MARCOS 1
1
Bautizaj Juan huillashcami
(Mt 3.1-12; Lc 3.1-9, 15-17; Jn 1.19-28)
1Taita Diospaj Churi Jesucristomanta alli huillai ima shina callarishcami.
2Profeta Isaías quillcashcapi nishca shinallatajmi:
“Ñuca huillajtami canta ñaupachishpa cachani.
Paimi can purina ñantaca ñaupashpa allichinga.
3Shitashca pambapi caparijca:
“Jatun Diospaj ñanta allichichij.
¡Cancunapaj ñancunatapish allichichij!” nishcami.
4Chai nishca shinallatajmi Bautizaj Juan shitashca pambapi ricurishpaca, juchacunata perdonachun mana allita ruracushcata saquishpa cutirichij nishpa bautizacurca. 5Chaipica Judeapi, Jerusalenpi tucui causajcunapish paipajman shamushpa, juchacunata huillashpa Jordán jatun yacupi Juan bautizajpimi bautizarircacuna.
6Juanca, camello millma churanata churarishca, carahuan chumbillirishcami carca. Pai micunaca langostacuna, sacha chuspipaj mishquimi carca. 7Juanca cashnami huillarca: “Ñucapaj q'uipa shamucujca, ñucata yalli imatapish rurai tucujmi. Ñucaca, paipaj pargate huatashcallatapish cumurishpa mana pascaipajmi cani. 8Ñucaca cancunataca yacupi bautizajllami cani. Ñucapaj q'uipa shamujmi jucha illaj Espirituhuan bautizanga” nircami.
Jesusta bautizashcami
(Mt 3.13-17; Lc 3.21-22)
9Chai punllacunallapitajmi Jesusca Galileapi caj Nazaretmanta Juanpajman shamujpi, Juanca Jordán yacupi Jesustaca bautizarca. 10Yacumanta Jesús llujshishpaca, jahua pacha pascarijpi, Taita Diospaj Espirituca paloma shina shamushpa paipaj jahuapi tiyarijtami ricurca. 11Jahua pachamantaca: “Canmi ñuca c'uyashca Churi cangui. Canpimi cushicuni” nishpa rimashcami uyarirca.
Jesusta diablo pandachisha nishcami
(Mt 4.1-11; Lc 4.1-13)
12Chai q'uipaca Taita Diospaj Espirituca, shitashca pambamanmi pusharca. 13Jesusca chuscu chunga punllacunatami chai shitashca pambapi carca. Jesusca Satanás pandachisha nishcami chaipica carca. Manchanana animalcunahuanpishmi chaipi carca. Angelcunami Jesustaca servircacuna.
Jesusca pai rurana cashcata callarishcami
(Mt 4.12-17; Lc 4.14-15)
14Bautizaj Juan carcelpi cai punllacunami Jesusca Taita Dios mandana alli huillaita huillaihuan huillaihuan Galileaman shamushpaca: 15“Taita Dios mandanaca ñami c'uchuyamushca. Chai punllamari chayamushca. ¡Mana alli ruracushcata saquishpa, alli huillaita crichij!” nirca.
Jesusca chalhuata japij chuscu runacunata cayashcami
(Mt 4.18-22; Lc 5.1-11)
16Jesusca Galilea cucha urita puricushpami Simonta, paipaj huauqui Andrestapish ricurca. Paicunaca chalhuata japijcuna cashcamantami, linchita cuchapi shitacurcacuna. 17Paicunataca Jesusca:
–Ñucata catichij. Cancunataca chalhuacunata japijta shinallataj, gentecunata pushamujcunatami rurasha– nirca. 18Chaimi paicunaca linchicunata saquishcahuan Jesusta catircacuna.
19Jesusca ashahuan chainijta rishpaca, Zebedeopaj churi Jacobo, paipaj huauqui Juandij barcopi linchicunata allichicujtami ricurca. 20Paicunatapish Jesús cayajpica, yaya Zebedeota, trabajajcunandij barcopi saquishpami catircacuna.
Millai espíritu japishca runata Jesús alliyachishcami
(Lc 4.31-37)
21Chaimanta rishpaca Capernaumman chayashpami samana punllapi, sinagogaman yaicushpa yachachirca. 22Paica mandashcacunata quillcajcuna shinallaca mana yachachircachu. Ashtahuanpish mandajtaj cashcata ricuchishpami yachachirca. Chaimi paipaj yachachinata yachachishcataca achcata mancharircacuna. 23Paicunapaj sinagogapica, millai espíritu japishca shuj runami tiyarca. Paimi caparishpa:
24–Nazaretmanta Jesús, ¿imatataj ñucanchijtaca nij shamungui? ¿Chingachingapajchu shamungui? Cantaca pi cashcata yachanimi. Jucha Illaj Taita Diospajmanta shamushcami cangui– nirca.
