2 CRÓNICAS 3
3
Salomonmi, Diospaj huasita shayachishca
(1 Rey. 6:1-38)
1Salomonga, Jerusalenbi tiajuj Moriah shuti urcupimi, Mandaj Diospaj huasita shayachi callarirca. Chai urcutami, paipaj taita Davidman ricuchishca carca. Jebuseopura Ornán shuti runapaj trillana pambapi David alichishca pushtupimi shayachi callarirca. 2Salomonga, ñami chuscu huatata mandajurca. Chai huatapaj ishcai quilla, ishcai punllapimi chai huasitaca shayachi callarirca.
3Taita Diospaj huasita shayachingapaj, ucu callariman Salomón medishcacunaca, caicunami: Callaripica, ishcai chunga canchis metromi carca. Anchopaca, iscun metromi carca. 4Diospaj huasi ñaupajpi corredorca, tucui chai huasi anchoshnallata iscun metro jatunmi carca. Vichaiman medijpica, picha chunga chuscu metromi carca. Chai huasi ucu pircacunataca, ashtahuan ali orohuanmi jahualla quilparca. 5Diospaj huasi ucu jahuataca, ciprés tablacunahuanmi quilparca. Chai tablacunataca, ashtahuan ali orohuanmi jahualla quilparca. Chaipica, palmera quirucunata, cadenacunatami rurachirca. 6Shinallata chai huasita juyaillaguta rurangapaca, juyailla rumicunahuanmi jahualla quilparca. Orocunaca, Parvaim shuti llactamandami carca. 7Chashnami, Diospaj huasi ucu vigascunata, umbralcunata, pircacunata, pungucunataca, orohuan jahualla quilparca. Chai pircacunapica, querubín nishcacunatami rurachirca.
8Diospajlla shicanyachishca ucutapash, chashnallatami rurachirca. Chai ucuca, Diospaj huasi chimba purapi corredorshnallata, iscun metro jatunmi carca. Anchomambash, iscun metrollatami carca. Chai ucutapash, chuscu patsaj pusaj quintalta pezaj, ashtahuan ali orohuanmi jahualla quilparca. 9Oro clavocunataca, chunga shuj gramo yalimanda callarishpa, picha patsaj canchis chunga gramocamanmi pezarca. Shinallata altibajopi ucucunatapashmi, orohuan jahualla quilparca.
10Diospajlla shicanyachishca ucupipash, ishcai querubingunatami caspimanda rurachirca. Chaicunatapashmi, orohuan jahualla quilparca. 11Chai querubingunapaj alascunaca, iscun metro jatunmi carca. Shuj alasca, ishcai metro ishcai chunga picha centimetromi carca. Chai alasmi, chai ucu pircapi tupashca carca. Caishuj alaspash, chashnallatami carca. Chai alasmi, caishuj querubinbaj alas pundahuan tuparijurca. 12Shinallata caishuj querubinbaj shuj alaspash chashnallatami ishcai metro, ishcai chunga picha centimetrota charirca. Chai alasmi, chai ucu pircapi tupashca carca. Caishuj alaspash, chashnallatami carca. Chai alasmi, caishuj querubinbaj alas pundahuan tupashca carca. 13Chai querubingunaca, paicunapaj alascunataca iscun metro jatundami chutashca shayanajurca. Chai querubingunaca, Diospajlla ucu ladoman ñavimi shayanajurca. 14Shinallata cortinacunatapashmi, azul telahuan, morado telahuan, yana puca telahuan, lino telahuan rurachirca. Chai telacunapipash, querubingunatami bordachirca.
Ishcai pilarcunatami rurachishca
(1 Rey. 7:15-22)
15Diospaj huasi ñaupajpica, chunga picha metro, canchis chunga picha centimetrota charij, ishcai jatun pilarcunatami rurachirca. Chai pilarcunapaj umapi churashca capitel nishcacunaca, ishcai metro ishcai chunga picha centimetromi carca. 16Shinallata cadenacunata rurachishpami, Diospaj huasi chai pilarcunapaj umapi tianajuj capitelcunapi muyuchishpa churarca. Patsaj granadillas nishcacunatapashmi rurachirca. Chaicunataca, chai cadenacunapimi muyundi huarcurca. 17Jatun pilarcunataca, Diospaj huasi ñaupajpimi, shujtaca ali ladoman, caishujtaca lluqui ladoman shayachirca. Ali ladoman churashca pilartaca, Jaquín shutitami shutichirca. Lluqui ladoman churashca pilartaca, Boaz shutitami shutichirca.
Currently Selected:
2 CRÓNICAS 3: QUII
Highlight
Share
Copy
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.