LUCAS 23
23
Jesustaca, Pilatopaj ñaupajmanmi apanajushca
(Mat. 27:1-2,11-14; Mar. 15:1-5; Juan 18:28-38)
1Chashna nishpallami, tucuilla chai gentecunaca jatarishpa, Pilatopaj ñaupajman Jesusta apashpa rinajurca. 2Pilatopajman chayashpaca, Jesusta juchachishpami, cashna villai callarirca:
—Cai runataca, ñucanchi llactapi causajcuna fiñanajui jatarichun yachachijujtami japircanchi. Paica, cashna nishpami yachachishpa purijun: ‘Cesarman impuestotaca, na cunachu canguichi. Ñucamari, jatun mandaj Quishpichij Cristo cani’ nijunmi— ninajurcami.
3Shina ninajujpimi:
—¿Canllu Judea llactapi causajcunata Jatun Mandaj cangui?— nishpa, Pilatoca tapurca.
Shina tapujpica, Jesusca:
—Canllata ñamari chashna ningui— nircami.
4Shina nijpimi:
—Cai runataca, ima nalita rurashcatapash na japinichu— nishpa, curacunata mandajcunamambash, gentecunamambash Pilatoca villarca.
5Shina nijpicarin ashtahuan ninanda juchachishpami, cashna ninajurca:
—Gentecuna fiñanajui jatarichunga, Galilea llactapimari, cai runaca caparishpa yachachishpa callarirca. Cunanga, cai Judea llactapipash, tucui muyundipimari chashnallata rurajun— ninajurcami.
Herodespaj ñaupajmanmi, Jesustaca apashca
6“Galilea” ninajujta Pilato uyashpami:
—¿Cai runaca, Galilea llactamandachu?— nishpa tapurca.
7Jesustaca, Galilea llactamanda cajta yachashpami, chai Galilea llactata mandaj Herodespajman, Pilatoca cacharca. Herodespash, chai punllacunapica, Jerusalenbimi carca. 8Herodesca, Jesusta ricushpami, ninandapacha cushijurca. Jesusmanda imatapash parlanajujta uyashpami Herodesca, Jesusta ricungapaj munashpa, unaitapacha shuyajurca. Paica, Jesús imatapash rurajtaca ricushallatami yashpami shuyajurca. 9Herodesca, Jesusta ricushpaca ninandami imatapash tapujurca. Ashtahuangarin Jesusca, imatapash na tigrachircachu. 10Chaipica, curacunata mandajcunapash, mandashca shimita yachachijcunapash, ninandapachami Jesustaca juchachishpa rimanajurca. 11Shinamandami Herodespash, paipaj soldacunapash Jesustaca, punchapamba churajunata churachishpa, yangapi churashpa na cazushpa asinajurca. Chashna rurashpami, Pilatopajman cutin tigrachishpa, Jesustaca cacharca. 12Chai punllami Pilatohuan, Herodeshuanga cutin ali tucunajurca. Paicunaca, pundaca fiñanajushpami causashca carca.
Jesustaca huañuchinapachami ninajushcami
(Mat. 27:15-26; Mar. 15:6-15; Juan 18:38—19:16)
13Chai jipami, curacunata mandajcunapash, llactata mandajcunapash, gentecunapash tandanajuchun, Pilatoca cayachun mandarca. 14Chaicuna tandanajujpimi, Pilatoca cashna nirca:
—Cangunami cai runataca: ‘Gentecuna fiñanajui jatarichunmi yachachijun’ nishpa apamurcanguichi. Cangunapash uyajtami, canguna juchachishcataca, cai runata tapuchircani. Ashtahuangarin nalita rurashcataca, imatapash na tarinichu. 15Cai runa nalita rurashcataca, Herodespash na tarishpami, ñucanchipajmanllata tigrachimushca. Ricuichi, cai runaca pai huañuchi tucungapaca, ima nalitapash na rurashcachu. 16Cunanga, astichishpallami cacharigrini— nijurcami.
