Iiḍighi 28
28
Ẹpe Mạlta
1Yoor mokpetenaan opunughu, kụ ogbi olegheri mọ ekpu-ogbo phọ ughol mọ ạMalta. 2Ạbuo ẹmha phọ ụpham ni iyoor egey ẹphamam. Ọlophia rꞌosipheeny phọ ịphughan ni, kụ bịdi ọkpooni nịan mọ yoor ọonma. 3ẠPol ạki abunughi ịpe aakpomoghi ratumughi ghan pạ ạnian phọ, kụ ạḍiḅom eghiilaan ẹghologhol ạnian phọ emite, kụ eghiiny ḍịghaagh ọdi. 4Ạbuo ẹmha phọ ọmiin bọ dị ạḍiḅom mọ rẹeghelaan pạ ạḍighaagh phọ ọdi, oniin ạḅeni ni nyoniin mọ, “Ịparanaan ílho, oye phọ ọphon phọ ọkoom-enu ni. Ọdi makpetenaan ni oologh phọ, kụ obana phọ ómeera ni mọ ọdi ạrol.” 5Kụ ạPol azin ḍịghaagh ọdi kụ ẹkaraph-ịyaar phọ ẹghar esuma ologhi ạnian phọ, kụ nyọdi ị́ḍaany. 6Kụ bịdi ugbiighiom ghan ologhi mọ iini kabuphogh ni, ania nia kameel li ekperenom amugh. Bịdi ogon ebia, kụ ịyaar nyọdi ímitenaan, kụ onme ịitughian phọ ạbidi kụ ọḅem mọ ọdi ẹmugh.
7Matuman ịpa phọ, ạPublios ọdaam ẹmha phọ ạmoogh ni rere. Ọdi ụlhogh ni iyoor otu, kụ ụko iyoor igoni ịraar aḍughul-otu. 8Aloor ọde ạPublios ímoon. Osipheeny rꞌamunum-ọgua kụ ịiḅaghami. Kụ ạPol aḍigh osoph oye phọ ạaḅereghi Ẹnaan, kụ ạzu nyọdi aḍume. 9Ịphen phọ iḍighi ni dị bụnon ạbudi úmoonogh sịphe ekpu-ogbo phọ oruughi, kụ ookonoma yogh. 10Ughueni ni iyoor rꞌịminighan inmo. Kụ mem dị yoor kọḅile oḍigh oghuugh, kụ bịdi ụsaanyaan iyoor rạraar dị ikuom iyoor.
Ọḍua Mạlta rọki Rom
11Ịraar ụnwanyu reten, kụ yoor oḍighan aani oghuugh dị oghol mọ ạKastor rꞌạPoluks, dị ạḍua Ạleksandria kụ aru ạrol pạ rụnwanyu ẹephoom mọ. 12Kụ yoor rosul Sairokius kụ ọrol pạ ịraar aḍughul-otu. 13Kụ romitiom pạ kụ yoor oten osi Rigeom, kụ rẹḅaal bịn ookuugh ạḍua ọman aru ụteeny iyoor, kụ ḍịphe kemuneniom bọ ịyal aḍughul-otu phọ kụ yoor osi Putioli. 14Ịsiphe kụ ẹdi yoor ọmiin bụo ạsiosi, dị ụkpaariom iyoor ọrolan ạbidi oḍual aḍughul-otu, kụ yoor ọḍua pạ onyeene Rom. 15Mem dị ạbuo asiya phọ ayoor ọnaghan bọ mọ yoor odi eten, bịdi ụḍua ni Rom osi kꞌẹpe Ḍighi Ạpios rꞌỊraar Aruutu Abuteneneen uzuan iyoor, kụ ạPol ạmiin bọ bịdi, ịkparamiom ni ologhi ọdi kụ ạseph Ẹnaan.
Ẹpe Rom
16Yoor oru bọ osi Rom, ụngo ni Pọl eepoogh mọ ạrol li ḍịo ọdi, kụ ọlo ọnyo ẹgham akori ghan ni nyọdi.
