ÉXODO 40
40
Moisesmi, jatun carpata shayachishca
1Chai jipami Mandaj Diosca, Moisesman cashna nishpa villajurca:
2“Punda quilla callari punllapica, jatun carpata shayachinajuchun mandangui. Chaica, ñucahuan tuparina jatun carpami. 3Chai jipaca, imashna causanata yachachishca shimicunata alichishca arcata chaipi churangui. Chaitaca telahuan quilpangui. 4Mezataca, ucuman churashpa, aliguta alichishpa churangui. Shinallata candelerotapash ucuman churashpa, lamparacunapi michata japichingui. 5Inciensota cushnichina oro altartapash, imashna causanata yachachishca shimicunata alichishca arca ñaupajpi churangui. Cortinataca, jatun carpaman yaicuna pungu ñaupajpi huarcungui. 6Chai jipaca, animalcunata cushpa tucuillata rupachina altartapash, ñucahuan tuparina jatun carpaman yaicuna ñaupajpi churangui. 7Chaipaj catica jatun pailataca, ñucahuan tuparina jatun carpahuan, altarhuan chaupipi churashpa, chai pailapica yacuta jundachingui. 8Ña tucuchingapaca, patio muyunditapash aliguta rurangui. Shinallata cortinatapash, patioman yaicuna pungupi huarcungui.
9Chai jipaca, talishpa javina aceiteta japishpa, jatun carpapipash, chaipi tucui imalla tiashcacunapipash talishpa javingui. Jatun carpataca, chaipi tucui imalla tiashcacunandi, ñucapaj cachun shicanyachijpimi ñucapajlla canga. 10Shinallata animalcunata cushpa tucuillata rupachina altartapash, chaipi tucui imalla tiashcacunandi aceiteta talishpa javingui. Altartapash, ñucapajlla cachun shicanyachingui. Shina rurajpimi, ñucapajlla shicanyachishca altar canga. 11Shinallata jatun pailatapash, pailata churana bazatapash aceiteta talishpa javingui. Chaitapash ñucapajlla cachunmi, rurana cangui.
12Chai jipaca Aarondapash, paipaj churicunatapash, ñucahuan tuparina jatun carpa punguman pushashpami, yacuhuan armachina cangui. 13Aarondaca, ñucapajlla shicanyachishca churajunata churachingui. Paitaca, ñucapajtalla ruraj cura cachun aceiteta talishpa javishpa shicanyachingui. 14Chaipaj jipaca, paipaj churicunatapash cayashpa, túnica nishca churajunacunata churachingui. 15Paicunatapash, paicunapaj taitata aceiteta talishpa javishcashnallata, aceiteta talishpa javingui. Shina rurajpimi, ñucapajta ruraj curacuna canga. Aceiteta talishpa paicunata javishcapash, paicunapaj miraicunandi tucui causaipaj ñuca curacuna cachun javishcami canga” nijurcami.
16Moisesca, Mandaj Dios tucuita imashna mandashcashnallatami, chashnatapacha rurarca. 17Chashnami, cati huatapaj callari quilla punda punllapi, jatun carpata shayachishpa tucuchirca. 18Moisesca, jatun carpata shayachinajuchunmi mandarca. Chai carpapaj bazacunata churashpa, tablacunata churashpami, jatun caspicunatapash churachirca. Shinallata chai carpapaj pilarcunatapashmi shayachirca. 19Pilarcunata shayachishca jahuapimi, carpata jahualla churarca. Chai carpa jahuapipash, Mandaj Dios imashna Moisesta mandashcashnallatami, ashtahuan jahualla jatarca. 20Imashna causanata yachachishca shimicunatapash japishpami, arca ucupi churarca. Shinallata arcata huanduna vara caspicunatapash arcapi ali churachishpami, arca tapatapash arca jahuapi churarca. 21Chai jipami arcataca, jatun carpa ucupi churashpa telata huarcurca. Imashna causanata yachachishca shimicunata alichishca arcataca, Mandaj Dios imashna Moisesta mandashcashnallatami quilparca.
22Mezataca, Dioshuan tuparina jatun carpa ucupimi, cortinata huarcushca jahua ladoman, telata huarcushca canlla ladoman churarca. 23Chai mezapimi, Mandaj Diospaj ñaupajpi, Mandaj Dios imashna Moisesta mandashcashnallata tandacunata jilapi churarca.
24Candelerotapash, Dioshuan tuparina jatun carpa ucupillatami, meza ñaupajpi, cortinata huarcushca ura ladoman churarca. 25Lamparacunataca, Mandaj Diospaj ñaupajpimi, Mandaj Dios imashna Moisesta mandashcashnallata michata japichirca. 26Shinallata oro altartapash, Dioshuan tuparina jatun carpapillatami, telata huarcushca ñaupajpi churarca. 27Chai altar jahuapimi, Mandaj Dios imashna Moisesra mandashcashnallata, mishquillagu ashnajuj inciensota cushnichijurca.
28Shinallata carpaman yaicunapipashmi, cortinata huarcurca. 29Diosman animalcunata cushpa tucuillata rupachina altartapash, Dioshuan tuparina jatun carpaman yaicuna ladopimi churarca. Shina churashpami, Diosman cushpa tucuillata rupachina animaltapash, Diosman imata carashcatapash, Mandaj Dios imashna Moisesta mandashcashnallata rupachijurca.
30Jatun pailatapash, Dioshuan tuparina jatun carpahuan, altarhuan chaupipimi churarca. Shina churashpami, chai pailapica maillana yacuta jundachirca. 31Chaipimi Moisespash, Aaronbash, paipaj churicunapash, chai yacupi paicunapaj maquita, chaquita maillanajurca. 32Dioshuan tuparina jatun carpaman yaicungapaj, shinallata altarman chayangapaca, Mandaj Dios imashna Moisesta mandashcashnallatami maillanajurca.
33Ña tucuita rurashpa tucuchingapaca, jatun carpapaj patio muyunditapash, altarpaj patio muyunditapashmi jarcarca. Chai jipaca, patioman yaicunapi jarcana telatami churarca. Chashnami Moisesca, tucui ruranacunata tucuchirca.
Diospaj jatun carpa jahuapimi, fuyu tiarishca
(Núm. 9:15-23)
34Chai jipami, Dioshuan tuparina jatun carpataca, fuyu quilparca. Mandaj Diospaj punchapambapashmi, jatun carpapica jundarca. 35Dioshuan tuparina jatun carpa jahuapica, fuyu junda cajpi, Mandaj Diospaj punchapambapash, chai carpapi junda cajpimi Moisesca, na yaicui usharca. 36Fuyuca, jatun carpa jahuamanda ña vichai jatarijpimi, israelcunaca asha asha shamui callarinajurca. 37Ashtahuangarin fuyu ña vichai jatarijpica, fuyu jatarina punllacaman na ri ushanajurcachu. 38Ashtahuangarin Mandaj Diospaj fuyuca, punllapica jatun carpa jahuapimi carca. Tutapica ninami, paicuna asha asha rinacunapipash, tucuilla israelcuna ricujta chai jahuapillata carca.
Currently Selected:
ÉXODO 40: QUII
Highlight
Share
Copy
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.