EZEQUIEL 3
3
1Chaipica, cashnami nihuarca: “Huañuna aichayu runa. Canga, ima tiarishcata micunguilla, cai pillushca caratapash micuilla. Chai jipaca, israelcunapajman rishpa villagri” nihuarcami. 2Shina nijpi ñuca shimita pascajpimi, chai pillushca carata micuchihuarca. 3Chai jipaca, cashnami nihuarca: “Huañuna aichayu runa. Canman ñuca carashca cai pillushca carata micushpa, cambaj vijsapipash, chunllulicunapipash jundachi” nijpimi micurcani. Chaita micujpica, ñuca shimipica, balun mishquishna mishqui mishquigumi carca. 4Chai jipaca, cashnami nihuarca: “Huañuna aichayu runa. Israelcunapajman rishpa ñuca imatalla nishcata villagri. 5Candaca, na entendi ushanalla rimaita rimajcunapajman, na parlai ushanallata parlajcunapajmanga na cachajunichu. Ashtahuangarin israelcunapajmanmi cachajuni. 6Na entendi ushanalla rimaita rimaj, ashtaca gentecunapajman, na parlai ushanallata parlajcunapajmanga, na cachajunichu. Paicunapajman cachajpirapash, paicunaca can rimashcata uyanmanmi. 7Ashtahuangarin israelcunaca, can villashcataca, na uyangapaj munangachu. Paicunaca, ñucata uyangapaca na munajcunami. Tucui israelcunami shinlli umacuna, shungupi yuyai illajcuna. 8Ricui, ñucami candaca paicunahuan ñavi ñavi rimachun shinllichircani. Paicunahuan chimbapura rimachunmi shinllichircani. 9Cambaj umataca, shinlli rumitapash yali diamantetashnami rurarcani. Paicunataca ama manllanguichu. Paicunapaj ñaupajpi cashpapash, ama manllaringuichu. Paicunaca na cazujcunami” nihuarcami.
10Shina nishca jipaca, cashnatapashmi nihuarca: “Huañuna aichayu runa. Ñuca imatalla villashca tucui shimicunataca, cambaj shungupi chasquingui. Cambaj rinrihuambash, aliguta uyangui. 11Chai jipaca uyachun, ama uyachumbash, prezu tianajuj cambaj llacta purapajman yaicushpa: ‘Mandaj Jatun Diosca, cashnami nin’ nishpa villangui” nihuarcami.
12Chai jipami Diospaj Espirituca, ñucata jatarichihuarca. Shina jatarichijpimi ñuca huashaman ninanda culun ninshna shinllita rimashpa, cashna nijuj uyarirca: “Mandaj Diospaj punchapambaguca, pai tiajushca pushtupillata alicachi tucushca cachun” nishpa rimashcami uyarirca. 13Shinallata chai causaita charijcunapaj alaspash caishujhuan, chaishujhuan huactarishpa huacajtami uyarcani. Paicunapaj ñaupajpica, ruedacunapashmi huacanajurca. Shinllita culun nijpashmi uyarirca. 14Diospaj Espiritumi, ñucataca jatarichishpa japihuarca. Ñucaca, ñuca shungupica jatunda llaquirishpami rircani. Ashtahuangarin Mandaj Diospaj maquica, ñucapaca shinllipachami carca. 15Chai jipaca, Quebar shuti jatun yacu manñapi tiaj Tel-abib shuti pueblopi causanajuj prezucunapajmanmi chayarcani. Paicuna tiarishca pushtupillatami, ñucapash tiarircani. Chaipica, canchis punllatami, imatapash na rimai ushashpa, manllarishpa ricunman tiajurcani.
Chapariashpa, israelcunata cuidachunmi churashca
(Ez. 33:1-9)
16Ña canchis punlla tucujpimi, cashna tucurca: Mandaj Diosca cai shimicunatami, cashna nishpa villahuarca: 17“Huañuna aichayu runa. Candaca, israelcunata chapariashpa cuidachunmi churarcani. Ñuca shimihuan rimashcataca, aligutapacha uyangui. Paicuna ali tucuchun, ñucapaj randi shinllita tacuringui. 18Ñucaca, ñucata na manllaj runataca: ‘Huañunapachami cangui’ nijpipash, ñucata na manllaj runa nalita ruranata saquishpa causaita charichun, can na shinlli tacurijpica, nalita rurashcamandami huañunga. Ashtahuangarin paipaj yahuarca, cambaj jahuami canga. 19Ashtahuangarin ñucata na manllaj runa ali tucuchun shinllita can tacurishca jahua, nalita ruranamanda na anchurishpa, nali causaitapash na saquishpa, ñucapajman na tigrarishpaca, nalita rurashcamandami huañunga. Ashtahuangarin canga, cambaj almataca quishpichinguimi. 20Shinallata imatapash cashcatapacha ruraj runa, imatapash cashcatapacha ruranata saquishpa nalita rurajpi, nitijanshna pandashpa pai urmanata ñuca churajpica, paica huañungami. Pai ali tucuchun can na shinllita tacurishcamandami, pai juchata rurashcamanda huañunga. Imatapash cashcatapacha pai rurashcatapash, napacha yarishachu. Ashtahuangarin paipaj yahuarca, cambaj jahuami canga. 21Shina cashpapash, imatapash cashcatapacha ruraj runa ama juchata rurachun shinllita can tacurijpi, juchata na rurashpaca paica causangapachami. Ali tucuchun can shinllita tacurishcamandami causanga. Cambash, cambaj almataca cacharichi tucunguimi” nihuarcami.
Profeta Ezequielca, upami tucushca
22Chaipi cajpimi Mandaj Diosca, paipaj maquita ñuca jahuapi churashpa, cashna nihuarca: “Jatarishpa pambaman llujshi. Chaipimi canhuan parlasha” nihuarcami. 23Shina nijpimi ñucaca, jatarishpa pambaman llujshircani. Chaipimi, Quebar shuti jatun yacu manñapi punchapambaguta ricushcashnallata, Mandaj Diospaj punchapambaguta cutin ricurcani. Chashna ricushpami, cungurishpa alpaman chayajta cumurijurcani. 24Chai jipami, Diospaj Espíritu ñucapajman shamushpa, shinllitapacha shayachihuarca. Chaipimi, ñucaman parlashpa cashna nihuarca: “Cambaj huasi ucuman yaicushpa vicharigri. 25Huañuna aichayu runa. Ricui, candaca cabiacunahuan japishpami, chaicunahuan huatanajunga. Shinamandami paicuna purapica, na llujshi ushangui. 26Cambaj jallutaca, shimi ucu jahuaman llutajpimi, canga na rimai ushangui. Paicunata jarcashpa rimaitapash, na ushanguichu. Paicunaca, na cazujcunami. 27Ashtahuangarin cambaj shimitaca, rimashpallami cutin pascasha. Chaipica canga, cashna ningui: Mandaj Jatun Diosca, cashnami nin: ‘Maijambash uyangapaj munajcunaca uyachun. Na uyangapaj munajcunaca, ama uyachun’ ninmi ningui. Paicunaca na cazujcunami.
Currently Selected:
EZEQUIEL 3: QUII
Highlight
Share
Copy
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.