17Ịraar aḍughul-otu reten, kụ ạPol aagbologh oomo ikpolom awe ạbuo aJu phọ, kụ ạḅeni bịdi mọ, “Bụo asiya, mị mạar úḍighi dị ẹpioman esi awe phọ ayira rꞌeḍighinom ịyaar ạburude ạburude phọ ayira, kụ ụsighe bọ ni ịmi ọnyo-ikoli kꞌẹpe Jeruselem ọḅile ụḅogh ịmi ọlogh rạghaagh ạbuo aRom. 18Bịdi ọoḅeghion bọ ọghaaph phọ ạmi ophogh, ụwa ni oseere ạmi, ịdi eḍighi bọ ẹmhu ọtuan oghiigh ạmi ị́tol. 19#Iiḍ 25.11Kụ bụo aJu phọ úmeeraam, kụ ịkpaariom ịmi ọsighe aḍighiton phọ oruomaan aSiza, ụ́ḅile ụḅem mọ mị raḅoroghom ẹmha phọ ạmi. 20Esi ịphen phọ kụ ẹdi mị ạwa bọ ọmiin anyina rꞌọghaaphan anyina. Kụ ẹmhu oye phọ aweye phọ Ịzirel oḍuom bọ ologhi phọ kụ ẹdi ọtu bọ ụkasaghiom ịmi izime phọ ịphen.”
21Kụ bịdi ọḅeni nyọdi mọ, “Ạrinya lọ ọgeom nyịna kẹ̋ḍua Judia eru ịteeny iyoor, ḅịle kẹn ọnyo asiya dị asi ẹphen kụ mạghaaph ịkaraph ạna ólho. 22Kụ yoor rọwa ni ọnaghan aani ịitughian ạna, ịdi eḍighi bọ yoor olegheri mọ tọrobo ekpisi awe rọkaaph ghan ịkaraph ịlo otul phọ ọphon nạ aḍigh aani bọ.”
23Kụ oguanaan Pọl ḍio kụ aḍita phọ ạbidi ookpomoghan sịphe ọdi arugh bọ. Kụ ọdi amiigh ḍịroor ọghaaph ooḅi ọghaaph ịlo ọmar phọ kꞌẸnaan tụtu eghuloghom, kụ esi ọkparamiom ịlo ạJizos, ọdi ạmaaghi ni ẹkpigh kịrokiro sịphe ạrinya iilogh phọ aMozis rꞌariil phọ, dị ẹghaaph ịlo aMesaya phọ. 24Ọghaaph phọ ạmoogh ni ephigh esi abuniin, kụ buniin ụ́maghami ịyaar. 25Tụtu bịdi kọgbaragbara bọ ọḍuaghu, ạPol ọ́wile ọghaaph mọ, “Uwaloor Iigbia phọ aḍighi ni dị Azaya oyil phọ Ẹnaan, ạghaaph ịpe eru bọ ịne ạḅeni bụrude ạburude phọ anyina 26#Azay 6.9, 10mọ,
“‘Kịa ạḅeni we phọ ạbuen mọ Ẹnaan ẹḅem mọ:
Ophogh nyina kepogh ni, kụ nyina kẹ́miin,
ọnaghan nyina kẹnaghan ni, kụ nyina kẹ́kpaph ẹpam,
27ịdi eḍighi bọ abula kụ maḅogh iloghi awe phọ ạbuen,
ọbo bịdi kolegheri ghan bọ ịyaar,
kụ areḅeri phọ ạbidi meḍuughian,
ọbo bịdi kọnaghan ghan bọ ịyaar,
kụ ariḍien ạbidi mokpereghian yogh,
ọbo bịdi kọmiin ghan bọ eten,
ọḅile okiton usoman ịmi, mị aakonom bịdi.’”
28Kụ ạPol akureriom mọ, “Esi ịphen phọ, Ẹnaan mẹsighe ọghaaph ọphel otene phọ ẹkiom aani ruuruen phọ. Bịdi ghụn kụ kọnaghanan.” [ 29ẠPol rọghaaph bọ ịphen phọ, kụ bụo aJu phọ oghughaan ọyugh ọḍuaghu.]
30ẠPol ạrol bọ ịyal ạsia otu dị ọdi ạlom arugh, kụ ạghereghom ghan ni oomo ạbudi ọghi ghan ophogh ọdi, 31ạghaaph ghan ọghaaph ịlo ọmar phọ kꞌẸnaan, kụ ạtughemiom ghan oḅom ẹmhu ịlo ạJizos Kraist Ọmoogh-we phọ, kụ oye nyọdi ómirighan.
Currently Selected:
Iiḍighi 28: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS