LAMENTACIONES 2
2
Sionbi causajcunapaj llaquicunaca, Mandaj Diosmandami shamun
1¡Jatun Dios ñapash fiñarishpaca, Sion pueblotaca llaquinayaitamari yanayachirca!
Israelcuna juyaillagu cashcataca, jahua pachamandami alpaman urmachimurca.
Pai ñapash fiñari punllapica, paipaj chaqui saruna Siondaca, na yarircachu.
2Jatun Diosca, juchata na cungashpami tucuillata tucuchirca.
Ñapash fiñarishpami, Jacobopaj tucuilla carpacunataca tucuchirca.
Judá llactapi causajcunapaj shinlli torrecunataca, alpamanmi shitarca.
Mandajuj llactatapash, mandajtapashmi, pingaichishpa urai cumuchirca.
3Nina japirinshna fiñarishpami, israelcuna ninan ushaita charishcatapash, tucuillata tucuchirca.
Fiñajcunapaj ñaupajpipash, paipaj ali lado maquitaca, na mañachircachu.
Ninata japirishpa rupajunshnami, Jacobopaj tucui muyunditaca tucuchijurca.
4Paipaj arcotaca, fiñaj runashnami ali chutarca.
Ima juyailla tiashcataca, paipaj ali lado maquihuanmi, na ricunayachij runashna tucuillata tucuchirca.
Pai fiñarishcataca, ninata talinshnami Sionbi causajcunapaj carpacunapi talimurca.
5Jatun Diosca, fiñaj runashna tucushpami, israelcunataca tucuchirca.
Mandashpa tiajuna paicunapaj tucui huasicunatapashmi tucuchirca.
Paicunapaj shinlli torrecunatapashmi urmachirca.
Shina rurashpami, Judá llactapi causajcunapaj llaquicunatapash, huacaicunatapash ashtahuan mirachirca.
6Paicunapaj carpataca, huerta chaupipi chugllatashnami anchuchirca.
Paicuna tandanajuj pushtutapashmi tucuchirca.
Sionbi causajcunataca, jatun fiestacunatapash, samana punllacunatapashmi Mandaj Diosca cungachirca.
Nina japirinshna fiñarishpami, jatun mandajtapash, curatapash llujchishpa shitarca.
7Jatun Diosca, paipaj altartapashmi shitarca.
Paipaj huasitapash yangapimi churarca.
Chaimandami, mandashpa tiajuna paicunapaj huasi jatun pircacunata urmachinajuchunga, fiñajcunapaj maquipi churarca.
Paicunaca fiesta punllapishnami, Mandaj Diospaj huasipica caparinajurca.
8Mandaj Diosca, Sionbi causajcunapaj jatun pircataca, urmachinatapachami yarijurca.
Cordelta chutashpaca, na shuyashpami tucuillata tucuchirca.
Canlla lado jatun pircatapash, ucu lado jatun pircatapash, ishcandita llaquinayaita rurashpamari, ninandapacha huacananayaita saquirca.
9Chai pueblopaj pungucunatapash, alpapimari shitarca.
Jirru aldabacunatapash, faquishpamari tucuchirca.
Paipaj jatun mandajpash, paicunapaj mandajcunapash, mandashcacuna na tiaj shuj llacta purapimari causanajun.
Dios ima nishcata paicunaman villajcunapash, Mandaj Dios muscuipishnalla ricuchijpi, villanataca na tarircachu.
10Sionbi causajcunata mandaj rucucunapash, alpapimari upalla tiarinajurca.
Umapipash alpata churarishpami, cinturaspipash cañamuta huatarinajurca.
Jerusalenbi causaj jarihuan nara tacarishca cuitsacunapash, paicunapaj uma alpaman chayajtami, urai cumurinajurca.
11Ñuca llacta puracunaca, huahuacunapash, chuchujuj huahuacunapash pueblo plazacunapimi yarjaimanda huañunajurca.
Shinamandami, ñuca vijsa ucucunapash cuyurirca.
