MARCOS 2
2
Mana cuyurij runata Jesús alliyachishcami
(Mt 9.1-8; Lc 5.17-26)
1Tauca punllacuna q'uipami Jesusca cutinllataj Capernaunman tigrarca. Huasiman Jesús chayancami tucuicuna yachaj chayashpa, 2ñapish achcacuna jundarishpa, huasi pungucama maipi mana shayaripajta tandanacurcacuna. Chaipi Jesusca Taita Diospaj Shimita huillacujpica, 3mana cuyurij shuj runatami chuscu runacuna huandushpa apamurcacuna. 4Chai tucuicuna huasi ucupi junda cajpimi, Jesuspajman mana yaicui tucushpa pai yachachicun huasi jahua c'atata anchuchishpa, huandumushcallapitaj ungushcataca uriyachircacuna. 5Jesusca paicuna crishcata ricushpami, mana cuyurij runataca:
–Huahua, cambaj juchacunaca perdonashcami– nirca.
6Chaipica mandashcacunata quillcaj maijancunami tiyacurcacuna. Paicunapaj shungullapimi: 7“¿Ima nishpataj caica chashna ninchu imamí? Caica Taita Diosta p'iñashpamari c'amicun. Pipish juchacunataca mana perdonai tucunchu, Taita Diosllami perdonai tucun” nishpami yuyacurcacuna.
8Jesusca paicunapaj shungullapi chashna yuyacujta yachashpami:
–¿Ima nishpataj cancunapaj shungupica millaita yuyacunguichij? 9¿Mana cuyurij runataca: “Cambaj juchacunataca perdonashcami” ninachu, mana cashpaca: “Jatari, canta huandumushcata aparishpa rilla” ninachu, imata ninataj ashtahuan jahualla canga? 10Runa Aichayujca cai pachapi causajcunapaj juchacunata perdonangapaj cashcataca cunanmi ricuchisha– nishpaca, mana cuyurij runataca: 11–Cantaca cashnami nini: Jatari, canta huandumushcata apashpa, cambaj huasiman ri– nircami.
12Chaimi paica, jatarishcahuan huandumushcata apashpa, tucuicunapaj ñaupajmanta llujshishpa rijpi, tucuicuna mancharinacushpaca:
–Chashna alliyachijtaca manataj ricushcanchijchu– nishpami, Taita Diosta jatunyachircacuna.
Leví runata Jesús cayashcami
(Mt 9.9-13; Lc 5.27-32)
13Chai q'uipa Jesusca, cutinllataj Galilea cucha uriman tigrashpaca, tucui paipajman shamujcunatami yachachirca. 14Jesús chaimanta rishpaca, tributocunata japinapi, Alfeopaj churi Leví tiyacujta ricushpami:
–Ñucata cati– nijpi, Mateoca jatarishcahuan Jesusta catircalla.
15Achcacuna Jesusta catishcamantami cashna tucurca. Jesusca Levipaj huasipi mezapi micushpa tiyacujpica, impuestota japijcunapish, juchayujcunapish achcacuna chayashpami, Jesusndij paipaj yachacujcunandij mezapi tandalla tiyarircacuna. 16Mandashcacunata quillcajcunapish fariseocunapish Jesustaca impuestota japijcunahuan, juchayujcunahuan micucujta ricushpami yachacujcunataca:
–¿Ima nishpataj caica, impuestota japijcunahuanpish, juchayujcunahuanpish micucunchu, ubyacunchu imamí?– nircacuna.
17Chaimi Jesusca:
–Mana ungushcacunaca jambijtaca mana mashcanchu, ungushcacunallami mashcancuna. Ñucaca cashcata rurajcunataca mana cayaj shamurcanichu. Ashtahuanpish juchayujcunatami cayaj shamurcani– nirca.
Ayunanamanta tapushcami
(Mt 9.14-17; Lc 5.33-39)
18Bautizaj Juanpaj yachacujcunapish, fariseocunapaj yachacujcunapish ayunacujta ricujcuna Jesuspajman rishpaca:
–Juanpaj yachacujcuna, fariseocunapaj yachacujcunapish ayunancunami. ¿Ima nishpataj cambaj yachacujcunaca mana ayunancuna?– nishpa tapurcacuna.
19Chaimi Jesusca:
–Bodaman cayashcacunaca noviohuan cashpaca ¿ayunangachari? Novio paicunahuan cajpica ¡maitataj ayunangacunari! 20Ashtahuanpish noviota paicunapajmanta quichuna punlla chayamungami. Chaipimi ayunangacuna.
21Pipish mauca churanataca, mushuj linsohuanca mana llachapanchu. Mushujhuan llachapajpica, uchillayashpa mauca churanataca ashtahuanmi lliquin. 22Mushuj vinotapish mauca capachucunapica pi mana churanchu. Chashna rurajpica, chai mauca capachu tugyajpi, vinopish capachupish chingarinmanmi. Ashtahuanpish mushuj vinotaca, mushuj capachucunapimi churana– nircami.
Yachacujcunaca samana punllapimi trigo caspata c'utsashca
(Mt 12.1-8; Lc 6.1-5)
23Samana punllapi chagra chaupita Jesús ricujpimi, paipaj yachacujcuna caticushpaca, trigo caspata c'utsanata callarircacuna. 24Chaimi fariseocunaca:
–Riqui, ¿ima nishpataj samana punllapi ama rurangui nishcata ruracuncuna?– nijpi,
25Jesusca:
–Davidpish paihuan cajcunapish yaricaihuan cashpa, imata rurashcataca ¿manachu rezashcanguichijllapish? 26Abiatar cura, curacunata mandaj cai punllacunami, Davidca Taita Diospaj huasiman yaicushpa, Taita Diosman cushca tandata micurca. Paihuan cajcunamanpish cararcami. Chai tandataca mana pipish micunallachu carca, curacunallami micuna carca– nircami.
27Jesusca cashnapishmi nirca:
–Samana punllataca runapaj allipajmi rurarca, runataca mana samana punllapaj allipajchu rurarca. 28Chaimantami Runa Aichayujca, samana punllatapish Mandaj– nircami.
Currently Selected:
MARCOS 2: QCHI04
Highlight
Share
Copy
Want to have your highlights saved across all your devices? Sign up or sign in
Quichua Chimborazo Bible Revision 2010 © United Bible Societies, 2010.