COLOSENSES 4
4
1Amocunapash, cangunata servijcunataca imatapash cashcatapacha aligutallami rurana canguichi. Cangunapajpash shuj Amo jahua pachapi tiajta yachanami canguichi.
2Diosta mañanataca, cungaitapash na cungashpami, pashi nishpa mañanajunalla canguichi. 3Shina mañanajushpami, ñucanchimandapash Cristomanda nara uyashca Shimita villanajujpi, punguta pascanshna Apunchi Jesús yarichijuchun, Diosta mañanajunguichi. Paimanda villajushpami, prezu tiajuni. 4Pai mingashcataca tucuita villajuchun, ñucamanda mañapanguichi.
5Villana cajpica, na crijcunahuan cashpapash, ama punlla yanga yalichunmi, aliguta yarishpa villajuna canguichi. 6Pi imata tapuchijpipash, cachihuan mishquiyachishpa churashcatashnami aliguta villangapaca, ña yachajushcalla purina canguichi.
Aliguta causapanguichi nishpami tucuchishca
7Ñucanchi juyashca Tíquico shuti huauquimi, ñuca imashna causajujtapash, cangunaman tucuita villanga. Paica, Apunchi Jesusmanda ñucahuan villashpami, alipacha pactachishpa purijun. 8Cangunaman villashpa cushichishpa, canguna imashna causanajujtapash yachashpa villangapaj tigramuchunmi, paitaca cachamuni. 9Canguna puramanda shamushca, tucuita pactachij, ñucanchi juyashca Onésimo shuti huauquitaca, Tíquico shuti huauquihuanmi cachamuni. Caipi ima tucujujtapash, paicunami tucuita villanga.
10Aristarco shuti huauquipash, ñucahuanmi prezu tiajun. Bernabepaj sobrino huauqui Marcospashmi, cangunataca alillachu capanguichi nijun. Marcos imata ruranatapash, cangunapajman ñami cachamurcani. Pai chayamujpica, aliguta chasquipanguichi. 11Justo ni tucushca Jesús shuti huauquipash, cangunataca alillachu capanguichi nijunmi. Circuncisión nishcata rurashca puramandaca, paicunallami Taita Dios mandajujmanda, caipi ñucahuan yachachinajun. Chaimandami ninandapacha cushijuni. 12Canguna puramanda shamushca Epafras shuti huauquipash, alillachu capanguichi ninmi. Paica, Cristota servij cashpami, cangunamandaca cungaitapash na cungashpa, Diosta ninanda mañariajun. Taita Dios munashcashna shinllitapacha shayarishpa, ima pandatapash na rurashpa causachunmi mañajun. 13Cangunatapash, Laodicea shuti, Hierápolis shuti pueblocunapi causaj crijcunatapash, Epafras huauquica alipachami yariajun. Paitaca, ñuca ricushcapacha cashpami villani. 14Ñucanchi juyashca jambij doctor Lucaspash, Demas shuti huauquipashmi, cangunataca alillachu capanguichi ninajun.
15Laodicea shuti pueblopi causanajuj huauquicuna, panicunatapash, Ninfas shuti huauquitapash, paipaj huasipi tandanajuj crijcunatapash, alillachu capanguichi nishcami nishpa villapanguichi. 16Cai cartata canguna purapi ricushca jipaca, Laodicea pueblopi tandanajuj crijcunaman leyishpa uyachipanguichi. Shinallata Laodicea puebloman ñuca cachashca cartatapash, japishpa ricupanguichi. 17“Apunchi Jesuspajta rurachun mingashcataca, cazushpa pactachingui” nishcami nishpa, Arquipo shuti huauquimambash villapanguichi.
18Alillachu capanguichi nishpaca Pablomi, ñuca maquihuambacha caitaca escribimuni. Ñuca prezu tiajujtaca, ama cungashpa yarihuanguichi. Diospaj ninan juyaica, cangunahuan cachunmi munani. Shina cachun.
Currently Selected:
COLOSENSES 4: QUII
Highlight
Share
Copy
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.