1 CRÓNICAS 29
29
1Chai jipaca, jatun mandaj Davidca, chaipi tucui tandanajushcacunatami cashna nijurca: “Taita Diosca, ñuca churi Salomondallami agllashca. Paica, chairalla viñai huambragumi. Ashtahuangarin chai huasita shayachinaca, shinllipachamari. Chai huasica, na runapaj huasichu. Ashtahuangarin Mandaj Taita Diospaj huasimi. 2Ñucaca, tucui ushaihuanmi, ñuca Taita Diospaj huasita shayachingapaca, tucuita alichijurcani. Oromanda imatalla rurachumbash orota, culquimanda imatalla rurachumbash culquita, broncemanda imatalla rurachumbash bronceta, jirrumanda imatalla rurachumbash jirruta, caspimanda imatalla rurachumbash caspitami tandachijurcani. Shinallata ónice nishca rumicunatapash, shuj juyailla rumicunatapash, yana rumicunatapash, shican shican color rumicunatapash, mármol nishca rumicunatapashmi, ashtacata tandachijurcani. 3Chai jahuapash ñuca Taita Diospaj huasita juyaimandami, ñuca imatalla charishcacunata alichina ucupi orota, culquita alichishca charijuni. Diospaj huasita shayachingapaj tucuita alichishca jahuapashmi, ñuca Taita Diospaj huasipaca, chai alichishcacunatapash curcani. 4Ofir shuti llactamanda, ishcai huaranga chuscu chunga quintal orotapashmi curcani. Diospaj huasi ucu patacunata, culquihuan jahualla quilpangapaca, ashtahuan ali culquitami, chuscu huaranga canchis patsaj sucta chunga quintalta curcani. 5Oromanda imata rurachumbash orota, culquimanda imata rurachumbash, culquitami carani. Chaicunahuanmi imata cashpapash, aliguta ruranata yachajcunaca, juyailla ruranajunga. Cunanga, ¿pita cangunapaj munai, Mandaj Diosman imagutapash carangapaj munanguichi?” nijurcami.
6Shina nijujpimi, familiacunata mandajcunapash, Israel aillucunata mandajcunapash, huaranga soldadocunata mandajcunapash, patsaj soldadocunata mandajcunapash, jatun mandajpaj jazindapi tucuita ricujcunapash, paicunapaj tucui munaihuan Diosman caranajurca. 7Taita Diospaj huasipi servinacunapaca, quimsa huaranga chuscu patsaj quintal orota, chunga huaranga dracma nishca orocunata, sucta huaranga pusaj patsaj quintal culquita, chunga ishcai huaranga ishcai patsaj chuscu chunga quintal bronceta, chuscu patsaj quintal jirrutapashmi caranajurca.
8Shinallata juyailla punchapamba rumicunata charijcunapash, tucuicunami Mandaj Diospaj huasipillata alichinajuchun, Gersonbaj miraipura Jehiel runapaj maquipi cunajurca.
9Gentecunaca, paicunapaj tucui munaihuan carashcamandami, ninanda cushijunajurca. Paicunaca tucui shunguhuan, paicunapaj tucui munaihuanmi, Mandaj Diosman caranajurca.
10Shinallata jatun mandaj Davidpash, ninandami cushijurca. Shina cushijushpami, tucui chaipi tandanajushcacunapaj ñaupajpi, Mandaj Diostaca cashna nishpa alicachijurca: “Ñucanchi ñaupa taita Israelpaj Mandaj Taita Dioslla, canga causaita causaicamanmi alicachi tucujungui. 11Mandaj Dioslla, tucuita yali juyaillapacha canapash, ushaita charinapash, punchapamba canapash, tucuita mishanapash, alicachi tucunapash cambajmi. Jahua pachapi tucui imalla tiajpash, cai pachapi imalla tiajpash cambajmi. Mandaj Dioslla, tucuita mandanapash cambajmi. Canga, tucuita yali jatunyachi tucushcami cangui. 12Canmi charijyanatapash, alicachi tucunatapash cachamungui. Canmi, tucui imatapash mandajungui. Fuerzata charinapash, tucui ushaita charinapash, cambaj maquipimi. Tucuicunata jatunyachinapash, ushaita caranapash cambaj maquipillatami. 13Ñucanchi Taita Dioslla. Chaimandami cunanga, cambaj juyailla shutigutaca candashpa alicachinajunchi. 14Ñucapash, ñuca mandajuj tucui gentecunapash, tucui cai alicunata ñucanchi munaihuan canman carangapaca, ¿imata canchiyari? Tucui imagupash cambajllatami. Can caramujpi japishcatallatami, canman caranajunchi. 15Cambaj ñaupajpica, tucui ñucanchi ñaupa taitacunashnallata, shuj llactamanda runacunashna maimandapash shamuj runacunashnami canchi. Ñucanchi causai punllacunapash cai pachapica, llandunshna ñapash chinganllami.
