwa areesiakhwo butswa omurwe kwonyene.”
19Mana Yuda natsiililila okhubetsusia shinga Nyasaye olwa yakhonyelela abakuuka babwe: mundaalo tsia Senakeribu, abelihe ebikhumila eshikhumi namakhumi munane nabirano (185,000) beerwa; 20olundi nibali Babulonia, Abayahudi ebikhumila munane (8,000) bakhonyelela Abamakedonia ebikhumila bine (4,000) okhuhula Abagalatia ebikhumila eshikhumi namakhumi kabili (120,000) nibabayaya emiandu eminji okhuba Nyasaye yali halala ninabo.
Yuda ahula Nikanori
(1 Mak. 3:55–4:27)
21Amakhuwa ka Yuda yababoolela kano, kabatinyisia emioyo, niberechekha kata okhufwila idiini yabwe halala nende lihanga liabwe. Yuda yakabula abelihebe mung'anda tsine. 22Buli ing'anda yali nabandu eshikhumi namakhumi karano. Ye omwene nende abasiani babwe mbu Simoni, Yosefu halala nende Yonatsani bemilila buli mulala ing'andaye. 23#1 Mak. 3:48Olunyuma olwa Eliazari okhusoma nomwoyo omukhongo okhurula mushitabu eshitakatifu shinga olwa yamulachilisia, Yuda yakhupa omwoyo khulwa omulango okwelihe, naboola ari: “Nyasaye alakhuletelela,” mana omwene niyemilila abelihe okhumuseera Nikanori.
24Nyasaye Owunyala Biosi yabalwanila, nibeera abelihe ababira ebikhumila tisa (9,000) khubelihe liomusuku. Basalisia abandi abanji, lihe liosi liomusuku niliirukha tsimbilo. 25Banuula balia abali nibetsile okhukula abasumba amapesa kabetsa ninako, nibambachila omusuku oluhoono olurambi, okhuula olwa kabalunyia okhukalukha ebunango, 26shichila ebise ebia Isabato okhuchaaka biali ahambi okhuula. 27Olunyuma lwokhuyaaya ebimanulwa biomusuku nende okhunaabula abafu ebia bali ninabio, batsaatsahalila Isabato nibetsoomia Omwami nibamukhupila orio, shichila yali naboosiiye khunyanga eyo eshisiche mulembe, nachibaheelesia okhuba eshilolelo khulwa eshisashie khubo. 28Olunyuma olwa Isabato okhuhwa, bakabilakhwo khubashiabwe abali nibasandibwa, halala nabakhaye abalekhwa nende abaana ababisandu khubindu ebia bali nibayaayile. Bakabana abeene nende abetsinzu tsiabwe ebindu ebiatong'a. 29Nibakholile kano koosi, bakhung'aana halala okhumusaya Omwami wetsimbabasi, nibamureeba mbu abakholile akeshirendashie bo abakhalabanibe.
Yuda amuhula Timotseyo nende Bakide
30Abayahudi beera abandu abahela ebikhumila amakhumi kabili (20,000), olwa bakhupana nende Timotseyo nende Bakide. Babanuula tsingoba tsiamani, nibabayaaya emiandu eminji muno, echia bakabana hakari nende abakhasi abalekhwa, abaana ababisandu, abakofu, halala nende abali nibasalisibwe. 31Bakhung'aasia ebimanulwa biomusuku nibabibiikha obulayi habundu ahakhoyele, nebutswa ebia bayaaya babiyila mwitookho lia Yerusalemu. 32Bamwira omuseesia welihe lia Timotseyo, omundu omubii owali niyasalisia Abayahudi muno. 33Nibekhoyelanga obuhuli bwabwe obukhongo, Abayahudi babasamba nomulilo abo abali nibasamba ebilibwa ebia Ihekalu. Mubeerwa yalimwo Kalisitsene nabashie, abali nibelushe nibebisile mukhatsu akhatiti mbu behonokooshe; kata kario yanyoola eshinyaasio eshiali nishimukhoyeele khulwa ebikholebie ebishiamu.
34Munjila eyo, Nikanori, omundu omumayanu owali niyetsile nabakholi bobukhala eshikhumila shilala (1,000) okhukula Abayahudi mbu babe abasumbabe, 35yahulwa nende Abayahudi, abandu aba yali niyachaaya muno. Abayahudi bamuhula khulwa obunyali bwa OMWAMI Nyasaye. Yefwalula ebifwalobie bielihe bieing'ono ne niyelukha yenyene shinga omuhambe owihonokosinjia, okhuula olwa yoola Antiokia. Eshia yali nanyalilwe okhukhola shiali okhumulula abelihebe boosi! 36Kho omusaatsa uno, owenya okhukusia Abayahudi kho mbu arunje likofi elia yali nabanzungwa okhurunga Abaroma yachila nikamanyikha habulafu mbu, Abayahudi bali nomukobosheli, shibanyala okhuhulwa butswa bario tawe, okhuba bahulilanga nende okhutiila amalako aka OMWAMI A Nyasaye wabwe yabahelesia.
Currently Selected:
2 MAKABAYO 8: OLUDC
Highlight
Share
Copy
Want to have your highlights saved across all your devices? Sign up or sign in