ECLESIASTÉS 2
2
1Ñuca shungupica, cashnami yajurcani: “Cunanga, aliguta causashpa, ima charishcacunahuambash ninanda cushijushpami, imashna cajta ricusha” yajurcanimi. Ricuichi, ashtahuangarin chaipash yangallami. 2Asinataca: “Locomi tucungui” nircanimi. Cushijuitapash: “Chaica, ¿imapajta ali?” nircanimi. 3Shinallata vinota ufiashpa, ñuca cuerpota cushichingapajmi, ñuca shungupica munarcani. Shina rurashpami, ñuca shungupica alipacha yachajushca cashpa, juizu illaj canataca jarcarishpa purisha yajurcani. ¿Huañuna aichayu runacunapaca, paicuna causanajuj tucui punllacunapi, indi punllayachijuj cai pachapi imatalla paicuna rurashcapica, ima ali canata yachangacamnmi, chaita rurajurcani.
4Ñucaca, ashtahuanmi imatapash rurachijurcani. Huasicunatapash ñucapaj cachunmi rurachircani. Uvas chagracunatapash, ñucapaj cachunmi tarpuchircani. 5Huertacunatapash, jardingunatapashmi rurachircani. Chaicunapica, shuj shuj granocunata fucuj yuracunatami tarpurcani. 6Yuracuna viñanajuj bosquepi yacuta jichangapaca, yacu tanquecunatami rurachircani. 7Servij jaricunatapash, huarmicunatapashmi randircani. Ñuca huasipi huacharishca servijcunatapashmi charircani. Shinallata huarmi huagracunata, llamacunataca, Jerusalenbi ñucapaj punda tucui causajcuna charishcatapash yali ashtacatapachami charircani. 8Shuj jatun mandajcuna, shuj llactacunapi causajcuna culquita, orota imatalla paicuna charishcacunatami tandachishpa mundunarcani. Candaj jaricunatapash, candaj huarmicunatapashmi charircani. Tocanacunatapash shuj, shujtami charircani. Shinami ñucaca, huañuna aichayu runacuna cushijunshnallata, ninandapacha cushijurcani.
9Jerusalenbi ñucapaj punda causajcunataca, tucuita yali alicachi tucushcapash, ashtahuan charijpashmi tucurcani. Chai jahuapash, alipacha yachajushcataca ñucapi alichishca charijurcanillami. 10Ñuca ñavihuan imata ricushpa munashpapash, na jarcarircanichu. Ñuca shungupi imahuanlla cushijunamandapash, na anchurircanichu. Ñuca shunguca, imatapash rurashcahuanmi ninanda cushijurca. Ñuca imatalla rurashcamandaca, chaitami japircani.
11Chai jipami, ñuca maquihuan rurashcacunataca, tucuita ricujurcani. Shinallata chaicunata rurashpa, ninanda shaijujtapashmi ricujurcani. Ricuichi, tucui chaicunapash yangallami, yuyaita shaijuchingapajllami. Indi punllayachijuj cai pachapica, imapajpash na alichu.
12Chai jipaca, ali yachaita, musparinata, juizu illaj canata ricungapajmi tigrarircani. “Jatun mandajpaj jipa shuj jatun mandaj runaca, ¿imatashi mushujta rurai ushanga? Ña rurashca tiajtallatami ruranga” yajurcanimi. 13Imashnami michaca yana yana tuta yalin, chashnallatami juizu illaj canatapash, alipacha yachajushca canaca yali cajta ricurcani.
14Alipacha yachajushca runaca, aliguta ricushpami purin. Ashtahuangarin shinlli shungu runaca, yana yana tutapishnami purin. Shinallata caishujpajpash, chaishujpajpash ima cashpapash chashnallata tucunatami ricurcani. 15Chaita ricushpami, ñuca shungupica cashna yajurcani: “Shinlli shungu runa ima tucujpipash, chashnallatami ñucapash tucusha. Shina cashpaca, ¿imapajta alipacha yachajushca cangapaj, cunangaman trabajashcani? Ñuca shungupica, chaicunapash yangallatami yajurcanimi. 16Alipacha yachajushca runatapash, shinlli shungu runatapash pipash na causaita causaicaman yarinajunllachu. Shamui punllacunapica, tucuitami ña cunganga. Alipacha yachajushca runapash, shinlli shungu runapash huañunllatami” yajurcanimi.
17Indi punllayachijuj cai pachapi tucui imatalla rurashcapash fiñachingapajllami. Chaimandami, ñuca causaitapash millanayachircani. Tucuita ali yarijpica, chaicunapash yangallami, yuyaita shaijuchingapajllami. 18Shinallata, indi punllayachijuj cai pachapi tucui imatalla ñuca rurashcacunataca millanayachircanimi. Chaicunataca, ñucapaj jipa yaicuj mandajmanmi saquina cani. 19Ashtahuangarin ñuca alipacha yachajushca cashpa, indi punllayachijuj cai pachapi imatapash ninandapacha ñuca rurashcata japishpa mandashpa charij runaca, alipacha yachajushca runa canatapash, na cashpaca shinlli shungu runa canatapash, ¿pita yachan? Chaicunapash yangallami.
20Indi punllayachijuj cai pachapi ñuca ali yachajushcahuan imatapash ninandapacha rurashpa trabajashcapash, yangalla cajta yarishpami, ñuca shungupica imata yaritapash na ushajurcani. 21Runaca, alipacha yachajushca cashcahuan ali yachajushcahuan, aliguta ricushpami, imatapash ruran. Pai imatalla charishcataca, napash trabajashpa na ayudaj runamanmi saquin. Chaipash yangallami, chaica ninan nalipachami.
22Ashtahuangarin indi punllayachijuj cai pachapica, paipaj shungupash shaijujta imatapash ninanda ruraj runaca, pai imatalla rurashcamandaca, ¿imatata japin? 23Paicunapaj tucui causai punllacunapimi, imapash llaquitalla, nanaitalla apanajun. Paicuna imata rurashcapash fiñachingapajllami. Paicunapaj yuyaica, tutapash na samanllu. Chaicunapash yangallami.
24Runapaca, imapash ashtahuan alica na tianllu. Ashtahuangarin micushpa, ufiashpa cushijunami ali. Shinallata pai trabajashcamandami, paipaj shungupipash cushijun. Shina cushijunatapash, Taita Diosllata carajtami ricurcani. 25¿Pita ñucata yali alicunata micunyari? ¿Pita ñucata yali ali causanyari? 26Taita Diosca, paipaj ñaupajpi aliguta causaj runamanllami ali yuyaita, ali yachajunata, cushijuita caramujun. Ashtahuangarin juchata ruraj runataca, ashtacata charishca jahuapash jahuan jahuan tandachishpa alichijuchunmi saquin. Chai tandachishcacunataca, Taita Diospaj ñaupajpi aliguta causaj runaman carangapajmi, chashna saquinlla. Chaicunapash yangallami, yuyaita shaijuchingapajllami.
Currently Selected:
ECLESIASTÉS 2: QUII
Highlight
Share
Copy
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.