MATIU TƐKAPƐSHƐNGA TI IYI NƐ ZWENI NU UTAKADA GA MATIU
TƐKAPƐSHƐNGA TI IYI NƐ ZWENI NU UTAKADA GA MATIU
Unabarɛ Ubiye Matiu wa duma unabarɛ maa ge Jisus ubwa shɛ Bibicinji na Agwatana shilwo la unu iwɛ ubwa nu Unu Ụngwụshɛ Tutwa, baa ụrɛcɛnganɛ kaa atwa ubwa unu ata boo shilwonuo aŋ la cala. Unabarɛ ga ubiye shɛ shɛ iwɛ Eju a na ee meci la Jisus no ofwo aba, anaa na kaa du ge Jisus waŋnɛ la no ofwo aba kiri o, ama ụ shɛ du iwɛ atwa unyizo ga kpaaŋ.
Ga Matiu imanganjɛ utakada ga tebiye. I kwuni na tumata ti Jisus, yee ti eshicigeni iwɛ ubaptizim ubwa, ti iwɛ tumanga tu bwa, nazhɛ yaa jɛmɛ iwɛ ugondu i'enenji ibwɛ, ni imbisegeni ibwɛ keeni tɛnɛnjɛ tu na baa njɛ nu Galili. Na aba inɛ ɛtɛ, nazhɛ Unabarɛ ga Ubiye wa duma iwɛ tahaŋnụ ti Jisus tu na bee beni la nu Galili bee zhe Jɛrusalɛm keeni iyi nɛ vwutengeni bu la nu ulade ubwa umɛwɛɛ, inɛɛ nɛ shɛ tutagana nrɛ nụ ụ'wụ'wụ-ubatanɛ keeni tihiɛ tu bwa.
Unabarɛ ga Ubiye wo mbisono bụtụ maa ge Jisus ubwa shɛ Bimbisegeni bụ 'wụtụ, na kaa 'yajɛ ụhwada maa lashajɛ iyi nɛ Undwa wa Agwatana jɛmɛ, maa kaa du bu no mbisogono atwa iwɛ Cɛnjɛ-ta-tugwama ta Agwatana. Ohiuhiu n-ndumwa mu na imbisegeni ibwɛ yo sotulonu pa'ụtụ namɛ a ta: (1) Imbisegeni ibwɛ Ishɛmɛ, nɛ ya duma iwɛ masha ma bụtụ, keeni iyi nɛ bụtụ ba nda, keeni uhiuhiu na bụtụ teni, keeni ukpahiŋ na ee peni bụtụ maa sha umamata na Cɛnjɛ-ta-tugwama ta azuba. Inɛ ɛtɛ hwɛɛ namɛ no (ohiuhiu 5—7); (2) ni iyi nɛ bee sekekeni la eseshi-iyi ubwa umpwa-na-ba-eyebi, iwɛ ugondu na ee utegeni aŋ tɛnda. Inɛ ɛtɛ namɛ nu (uhiuhiu 10); (3) nu n-ndumwa mu na baa manganjɛ la, iwɛ Cɛnjɛ-ta-tugwama ta azuba. Inɛ ɛtɛ namɛ nu (uhiuhiu 13); (4) ne ecilo biseshi-bi-iyi na bee mbisegeni atwa, inɛ ɛtɛ namɛ nu (uhiuhiu 18); (5) keeni imbisegeni iwɛ ukwunanga unyizo ga, keeni iwɛ tizhajɛ ta Cɛnje-ta-tugwama ta azuba, inɛ ɛtɛ namɛ no (ohiuhiu 24—25).
Tudwotwogonu to ohiuhiu Utakada ga na:
Iwɛ atwa na shɛ ushishi Jisus Krast Keeni tumata tu bwa 1:1—2:23
Ugondu Jon bɛnjɛ-bu-ubaptizim 3:1-12
Iwɛ ubaptizim Jisus keeni tumanga tu bwa 3:13—4:11
Ugondu na ge Jisus njɛ nu ukpogwu Galili kpataa 4:12—18:35
Tubana ti Jisus nu Galili maa zha Jɛrusalɛm 19:1—20:34
Ulade umɛwɛɛ na boo gwumwonu nu Jɛrusalɛm 21:1—27:66
Tihiɛ ta Agwangwama keeni tumomo mbisono tu bwa 28:1-20
Currently Selected:
MATIU TƐKAPƐSHƐNGA TI IYI NƐ ZWENI NU UTAKADA GA MATIU: RBT
Highlight
Share
Copy
Want to have your highlights saved across all your devices? Sign up or sign in
Rubassa Bible © Bible Society of Nigeria, 2008