Iiḍighi 27
27
ẠPol aḍigh oghuugh rạki Rom
1Mem dị mogu bọ mọ yoor koḍigh oghuugh kụ ọki Itali, kụ ọḅogh Pọl rꞌạbunon ạbuo ikoli ọngo nyoniin ogbogh ọnyo ẹgham, dị oghol mọ ạJulios, ọlo ẹkpigh Ọgostos. 2Kụ oniin oboom oghuugh dị ạḍua Adramitiom rạki risiḍia eelhe Esia ạrol li pạ kụ yoor oḍigh aani. Kụ Ạristakos ọlo ạTesalonika eelhe aMasidonia uḍighan ni iyoor, kụ omitiom oghuugh phọ. 3Kụ yoor osi Saidon ḍio phọ ạḍiphe etum bọ pạ, kụ ạJulios ạseeghi ni Pọl ạngoom eepoogh mọ ọdi ạghi ni aaphoghogh rịghiri ọdi dị kọmaar ọpam nyọdi. 4Ọḅile omitiom oghuugh phọ bịn oghim ụda iyoor kụ yoor ọgur oghuugh phọ ọngo elhiom ekpu-ogbo phọ ạSaipros. 5Kụ mem dị yoor mọzoghi otu-ḅualhe phọ ọḅeeny risiḍia aSilisia rꞌaPamfilia, kụ yoor osi Maira eelhe ạLisia. 6Ẹpe kụ ẹdi ogbogh ọnyo ẹgham mọ ạmiin oghuugh dị ạḍua Ạleksandria rạki Itali, kụ ụsighe iyoor ạsaanyaan.
7Yoor ụkoronaan ni ịzoghi phọ rꞌịminimiin ịminighan asiḍughul-otu, kụ ọmeremi oghuugh phọ ogbo ọphiiny phọ ẹpe Knạidos. Ịdipho oghim mọ úmeera mun bọ mọ yoor ọghi ghisigh, kụ yoor ọgur oghuugh phọ ọghiom ḍịghaagh ekeeny ekpu-ogbo aKrit otenom ẹkuleeny aSalmone. 8Rꞌịminimiin kụ yoor ọḅar ọgbal ọgbal ọghi osi esi dị oghol mọ Ịma Arisiḍia, dị etuman ẹmha aLasia.
9Yoor ubia ni dị tụtu ariiḍio phọ bụo aJu phọ rọtuan ghan bọ ịiḅereghi kọrol ọkoony meru eten. Erelhe oghuugh mẹkpar kụ ạPol aroma bịdi mọ, 10“We phọ! Yira ọḅile omitiom oghuugh phọ, kẹ́nighe. Aruphua phọ rꞌoghuugh phọ bịn kụ képe, ạrumhu awe kepe aani ni.” 11Kụ ogbogh ọnyo ẹgham mọ ómeera ạnaghanan ghụn ịpe uwo ẹmhu oghuugh phọ rꞌuwo oghuugh phọ ọghaaph bọ apuemi ịpe ạPol. 12Esiḍia phọ rẹ́nighe ghan ọrol rụnwanyu ẹephoom mọ. Ịduon kụ iḍighi kụ ogbogh opol awe phọ oromoghiom mọ omitiom ni ophogh mọ kotue ni osi Finiks, eniin esiḍia aKrit dị ẹgumom ọman oghim mọ, kụ ọrol ạrunwanyu ẹephoom mọ.
Oghim akim
13Ọyoghoyogho ookuugh amiigh ni oghugh esoorom ạbidi kụ bịdi ogbiom mọ bụno kosi ni esi phọ bụno rọwa bọ, kụ ọsaany ịluma phọ, kụ ọzoghi ọḅararian ọgbal aKrit. 14Kụ íbia bịn oboom oghim dị oghol mọ Yurokilidon, ạḍua pạ ekpu-ogbo phọ aru aphum oghuugh phọ. 15Kụ oghuugh phọ órue mun ọda oghim mọ, kụ olegheri ọwile mọ ụyoom iyoor. 16Ọony ekpu-ogbo dị oghol mọ ạKoda dị yoor ọghuuraam roten, kụ ịngo iyoor oghoph, kụ rꞌọkpar aloor kụ yoor ọphamaghan ọbam oghuugh phọ. 17Kụ bịdi ọsighe ọbam oghuugh phọ ọsaany, kụ odoghoḍi iḍigh ọphamagham ogbogh oghuugh phọ. Rꞌoḅio kakaph mọ oḍighom ịyaar oghuugh phọ katirian ruḅum ịisaar phọ ịpe edi bọ ọgbal arisiḍia phọ ạLibia, kụ bịdi odughe yogh ạvala oghuugh phọ, ọbo oghim mọ bịn kụ arelhiom bịdi. 18Oghim mọ rꞌamem ódugh, kụ ḍio phọ ạḍiphe etum bọ pạ, bịdi omiigh osumughi asidool. 19Kụ rẹḅile rẹḅaal, kụ bịdi omiigh ọsighe ạraraar dị roḍighinom ghan oḍighi pạ ologhi oghuugh phọ osumughi. 20Esi ịbadi asiḍughul-otu yoor erumuḍio rꞌạraanaan ụ́miin, kụ oghim mọ rꞌamem ódugh, dị tụtu ịitughian aghuḍum iyoor ị́rolonaan mun.