16Ñucanchita Mandaj Taita Dioslla, jucha illaj cambaj shutita alicachina huasita shayachingapajmi, cai tucuitaca tandachishcanchi. Chaicunataca, cambaj maquimandami japircanchi. Tucuilla cambajllatami. 17Ñuca Taita Dioslla. Tucuicunapaj shunguta callarishpa ricujujtapash, imapash ali cajtalla munajtapash yachapanimi. Chaimandami, ali shunguhuan yarishcashnallata, tucui ñuca munaihuan tucui caicunataca curcani. Cunanga, caipi tandanajushca can agllashcacunapash cushijuihuan imagutapash canman caranajujtami ricupani. 18Ñucanchi ñaupa taita Abrahambaj, Isaacpaj, Israelpaj Mandaj Taita Dioslla. Can agllashcacunapaj shungutaca, paicunapaj munai canda chashna servinajuchun, causaita causaicaman chai ali yuyaita cushpa charipangui. Canda yariashpa causanajuchun, paicunapaj shungupi yarichipangui. 19Shinallata ñuca churi Salomonmambash, ima pandatapash na yarij shunguta carapangui. Shina carajpimi, can mandashcacunata, imashna causanata can yachachishcata, pactachinajuchun can cushca shimicunataca pactachishpa causai ushanga. Tucui imata rurachumbash, ñuca ña tucuita alichishca cambaj huasiguta shayachijuchumbash, chashna shunguta carapangui” nijurcami.
20Shina nishca jipami Davidca, tucui chaipi tandanajushcacunataca cashna nirca: “Cunanga, cangunata Mandaj Taita Diosta alicachinguichi” nircami. Shina nijpimi, tucui tandanajushcacunaca, paicunapaj ñaupa taitacunata Mandaj Taita Diosta alicachinajurca. Chai jipaca, Mandaj Diospaj ñaupajpipash, jatun mandaj Davidpaj ñaupajpipash, cungurishpami alicachinajurca. 21Chai jipami, Mandaj Diosman animalcunata cushpa huañuchinajurca. Shinallata cayandi punllami, Mandaj Diosman animalta cushpa tucuillata rupachinajurca. Huaranga shicuta, huaranga jari llamata, huaranga maltun llamatami, vinota talishpa tucuillata rupachinajurca. Shinallata tucui israelcuna carashca ashtaca animalcunatapashmi, Diosman cushpa huañuchinajurca. 22Chai punllapica, Mandaj Diospaj ñaupajpi micushpa ufiashpami, ninanda cushijunajurca. Chai jipami, Davidpaj churi Salomondaca, israelcunata jatun mandaj cachun, juyailla churajunaguta cutinllata churachinajurca. Sadoc shuti curataca, Mandaj Diospaj ñaupajpi aceiteta talishpa javishpami, curacunata mandaj cachun churanajurca. 23Chashna rurajpimi Salomonga, Mandaj Dios cushca tiarinapica, paipaj taita Davidpaj randi tiarirca. Paica, tucui imapipash alimi llujshirca. Chaimandami tucui israelcuna, paita aliguta cazunajurca. 24Tucui mandajcunapash, ninan ushaita charij mandajcunapash, jatun mandaj Davidpaj tucui caishuj churicunapashmi, jatun mandaj Salomondaca alicachinajurca. 25Mandaj Diosca Salomondaca, tucui israelcunapaj ñaupajpimi ninanda jatunyachirca. Pai mandana llactapica, alicachi tucunatami curca. Israelcunata paipaj punda mandanajushca jatun mandajcunaca, pipash na paishnaca tiarcachu.
David huañushcatami villajun
(1 Rey. 2:10-12)
26Isaí runapaj churi Davidca, chashnami tucui israelcunata mandajurca. 27Paica, chuscu chunga huatatami, Israel llactataca mandajurca. Canchis huatataca, Hebrón shuti pueblopimi mandajurca. Quimsa chunga quimsa huatataca, Jerusalenbimi mandajurca. 28Paica, ashtaca punllacunata causashpa, ña rucugupacha cashpami huañurca. Paica, ninan charijpash, alicachi tucushcapashmi carca. Pai huañujpica, paipaj churi Salomonmi paipaj randi mandajurca.
29Punda punllacuna, jipa punllacuna jatun mandaj David tucui imata rurashcacunaca, Dios ricuchishcata villaj Samuelpash, Dios ima nishcata villaj Nataán runapash, Dios ricuchishcata villaj Gad shuti runapash escribishca, imashna causashcata villajuj libropimi tiajun. 30Chai libropica, pai mandashcamandapash, pai ima tucushcamandapash, israelcuna ima tucushcamandapash, chai tucui llactacuna ima tucushcamandapashmi escribishca tiajun.
Currently Selected:
1 CRÓNICAS 29: QUII
Highlight
Share
Copy
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.