Ñuca shungupash, alpaman urmangatashna ninanda llaquirishpa huacajpimi, ñuca ñavipash amsayarca.
12Paicunapaj mamacunataca:
“¿Tandapash, vinopash maipita tian?” nishpami, chugrishcacunashna pueblo ñangunapi huañunalla tucushpa urmanajurca.
Mamacunapaj rigrapimi, samai tucurishpa huañunajurca.
13Jerusalenbi causajcunalla, ¿pitata chashna llaquicunata ricushcataca apamushayari?
¿Na cashpaca, piman rijchaj cangui nishatayari?
Jarihuan nara tacariashca cuitsashna Sionbi causajcunalla.
Cangunata cushichingapaca, ¿pihuanda chimbapurashayari?
Cambaj llaquica, mama cuchashna jatunmari.
¿Pita candaca alichi ushangayari?
14Cangunaman villajcunaca, yangacunata, musparinacunatami ricunajurca.
Chaimandami, canguna prezu apai tucunamanda na jarcangapaca, juchata rurashcatapash na ricuchinajurca.
Ashtahuangarin yanga villanacunata, chinganacunatami villanajurca.
15Ñanda tucui yalijcuna ricushpaca, canmandami maquita huactarinajurca.
Silbashpa, umata cuyuchishpami, Jerusalendaca cashna ninajurca:
“¿Cai pueblotachu, ima pandatapash na ruraj juyaillagu, tucui cai pachapi causajcuna cushijuna pueblo ninajun carca?” ninajurcami.
16Canda tucui fiñajcunami, paicunapaj shimita pascashpa, canda rimanajurca.
Asishpa ricushpa, quirucunatapash canirishpami, cashna ninajurca:
“Langanshna tucuchishunchi, cunanga ñucanchi shuyajushca punllapachamari chayamushca.
Ña tarinchimari, ña ricunchimari” ninajurcami.
17Mandaj Diosllatami, pai rurashapachami nishcataca rurarca.
Ñaupa huatacunamandapacha pai villachun cachamushcatami pactachirca.
Paica, juchacunata na cungashpami, tucuillata tucuchirca.
Canda fiñajcuna canda ricushpa cushijuchunmi, chashna rurarca.
Canda fiñajcunapaj ushaitapashmi, ashtahuan jatunyachirca.
18Paicunapaj shungupica, Jatun Diostami caparinajurca.
Sionbi causajcunalla, larca yacu rijunshna, tutapash punllapash viquita jichaichiyari.
Cangunapaj ñavitaca, ama samachishpa huacanajuichilla.
19Jatarishpa tutapash, cuidangapaj yaicuna horascunapi ninanda caparichiyari.
Taita Diospaj ñaupajpi yacuta talinshna, tucui shungu llaquirichiyari.
Cangunapaj huahuacunaca, tucui ñan pungucunapimi, yarjaimanda huañunalla tucunajun.
Paicunaman causaita cuchun, maquita vichai churashpa, Diosta mañaichiyari.
20Ricui, Mandaj Dioslla.
Pita cashna llaquichijushcatapash yaripairi.
Huarmicunaca, ¿paicuna ungushpa, juyaihuan viñachishca huahuacunatachu micunga?
¿Curapash, can ima nishcata villajpash, can Jatun Diospaj huasipillatachu huañuchi tucunga?
21Huahuacunapash, rucucunapash pueblo ñangunapimi huañushca sirinajurca.
Jarihuan nara tacarishca ñuca cuitsacunapash, ñuca huambragucunapash espadahuan huañuchijpimi urmanajurca.
Can ñapash fiñari punllapica, na llaquishpamari, cungata fitircangui.
22Ñuca manllarinacunataca, jatun fiesta punllapishnamari, tucui ladomanda cayamurcangui.
Can Mandaj Dios, ñapash fiñari punllapica, pipash na pacajushpa causaj quedarcachu.
Ñuca viñachishpa charishca huahuacunataca, ñucata fiñajcunami huañuchirca.
Currently Selected:
LAMENTACIONES 2: QUII
Highlight
Share
Copy
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.