17Pascua fiesta punllacuna chayamujpica, shuj prezu tiajuj runata cacharishpami Pilatoca, gentecunata cushichinata yacharca. 18Ashtahuangarin:
—¡Chai runataca huañuchilla, Barrabás shuti runatami cacharichun munanchi!— nishpami, tucuilla gentecuna ninanda caparinajurca.
19Chai Barrabás shuti runaca, pueblopi macanajuchishcamanda, shuj runata huañuchishcamandami, prezuna huasipi tiajurca. 20Pilatoca, Jesusta cacharingapaj munashpami, gentecunata cutin tapurca. 21Chashna tapujpicarin:
—¡Chai runataca, cruzpi chacatailla, chacatailla!— nishpami, gentecunaca ninandapacha caparinajurca.
22Shina caparinajujpimi, caihuanga ña quimsacaman tapushpa, Pilatoca cashna nirca:
—¿Cai runaca, ima nalitata rurashcayari? Pai huañuchi tucungapaca, ima nalita rurashcatapash na tarinichu. Cunanga, astichishpallami cachagrini— nircami.
23Ashtahuangarin gentecunapash, curacunata mandajcunapash:
—Chacataipacha— nishpa ninandapacha caparishpami, Pilatotaca misharca.
24Shinamandami Pilatoca, paicuna imata rurangapaj mañashcata rurachun saquirca. 25Shina nishpallami, paicuna cacharipai nishpa mañashca runatara cacharirca. Chai runaca, shujcunata macanajuchishcamanda, huañuchishcamandami, prezuna huasipi tiajurca.
Jesustaca, chacatashpami huañuchishca
(Mat. 27:32-56; Mar. 15:21-41; Juan 19:17-30)
26Jesusman cruzta apachishpa rinajushpami, pambamanda tigramujuj shuj runata tuparirca. Chai runamanmi, cruzta aparishpa Jesusta catishpa richun apachinajurca. Chai runaguca, Cirene pueblomanda Simón shuti runami carca. 27Jesusta catishpa rinajuj ashtaca gentecunaca, huarmicunapash ashtacacunami rinajurca. Paicunami, Jesustaca ninanda llaquishpa, caparishpa huacashpa catinajurca. 28Ashtahuangarin Jesusca, paicunata tigrarishpa ricushpami, cashna nijurca:
—Jerusalenmanda huarmicuna, ñucamandaca na huacanachu canguichi. Ashtahuangarin cangunamanda, cangunapaj huahuacunamandami, huacana canguichi. 29Ricuichi: ‘Na vijsayu tucushpa, huahuata na tarij huarmicunaca, ninanda cushijunguichi’ nina punllacunami chayamunga. 30Chai punllacuna chayamujpica, huañungapaj munashpami, urcucunataca: ‘Llapihuaichi’ ninajunga. Lomacunatapash: ‘Pambahuaichi’ ninajungami. 31Verde quirushna causajujtapash cashna llaquichinajushpaca, ¿chaquishca quirushna causajcunatacarin, imashnashi ashtahuan llaquichinga?— nijurcami.
32Jesusta huañuchingapaj apanajushpaca, huañuchij runacunatapash, ishcai puratami huañuchingapaj apanajurca. 33Uma Tullu shuti lomaman chayashpami, Jesustaca cruzpi chacatanajurca. Jesustaca chaupipi churashpami, shujtaca ali ladoman, shujtaca lluqui ladoman churashpa, huañuchij runacunatapash chacatanajurca. 34Chashna ruranajujpimi Jesusca, cashna nirca:
—Ñuca Taitalla, caicunaca na yachaimandami cashna ruranajun, cungapailla— nircami.
Soldadocunaca, paicunapura suerteta rurashpami, Jesuspaj churajunataca chaupirinajurca. 35Gentecunaca, imashna rurajtami ricushpa shayanajurca. Mandajcunapash, Jesustaca nalicachishpa asishpa ricushpami, cashna ninajurca:
—Shujcunataca quishpichircallami. Ñucanchita quishpichijuchun, Taita Dios agllashca Quishpichij Cristo cashpaca, paillata quishpiri ushanmanmi— ninajurcami.
36Soldadocunapash, Jesustaca na cazushpa asishpami, paipajman quimirishpa, vinagreta ufiachingapaj munanajurca. 37Chashna rurashpami:
—Judea llactapi causajcunata jatun Mandaj cashpaca, canllata quishpiriyari— ninajurca.
