GÁLATAS 1
1
Alillachu capanguichi nishcami
1Villachun cachashca Pablomi cani. (Jesucristopash, huañushcacunapaj chaupimanda paita causachij Taita Diospash villachun cachashcami cani. Na runacunalla agllashca, runacuna cachashcachu cani). 2Ñucapash, ñucahuan caipi tianajuj tucuilla huauquicunapashmi, Galacia llactapi caipi chaipi tandanajuj crijcunaman, caitaca escribimunchi. 3Taita Diospash, ñucanchi Apunchi Jesucristopash, ninan juyaita, casilla ali causaiguta, cangunaman carachunmi munanchi. 4Cai nali pachapi causanajujpi quishpichingapajmi, Jesucristoca ñucanchipaj juchacunamanda japi tucushpa huañurca. Chashna huañuchunga, ñucanchi Taita Dios munashcashnami pactarca. 5Paica, causaita causaicaman punchapambagumi cangui ni tucushca cachun. Shina cachun.
Ali villaita villanaca, na shuj ashtahuan tianllu
6Cristopaj ninan juyaimanda cangunata agllaj Diosta, ñapash cungashcata ricushpami manllarini. Shujman tigrachishpa villajtara catingapajmi, shina rurashcanguichi. 7Ali villaita villanaca, na shuj tianllu. Ashtahuangarin huaquingunami, ali villaitapash shujmanra tigrachingapaj, cangunata pandachingapaj munanajun. 8Ashtahuangarin cai ali villaita ñucanchi villashcata shujmanra tigrachishpa villashpaca, ñucanchillata cashpapash, jahua pachamanda shuj ángel cashpapash, ninanda llaquichi tucuchun ninimi. 9Punda ñucanchi nishcashnallatami, cunambash cutin cashna nini: Ali villaita canguna uyashcata pipash shujmanra tigrachishpa villashpaca, ninanda llaquichi tucuchun ninimi.
10Cashna nishpaca, ¿gentecuna alicachihuachun yashpachu nijuni? Na cashpaca, ¿Taita Dios alicachihuachun yashpachu nijuni? ¿Na cashpaca, gentecunatara cushichingapaj munashpachu chashna nijuni? Gentecunatara cushichingapaj munajushpaca, na Cristota servij caimanllu.
Diospajta Pablo rurajushcatami villajun
11Huauquicuna, panicuna, caitami yachachun munani: Ali villaita ñuca villajushpaca, runacuna munashcashnaca na villajunichu. 12Caitaca, maijan runacunapajta chasquishpaca, na yachajurcanichu. Ashtahuangarin Jesucristomi, ñucaman ricuchihuarca.
13Judea llacta runacuna yachachijujta catijushpa, punda ñuca imashna causashcataca, ñami uyashcanguichi. Ñucami, Taita Diospajlla tandanajuj crijcunataca, catiriashpa ninandapacha llaquichishpa, llaquinayaita tucuchijurcani. 14Judea llacta runacuna yachachijujta catijushpaca, ñuca llactapi ñucahuan viñaicunataca misharcanimi. Ñucapaj ñaupa taitacuna yachachishpa saquishcataca, alipachami pactachij carcani. 15Ashtahuangarin Taita Dios munashpami, mamapaj vijsapi cajpillata shicanyachihuashca. Paipaj ninan juyaihuan cayashpami, 16na Israel puracunapi villajuchun, paipaj Churita rijsichihuarca. Shina rijsishpami, na ñapash pitapash tapurcani. 17Ñucapaj punda villachun cachashcacuna causanajuj, Jerusalenmanllapash na vichai rircanichu. Ashtahuangarin Arabia llactamanmi rircani. Chai jipami, Damasco puebloman cutinllata tigramurcani.
18Ña quimsa huata jipami Jerusalenbi, Pedrota ricungapaj rircani. Paihuanmi, chunga picha punllacaman purijurcani. 19Chaipica, villachun cachashca puracunataca, pitallapash na ricurcanichu. Apunchi Jesuspaj huauqui Jacobotallami ricurcani. 20Ricuichi, caicunataca Taita Diospaj ñaupajpimi, na llullashpa escribimuni.
21Chai jipaca, Siria shuti, Cilicia shuti llactacunamanmi rircani. 22Cristota crishpa, Judea llactapi tandanajuj crijcunaca, na ñavi ñavi rijsihuarcachu. 23Paicunaca, cashna nijtallami uyashca carca: “Punda ñucanchita catiriashpa llaquichij, llaquinayaita tucuchingapaj purij runallatami, cunanga crinajuchun villashpa purijun” nijtallami uyashca carca. 24Shina purijujta uyashpami, ñucamandaca Taita Diostaca punchapambagumi cangui ninajurca.
Currently Selected:
GÁLATAS 1: QUII
Highlight
Share
Copy
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.