ZACARÍAS 14
14
Jerusalenga, shuj llactacunata mishangami
1Ricuichi, Mandaj Dios shamuna punllami ña chayamujun. Canguna imatalla charishcacunata quichushcatapash, cangunapaj chaupipillatami chaupirinajunga. 2Jerusalenbi causajcunahuan macanajuchunga, ñucami shuj llactacunamanda tandachimusha. Paicunami, cai pueblotaca quichunajunga. Cangunapaj huasicunapi imatalla charishcacunataca quichushpami apanajunga. Cangunapaj huarmicunatapashmi, munai na munai huaglichinajunga. Cai pueblopi causaj puramanda chaupica, prezumi rinajunga. Ashtahuangarin huaquin puchushca gentecunaca, cai pueblomandaca na chingachi tucungachu. 3Chai jipami Mandaj Diosca, chai llaquichij llactacunahuan macanajungapaj llujshinga. Jatun macanajuipi macanajunshnami macanajunga. 4Chai punllami paica, Jerusalén chimba purapi tiajuj Olivos urcu jahuapi shinllitapacha shayaringa. Chai Olivos urcuca, indi llujshimuj ladomanmi. Chai urcuca, indi llujshimuj ladomambash, indi huashajuj ladomambashmi chaupiringa. Shina chaupirijpimi, chai urcu chaupicunapica, jatun pugru pamba tucunga. Chaupi urcuca, jahua ladomanmi tiaringa, caishuj chaupi urcuca ura ladomanmi tiaringa. 5Cangunaca, chai urcu chaupipi tiaj pugru pambamanmi pacajugringuichi. Urcu chaupipi tiaj pugru pambaca, Azal shuti llactacamanmi canga. Judá llactata jatun mandaj Uzías mandajui punllacunapi, alpa mama chujchujpi pacajugrishcashnami pacajugringuichi. Chai jipami, ñucata Mandaj Taita Diosca shamunga. Paihuanga, jucha illaj tucuicunapashmi shamunga.
6Chai punllapica, cashnami tucunga: Punchapambapash, yana yanapash na cangachu. 7Chai punlla imashna canataca, Mandaj Diosllami yachanga. Chaipica tutapash, punllapash na tiangachu. Shina cajpipash, cashnami tucunga: Ña chishajujpimi, micha punchayachinga. 8Chai punllapica, cashnapashmi tucunga: Jerusalenmandaca, causaita cuj yacucunami llujshinga. Chai yacucunaca, tamia punllacunapipash, rupai punllacunapipash chaupica, indi llujshimuj lado mama cuchaman, chaupica indi huashajuj lado mama cuchamanmi ringa. 9Mandaj Diosmi, tucui cai pachata jatun mandaj canga. Chai punllapica, shujlla Mandaj Diosmi tianga, paipaj shutipash shujllami canga. 10Tucui llactami, Geba shuti pueblomandaca, Jerusalén pueblo ura ladoman tiaj Rimón shuti pueblocaman yanga pamballa tucunga. Jerusalenga, jahuapimi canga. Chaipica, Benjaminbaj pungumandaca, punda pungucaman, Pirca tigranapi tiaj pungucamanmi causanajunga. Shinallata Hananeel shuti runapaj jatun torremandaca, jatun mandajpaj uvasta cutana pushtucunacamanmi causanajunga. 11Chaipimi aliguta causanajunga. Chaipica, ninanda nalicachi tucunaca, ima horapash na ashtahuan tiangachu. Ashtahuangarin Jerusalenbica, imatapash na manllashpami causanajunga.
12Jerusalenbi causajcunahuan macanajuj tucui gentecunataca, Mandaj Diosca cai ung:uihuanmi ninanda llaquichinga: Paicunapaj cuerpoca, shayanajujpillatami ismushpa huaglinga. Ñavi lulungunapash, chai ucupillatami chaquinga. Jallupash, shimipillatami tucuringa. 13Chai punllapica, cashnapashmi tucunga: Mandaj Diosllata ninan manllaita cachamujpimi, pai purallata ninanda manllarinajunga. Ali cumba purallata maquimanda japirishpami, paicunapaj cumbatallata maquita alsashpa macanga. 14Judá llactapi causajcunapash, Jerusalenbimi macanajunga. Chai muyundi llactacunapi causajcunapaj juyailla charishcacunata, orota, culquita, churajunacunataca, chaipimi ashtacata tandachinajunga. 15Gentecunaman cachamushca ung:uillatami, caballocunata, mulocunata, camellocunata, burrocunata, carpacunata shayachishca tianajuj pambacunapi tiaj tucui shuj animalcunatapash japinga.
16Shinallata Jerusalenbi causajcunahuan macanajungapaj tucui llactacunamanda vichai shamushpa, na huañushpa puchushcacunaca Jatun Mandaj, tucuita Mandaj Diosta mañangapajmi huatapi huatapi vichai shamunajunga. Diospaj carpacunata shayachishcamanda fiestata rurangapajmi shamunajunga. 17Cashnapashmi tucunga: Tucui cai pachapi causaj familiacunaca, Jatun Mandaj, tucuita Mandaj Diosta, Jerusalenbi mañangapaj na vichai shamushcamandami, paicunapaca tamiapash na tianga. 18Shinallata Egiptopi causaj puramanda maijan familia cashpapash, Jerusalenman na vichai shamujpica, paicunapajpash tamiaca na tiangachu. Chugllacunata rurana fiestaman na vichai shamuj llactacunataca, Mandaj Diosca jatun ung:uihuanmi llaquichinga. 19Egiptopi causajcuna juchata rurashcamandaca, shinami llaquita apanajunga. Shinallata tucui llactapi causajcunapashmi, chugllacunata rurana fiestaman na vichai shamushpa juchata rurashcamandaca, llaquita apanajunga.
20Chai punllapica, caballocunaca: “JUCHA ILLAJ MANDAJ DIOSPAJMI” nishpa escribishca campanacunatami aparishca purinajunga. Diospaj huasipi tiaj mangacunapash, altar ladopi tiajuj jatun tastacunashnallatami canga. 21Shinallata Jerusalenbi, Judá llactapi tiaj tucui mangacunapash, Mandaj Diospajlla shicanyachishcami canga. Diosman animalta cushpa huañuchijcunapash, chai mangacunata japij shamushpami, chai mangacunapi yanunajunga. Chai punllapica, tucuita Mandaj Diospaj huasipica, imata randijpash, jatujpash na ashtahuan tiangachu.
Currently Selected:
ZACARÍAS 14: QUII
Highlight
Share
Copy
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.