JOEL 1
1
Langosta c'urucuna granocunata micushpa chingachishcamanta
1Mandaj Diosca Petuelpaj churi Joeltaca cashnami nirca:
2“Cunaj yuyajcunapish, cai llajtapi tucui causajcunapish caita alli uyaichij: ¿Cancunaca cai shina llaquicunataca ricushcanguichijchu imatagari? ¿Cancunapaj ñaupa yayacunapish cai shina llaquicunataca ricushcachu canga imatagari? 3Cai llaquicunataca, cancunapaj huahuacunaman huillanguichij. Paicunaca paicunapaj huahuacunaman huillachuncuna. Chai huahuacunapish, paicunapaj huahua huahuacunamanmi huillangacuna. 4Cancuna tarpushca granocunamanta oruga c'urucuna mana tucui micushcataca, p'ichachaucunami micurca. P'ichachaucuna mana tucui micushcataca, revoltón c'urucunami micurca. Revoltón c'urucuna mana tucui micushcataca, langostacunami micushpa chingachirca. 5Machajcunalla, rijcharishpa huacaichigari. Llullu vinota rurashpa ubyajcunalla, tucuicuna caparirishpa huacaichigari. Cancuna ubyana vinotaca quichugrinmari. 6Ñuca llajtamanca, mana yupaipaj c'ari c'ari achca runacunamari yaicumurca. Paicunapaj ñaupaj quirucunapish, jashlin quirucunapish leonpaj quirucuna shinamari.
7Ñuca uva chagracunatapish chingachircami. Ñuca higo yuracunatapish ramacunacama tucui jahua caratami lluchushpa micurcacuna, yuraj caspicunallatami urmachishpa saquircacuna. 8Cazarana tucushca huarmi paipaj cusa cana huañujpi, cañamazuta churarishpa huacaj shina huacayari. 9Mandaj Diospaj huasimanca Diosman imalla cuna cashcatapish, tallina vinotapish ña mana apamuncunachu. Chaimantami Mandaj Diospajta ruraj curacunaca, llaquirishpa huacacuncuna. 10Chagracunaca llaquinayajmari. Tarpuna allpaca, chushaj yana allpallamari. Trigopish tucurishcamari, llullu vinopish chaquirishcamari, aceitepish chingarishcamari. 11Allpapi tarpushpa causajcunapish, uvata tarpushpa causajcunapish caparirishpa huacaichigari. Allpapi tarpushca trigo muyupish, cebada muyupish tucuimari chingarishca. 12Uva chagracunapish chaquirishcamari, higo yuracunapish chingarishcamari. Granada yuracunapish, palmera yuracunapish, manzana yuracunapish, tucui shujtaj yuracunapish chaquirishcamari. Chashnami huañujlla aichayuj runacuna cushicunaca chingarishca. 13Curacuna, chumbillirishpa caparishpa huacaichigari. Mandaj Diosman altarpi cushpa rupachijcuna, huacaichigari. Ñuca Diospajta rurajcuna, cañamazuta churarishpa dormichigari. Cancunapaj Diospaj huasimantaca imalla cuna cashcatapish, tallina vinotapishmi anchuchishca.
14Ayunangapaj tandanacuchun tucuicunaman huillaichigari. Cancunata Mandaj Diospaj huasimanca cunaj yuyajcunatapish, cai llajtapi causajcunatapish tucuicunata tandachishpa, Mandaj Diosta caparishpa mañaichigari. 15¡Aij, Mandaj Dios shamuna punllaca ñamari pajtamucun! Tucuita Rurai Tucuj Mandaj Dios jatunta llaquichina punllaca ñamari chayamucun. 16Ñucanchijtaca ñahui ricucuitamari micunacunatapish quichurca. Taita Diospaj huasipi cushicushpa micunatapishmari quichurca. 17Tarpushca granocunapish, allpa ucullapitajmi ismushpa chingarirca. Trigo muyu chingarishcamantaca, huaquichina huasicunaca chushajllamari. Chai granocunata huaquichina huasicunaca urmashcamari. 18¡Animalcunaca llaquinayajtamari huacarcacuna! ¡Vacacunaca yangallamari q'uihuata mashcashpa purircacuna! Shinallataj oveja canllapish yaricaihuanmi huañurcacuna” nircami.
19Mandaj Dioslla, cantami caparisha. Shitashca pambapi huiñacuj q'uihuacunatapish, urcucunapi tiyaj yuracunatapish nina lunyashpamari, tucuita rupachishpa chingachirca. 20Larca yacucunapish chaquirinca. Shitashca pambacunapi tiyaj q'uihuacunatapish nina tucui rupachinca. Sacha animalcunapish, can Mandaj Diosmanca huacashpami huillangacuna.
Currently Selected:
JOEL 1: QCHI04
Highlight
Share
Copy
Want to have your highlights saved across all your devices? Sign up or sign in
Quichua Chimborazo Bible Revision 2010 © United Bible Societies, 2010.