21Bịdi mọrol ọkoony ebia, kụ ạPol ạmeera pạ ogbo phọ ạbidi kụ ạḅeni mọ, “We phọ! Mọ nyina ịnaghanan ọnhu ạmi ẹpe Krit, ọbo nyina mímitiom oghuugh phọ, dị muzuan ịminimiin rꞌamuphe phọ ạmuen. 22Kụ nyịidipho mị rịḅeni ghan inyina mọ ịmoogh ạkpo ologhi. Rꞌoniin ọnyo anyina kápe, oghuugh phọ bịn kụ kape, 23ịdi eḍighi bọ, ḍughul phọ ạḍien ẹḅaal bọ rodon, ọokpaany Ẹnaan phọ ẹpe ịmoogh bọ ịmi kụ mị raaseeny ghan bọ aru ni ạmeera ịigaany ạmi. 24Kụ ụḅeni ịmi mọ, ‘Pọl, kákiilaan. Nạ kạmeera ni ghisigh aSiza. Pogh aani, Ẹnaan mẹtuan ẹmhu ạna eḍighi dị rꞌeniin ẹmhu ạbuphe rꞌạna oḍigh bọ oghuugh phọ képe.’ 25Esi ịphen phọ, we phọ, ịmoogh ni ạkpo ologhi. Mị ameeraam ni mọ Ẹnaan kẹtuugh ni ịdipho mọghaaph bọ ụḅeni ịmi eḍighi. 26Kụ ọlo yira kọgbana ni eniin ekpu-ogbo.”
27Ogbo aḍughul aḍio dị emuneniom ḍioph rꞌinya aḍughul-otu, kụ oghim mọ iyoor ụ́wile ni pạ Ọphiiny Meditarenian, kụ ẹghighom esi ạbuo oghuugh phọ mụdi rọobeeph ạnyu ade. 28Kụ bịdi ọsighe oḍigh ootiom kụ ọtooghi ọmiin mọ aḍigher esi phọ ẹman inyadi akuḅu, kụ mọony amem bịn ọḅile ooti kụ ọmiin mọ ẹman ịraardi akuḅu. 29Ughiilaan ni mọ ịduon sịen oghuugh phọ ayoor kạsiiny sighiigh ạwoghoronu, kụ bịdi osumughi inya ịluma ẹpe eti phọ, kụ ogonom ạḍiroor. 30Ạbuo oghuugh phọ ụutughian ghan ịlo osumughu ọḍua, kụ okue ọghi ẹpe ẹsoph phọ oḍighi mụdi rosumughi ghan ịnon ịluma, kụ ọokpo ọbam oghuugh phọ osoore ụmuum. 31Kụ ạPol ạḅeni uwo ẹmhu ạbuo ẹgham mọ rꞌawe phọ ọdi mọ, “Awe oghuugh phọ kụ ọḍuaghu sịen oghuugh phọ, rꞌoniin ọnyo anyina kạ́tol.” 32Kụ bụo ẹgham mọ oogbo iḍigh ọbam oghuugh phọ, kụ ọwile mọ aphe.
33Rọmiina siloor, kụ ạPol aromoghiom oomo phọ ạbidi mọ olhe eḍien mọ, “Rꞌarodon ḍioph rꞌinya aḍughul-otu nyina ịyaar ílhe bọ rꞌokaphian oḅio. 34Ịduon kụ iḍighi kụ mị riroma inyina mọ ile eḍien ẹlo ọmooghom ịnyaam ọphelaam ạrumhu anyina. Rꞌạḍilaal oniin ọnyo anyina képe.” 35ẠPol rokureri ọghaaph phọ, kụ ạsighe ạbred, kụ rọngo ḍịseph Ẹnaan pạ aghisigh phọ ạbidi, kụ ạparion kụ amiigh ole. 36Kụ oomo phọ ạbidi oomanam olhe aani eḍien. 37Kụ oomo phọ ayoor ọrol bọ pạ ologhi oghuugh phọ ụman ịyal okuron oḍualdi rꞌodiiny awe. 38Kụ bịdi rolhe ẹdi mẹkasian, bịn ọsighe ịbiakpa phọ osumughi ọphiiny phọ ọbo oghuugh phọ aaphoogh.
Oghuugh phọ atirian
39Ẹḅaal bọ, bụo oghuugh phọ ụmiin ni de kụ ụ́logh elegh esi phọ, kụ ụmiin ni ọyekele oolhe, kụ oopuruan mọ ẹghigh ni, pọ ạbuno kosul oghuugh phọ pạ. 40Kụ bịdi oogbo ịluma phọ ọwile ẹpe ologhi ạmuum mọ, kụ egina phọ amem mọ bịdi ọokpo iḍigh dị ọkpooghiom ịlom mọ, kụ oneene ạvala phọ kụ ọgbagh oghuugh phọ ọbo ookuugh phọ aghughom ạgbaani ẹpe oolhe phọ. 41Kụ oghuugh phọ atirian eḅum, kụ ẹsoph phọ eḅi ogbo ịisaar phọ ẹgbana, kụ oologh phọ aaphumogh eti phọ ạwoghoronu.
42Kụ bụo ẹgham mọ oopuruan mọ ọze oomo ạbuo ikoli phọ, ọbo bịdi kọmughi ghan bọ opun osumughu. 43Kụ uwo ẹmhu ạbuo ẹgham mọ ạnya ni ọphel ạPol kụ amirighan bịdi, kụ ạto ghụn ạḅeni bịdi mọ ọlo katue ạmughi, apel asuma ạmughi aphun ạnyu, 44mọ ạbueri phọ ọokpaphagh sụpo rꞌịnon ạraraar oghuugh phọ ọmughiom ophun aani. Kụ ịduon kụ ịdi oomo phọ ayoor okpetenaan bọ kụ ophunughu ạnyu ade.
Currently Selected:
Iiḍighi 27: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS