HEBREOS 2
2
Quishpirinaca ninan juyaillapachami
1Shina cashcamandami ñucanchica, imata uyashcatapash, ashtahuan imata cashpapash ucha rurana canchi. Na chashna catishpaca pandarishunchimi. 2Ñaupa punllacunapi angelcuna villashca shimicunaca, napacha llullachu carca. Chaita na cazushpa nalita rurashcamandami, cuna cashcashnallata cujpi japinajurca. 3Cai juyailla quishpirinata nalicachishpa saquishpaca, ¿imashnata ninanda llaquichi tucunamandaca, pacajui ushashun? Imashna quishpirinatapash, Apunchi Jesusmi pundata ña villashca. Chai jipami, pai villashcata uyajcunaca, alipacha yachashpa villarca. 4Taita Diosca, chashnapachami nishpa paicunahuan villajushpami imatapash juyaillaguta ricuchinacunahuan, pipash na rurai ushanallacunahuan, imatapash juyailla ruranacunahuan, paipaj jucha illaj Espiritupaj munaihuan villajurca.
Juyailla quishpirinata callarichijca, Jesucristomi
5Mushuj llacta shamunamandami, cunanga villanajunchi. Chai llactata mandachunga Diosca, na angelcunaman ushaita carashcachu. 6Ashtahuangarin Dios escribichishca Shimipica, maijanllarimi shuj pushtupi cashna nishpa villajushca:
“Runaca, ¿ima cajpita paitalla yariangui,
na cashpaca huañuna aichayu runataca,
imamandata ricuj shamungui?
7Paitaca, ashamandallami na angelcunatashna rurashcangui.
Paitaca, juyailla coronata churachinshnami, ninanda alicachishcangui.
Paitaca, cambaj maquihuan rurashcacunata mandachunmi rurashcangui.
8Tucui imata cashpapash, paipaj chaquihuan
saruchishpami cazuchishcangui” nijushcami.
Tucui imatapash cazuchishpa charijushpami, imallapash paita na cazushpa tiajuchunga, na saquirca. Ashtahuangarin tucui imatapash cazuchijujtaca, nara ricui ushashpami causanchi. 9Ashtahuangarin Jesustaca, ashamandalla na angelcunatashna rurashcatami ricunchi. Ninan llaquita apashpa huañujpimi, Jesustaca juyailla coronata churachinshna ninanda alicachirca. Taita Diospaj ninan juyaimandami, tucuicunamanda huañunata munachun, chashna rurarca.
10Ashtahuangarin ima cashpapash tucuita ruraj Diosmandallami, tucui imapash tiajun. Paica, paipaj huahuacuna tucujpi ashtacacunata, paipaj punchapamba llactaman Jesucristo pushachunmi munan. Jesucristoca, llaquicunata apashpa aliguta pactachishpami, pailla quishpichingapaj callarishca. 11Diospajlla causachun rurajpash, Diospajlla causajcunapash, shujlla Taitapajmi canchi. Chaimandami Jesusca, ñucanchita huauquicuna, panicuna ningapaca, na pinganayachin. 12Paillatami cashna nijushca:
“Cambaj shutitami, ñuca huauquicunaman villasha.
Tandanajushcapaj chaupipimi, candaca alicachisha” nijushcami.
13Cashnatapashmi nijushca:
“Diostallami yariashpa causasha” nijushcami.
Cutimbashmi cashna nijushca:
“Ricuichi, Taita Dios ñucaman carashca
huahuacunandimi, caipi cani” nijushcami.
14Chai huahuacunaca aichatapash, yahuartapash charinmi. Shinallatami Jesuspash aichayu, yahuaryu tucurca. Huañuita mandana ushaita charij diablota, Jesús huañushpa tucuchingapajmi, chashna tucurca. 15Shinallata huañunata manllashpa, tucui causaipi huatai tucushcashna causajcunata cacharingapajmi, chashna tucurca. 16Paica, angelcunataca napacha ayudarcachu. Ashtahuangarin taita Abrahambaj miraicunatami ayudarca. 17Chaipajmi Jesusca, imapi cashpapash, paita crijcunashnallata tucuna carca. Shina tucushpami, Taita Diospajta rurashpa, ninanda llaquij cashpa, tucuita pactachij cashpa, curacunata jatun mandaj tucurca. Shina tucushpami, gentecunapaj juchacunatapash anchuchirca. 18Jesusllatapashmi pandachingapaj munaj llaquicunata japirca. Shinamandami, pandachi tucugrijujta ayudangapaca, paica ninan ushaita charin.
Currently Selected:
HEBREOS 2: QUII
Highlight
Share
Copy
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.