25Jesusca:
–¡Upalla cai, cai runamanta llujshi!– nishpa sinchita rimajpimi,
26millai espirituca, maipish cachun chujchuchishpa, sinchita caparirishpa chai runamantaca llujshirca. 27Chaitaca tucuicuna mancharinacushpami:
–¿Caica imatajchu imamí? ¿Ima mushuj yachanatajchu imamí? Mandajtaj shina pai rimajpica, mapa espiritucunapish cazunllamari– nishpami caishuj chaishuj rimanacurcacuna. 28Jesús chashna rurashcaca tucui Galilea llajtatami utca yacharirca.
Pedropaj suedrata Jesús alliyachishcami
(Mt 8.14-15; Lc 4.38-39)
29Sinagogamanta llujshishpaca, Jesusca Jacobondij, Juandijmi, Simonpaj, Andrespaj huasiman rircacuna. 30Chaipica Simonpaj suedra fiebrehuan ungushca siricujpi, Jesús chayanca paiman huillajpimi, 31ungushcapajman c'uchuyashpa, maquimanta japishpa jatarichinca, chai fiebreca anchurca. Ña alliyashpaca paicunaman cararcallami.
Achca ungushcacunata Jesús alliyachishcami
(Mt 8.16-17; Lc 4.40-41)
32Inti huashicushpa tutayacujpica, tucui ungushcacunata, supai japishcacunatapishmi Jesuspajman pushamurcacuna. 33Chai huasi punguman, pueblopi tucui causajcuna tandanacumujpimi, 34Jesusca ima ungüihuan cajcunatapish achcacunata alliyachirca. Supai japishcacunatapish supaicunata llujshichircami. Jesusca, pai pi cashcata yachajpimi, supaicunataca mana rimajta saquirca.
Galileapi Jesús huillashcami
(Lc 4.42-44)
35Jesusca amsaraj cajpi utca jatarishpa chaimanta llujshishpaca, pi mana causan chulunllaman rishpami, Taita Diosta mañarca. 36Simonpish, paihuan cajcunapish Jesusta mashcanamanmi rircacuna. 37Jesús maipi cashcaman chayashpaca:
–Tucuicunamari quiquintaca mashcacun– nircacunami.
38Chaimi Jesusca:
–C'uchulla llajtacunaman jacuchij. Paicunamanpish huillangapaj, chaipajmi ñucaca shamurcani– nirca.
39Tucui Galileata purishpami, paicunapaj sinagogacunapi huillashpa, supai japishcacunamantapish supaicunata llujshichirca.
Leprahuan caj runata Jesús alliyachishcami
(Mt 8.1-4; Lc 5.12-16)
40Jesús chaipi cajpimi leprahuan ungushca shuj runa shamushpa Jesuspaj ñaupajpi cungurishpaca:
–Ñucata alliyachisha ninguipishchari– nijpi,
41Jesusca paita llaquishpa, maquita chutashpa tuparishpaca:
–Ari, alliyachisha ninimi, nishpaca alliyashcami cangui– nijpica,
42chai runamanta lepra anchujpica alliyarcallami. 43Chai runata Jesús minchacama nishpa cachacushpaca ñataj piman huillanguiman nishpami:
44–Riqui, canta pi alliyachishcata pajta piman huillanguiman. Curaman ricuchigri. Can alliyashcamantaca, Moisés mandashca shina ofrendata cugri. Chashna rurajpimi curacunaca can alliyashca cashcata yachangacuna– nircami.
45Ashtahuanpish chaimanta rishpaca, pai ima shina alliyashcataca tucuicunaman huillajpimi, Jesusca mai pueblomanpish tucuicuna ricucujpica, mana yaicui tucushpa, shitashca pambacunallapi saquirirca. Chaipi cajpipish paipajmanca, tucui llajtacunamantami shamurcallacuna.
Currently Selected:
MARCOS 1: QCHI04
Highlight
Share
Copy
Want to have your highlights saved across all your devices? Sign up or sign in
Quichua Chimborazo Bible Revision 2010 © United Bible Societies, 2010.