38Jesús chacatariajuj jahuapipash: “CAICA, JUDEA LLACTAPI CAUSAJCUNATA JATUN MANDAJMI” nishpami, tablapi escribishcata churashca carca. Chai shimicunataca griego, latín, hebreo rimaicunapi escribishcami carca. 39Jesushuan chacatai tucushpa huarcurianajuj puramanda nalita ruraj shuj runaca, paita ninanda nalicachishpami, cashna nijurca:
—Canga, Quishpichij Cristo cashpaca, canllata quishpirishpa, ñucanchitapash quishpichiyari— nircami.
40Shina nijpimi caishuj runaca, chai runata jarcashpa rimashpa cashna nirca:
—Taita Diostaca, ¿nachu canga manllangui? Cambash, chashnallatami ninanda llaquichi tucujungui. 41Ñucanchica nalita rurashcamanda, ninanda llaquita apanapacha cashpami, cashna llaquichi tucunajunchi. Ashtahuangarin cai runaguca, ima nalitapash na rurashcachu— nircami.
42Shina nishpallami, Jesustaca:
—Can mandangapaj shamushpaca, ñucata yarihuangui— nirca.
43Shina nijpimi Jesusca, chai runagutaca cashna nirca:
—Na llullashpami, candaca cashna nini: Cunanllatami, paraíso juyailla llactagupi ñucahuan cangui— nircami.
44Chaupi punllamandaca, chishi quimsa horascamanmi, tucui cai pachaca yana yana tucurca. 45Indipash yanayarcami. Diospaj huasi ucupi huarcushpa quilpashca jatun fachapash, chaupipimi liquirirca. 46Chai jipaca Jesusca, ninanda caparishpami:
—Ñuca Taitalla, cambaj maquipimi, ñuca espiritutaca mingapani— nirca.
Shina nishpalla huañurcallami. 47Chashna tucujujta patsaj soldadota mandaj ricushpaca, Taita Diosta ninanda alicachishpami:
—Cai runaguca, imatapash cashcatapacha rurajmi cashca— nirca.
48Ricungapajlla rishca gentecunapash, chashna tucujujta ricushpaca, ninanda llaquirishpa pechotapash huactarishpami tigranajurca. 49Ashtahuangarin Jesusta rijsijcunaca, Galilea llactamandapachami tucuilla paita cumbashpa shamurca. Chai huarmicunaca, chashna tucujtaca carumandami ricushpa shayanajurca.
Jesusta pambashcatami villajun
(Mat. 27:57-61; Mar. 15:42-47; Juan 19:38-42)
50Judea llactapi tiaj Arimatea shuti pueblomanda José runagupash, chaipimi carca. Paica, ali runagu cashpami, imatapash cashcatapacha rurashpa causajurca. Paica, mandaj puralla tandanajuj purami carca. 51Chaipura cashpapash Joseca, paicunalla parlarishpa nalita rurajpimi, napacha alichu nijurca. Paica, Taita Dios mandajuna punllacuna chayamunatami, cushijushpa shuyajurca. 52Chai runagumi, Pilatopajman rishpa, Jesús huañushcaguta pambangapaj mañarca. 53Paimi, Jesús huañushcaguta cruzmanda uriajuchishpa, jatun fachahuan pilluchishpa, jaca rumipi rurashca utujupi churarca. Chaipica, pitapash nara pambashcachu carca. 54Chai punllapica, samana punlla chayajujpi, imatapash tucuita aliguta alichina punllami carca. 55Galilea llactamandapacha Jesusta cumbashpa shamushca huarmicunapashmi, Jesús huañushcaguta apajujpica, catishpa rinajurca. Paicunami, Jesús huañushcata maijan utujupi churajtapash ricunajurca. 56Paicuna chaimanda tigrashpaca, mishquillagu ashnajuj jambicunatapash, aceitetapash aliguta alichishpallami, mandashca shimipi nijunshna samana punllapica samanajurca.
Currently Selected:
LUCAS 23: QUII
Highlight
Share
Copy
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.