FILEMON 1
1
Alillachu capangui nishcami
1Jesucristomanda villajushpa, prezu tiajuj Pablomi cani. Caitaca, huauqui Timoteondimi, can juyashca Filemonman escribimunchi. Canga, ñucanchihuan Diospajta rurajmi cangui. 2Shinallata Apia shuti juyashca paniguman, ñucanchi cumba, alipacha villaj Arquipo shuti huauquiguman, cambaj huasipi tandanajuj crijcunamambashmi, caitaca escribinchi. 3Ñucanchi Taita Diospash, Apunchi Jesucristopash ninan juyaita, casilla ali causaiguta cangunaman carachunmi munanchi.
Alipacha crij cashpami, Filemón shuti runa juyaita charishca
4Ñuca Taita Diosta mañajushpaca, canda yariashpami, pashi nijunilla. 5“Apunchi Jesustami juyajun, alipacha crijmi, Diospajlla causajcunatapash, tucuillatami juyajun” nijtami, canmandaca uyarcani. 6Can crishcata villajushcapash aliguta pactachunmi, Diosta mañajuni. Shinallata Cristo Jesusmanda imagutapash carashpa alita can rurajuchunmi mañajuni. 7Cambaj juyaimandami, ñucanchipash ninandapachami cushijunajunchi. Quiquin huauquigumandami, Diospajlla causajcunapaj shungupash cushichi tucushca.
Pabloca, Onésimo shuti runagutaca cutin chasquipangui nishcami
8Shina ali cajta yachashpami, Cristomanda ushaita charishpa, can imatalla rurachumbash mandai ushanilla. 9Ashtahuangarin candaca juyashpami yarichijupani. Ña rucuyajuj Pablomi cani. Jesucristomanda villajushpami, cunangarin prezu tiajuni. 10Caipi prezu tiajujpimi, Onésimo shuti runaguca crishpa, ñuca huahuashna tucurca. Paitaca canmanmi mingapani.
11Pundaca, Onésimo runaguca imapajllapash nalichu cashca. Ashtahuangarin cunanga, cambajpash, ñucapajpash ñami alipacha tucushca. 12Paitami cambajman cutin cachamujuni, ñucatashnalla chasquipangui ninimi. 13Ali villaita villajushcamanda ñuca prezu tiajujpi, cambaj randi ñucata servishpa quedachunmi, Onésimo runagutaca munarcani. 14Ashtahuangarin can nara imatapash nijpillata, ñuca munaita rurangapaca na munarcanichu. Ñucata ayudangapaj munashpaca, ama ñuca nijpilla rurashpa, ashtahuangarin cambaj munaita rurapanguilla ninimi. 15Onésimo runaguca, cambaj huasimandaca ashacamanllami llujshishpa rijushcanga. Cunan can chasquijpica, causaita causaicamanmi canhuan causanga. 16Ashtahuangarin ama cambaj gañandashna charishpa, huauquitashna juyashpa charipangui. Ñucapash, paitaca ninandami juyani. Apunchi Jesusta crij cajpimi, paitaca gañandapash yalita juyana cangui.
17Ñucata cambaj cumba cajta yarishpaca, ñucatashna paitaca chasquipangui. 18Pai imatapash nalita rurashpa llaquichijpi, na cashpaca divita cunata charijpica, ñucaman villahuanguilla. Paimandaca ñucami ricupasha. 19Pablomi, ñuca maquihuambacha caitaca escribimuni. Paimandaca, ñucami tigrachipasha. Ashtahuangarin cambash ñucaman ruranatami charingui nishpaca, na yarichinichu. 20Ari huauquigu, Apunchi Jesusta crij cajpi ima alitapash canmanda japingapajmi munani. Apunchi Jesusta crij cashcamandaca, ñuca shungupi cushichihuangui nipanimi.
21Ñuca nijujtaca, canga cazunapacha cajtaca yachanimi. Cai ñuca nijujtapash ashtahuan yalishpa ruranatapash yachashpami, caitaca escribimuni. 22Ñucata mingachingapajpash alichijupangui. Ñucamanda canguna Diosta mañanajujta uyashpami, cangunapajman ñucata cachanata cushijushpa shuyajuni.
Aliguta causapanguichi, Diospash bendiciachun nishpami tucuchishca
23Cristo Jesusmanda villajushpa, ñucahuan prezu tiajuj Epafras shuti huauquipash, candaca alillachu capangui nijunmi. 24Ñucahuan Diospajta ruraj Marcos, Aristarco, Demas, Lucas shuti huauquicunapash, candaca alillachu capangui ninajunmi.
25Ñucanchi Apunchi Jesucristopaj ninan juyaica, cangunapaj espirituhuan cachunmi munani. Shina cachun.
Currently Selected:
FILEMON 1: QUII
Highlight
Share
Copy
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.