JOEL 2
2
Mandaj Dios llaquichina punllaca chayamunamanta
1Sión urcupica, trompetapi tocaichigari. Ñucapajlla urcupica, caparichigari. Cai llajtapi causajcuna, tucuicuna chujchuichigari. Mandaj Dios shamuna punllaca ñamari pajtamucun, ñamari quichquiyamucun. 2Chai punllaca, manchanana amsa tutami tucunga. Chai punllaca, p'uyu llandu punllami tucunga. Tutamanta utcata urcu jahuacunapi inti shitashpa achijyachicuj shinami, c'ari c'ari achca runacuna shamunga. Paicuna shinaca pi mana tiyarcachu. Paicuna shamushca q'uipapish, q'uipa huahua huahuacuna causai huatacunapica pi mana paicuna shina tiyangachu. 3Paicuna manaraj chayamujpimi, ninaca tucuita rupachishpa tucuchinga. Paicuna rishca q'uipapish, ninallatajmi tucui ima tiyajta rupachinga. Paicuna chayamunapajca, cai llajtaca, Edén huerta shinami canga. Paicuna rishca q'uipaca, shitashca pamba shinami llaquinayaj saquiringa. Paicunapaj maquimantaca, pipish mana quishpiri tucungachu. 4Paicunaca caballocuna shinami canga. Caballopi tiyarishpa callpacuj shinapishmi callpanga. 5Paicunaca macanacuna carretacuna c'ulun nishpa puricuj shinami, urcu jahuacunapica saltangacuna. Chaquishca p'angacuna ninapi rupacuj shinami uyaringa. Paica, jatun macanacuiman rinalla, c'ari c'ari soldadocuna shinami canga. 6Paipaj ñaupajpica, tucuicunami manchangacuna. Ñahuicunapish, quillu quillumi tucungacuna. 7C'ari c'ari soldadocuna shinami callpangacuna. Alli macanacuj soldadocuna shinami, pirca jahuaman huichiyangacuna. Tucuicunami shuj ñanllata ringacuna, mana caita chaita puringacunachu. 8Mai ladomanpish caishuj chaishuj mana quichquirinacushpami, tucuicuna quiquin ñanllata ringallacuna. Espadapi urmashpapish, manataj chugriringacunachu. 9Puebloman chayashpaca, pata jahuatami callpangacuna. Huasicunaman huichiyashpaca, shuhua shinami ventanacunata yaicungacuna.
10Paicunata ricushpaca cai pachapish, jahua pachapish chujchungami, intipish, lunapish amsayangami, luzerocunapish ña mana achijyachingachu. 11Mandaj Diosca paipaj soldadocunatami mandanga. Paipaj soldadocunaca yallitaj achcacunami. Pai mandashcata rurajcunaca, yallitaj c'ari c'aricunami. Mandaj Dios shamuna punllaca, jatun mancharina punllamari. Chai jatun llaquicunataca ¿pitaj apai tucungari?
Mandaj Dios llaquishcamanta
12Mandaj Diosca cashnami nin: “Chaimanta cunanca ayunashpa huacashpa, llaquirishpa tucui shunguhuan ñucapajman cutirichij. 13Ama churanataraj lliquirichijchu, ashtahuanpish cancunapaj shungupi llaquirichigari. Cancunata Mandaj Diospajman cutirichigari. Paica llaquishpa cashcata rurajmari, mana utca p'iñarij, jatunta llaquijmari, llaquichisha nishpapish, llaquishpa jarcarijmi. 14Cancunata llaquishcamanta mana llaquichishpa, ashtahuanpish achca allicunata cuna cashcatapish ¿pitaj yachanguichigari? Taita Dios allicunata cushcamanta, paillamantaj imalla cuna cashcatapish, tallina vinotapish cunami canguichij.
15Sión urcupica, trompetapi tocaichigari. Ayunangapaj tandanacuchun, tucuicunaman huillaichigari. 16Cunaj yuyajcunatapish, huambracunatapish, chuchucuj huahuacunatapish, cunanlla casarashcacunatapish paicunapaj causana huasimanta llujshichishpa tucuicunata tandachishpa, Diospajlla tandanacuita ruraichij. 17Mandaj Diospajta ruraj curacunalla, cancunaca pungu ucuman yaicushpa, altarhuan chaupipi shayarishpa huacashpa: Mandaj Dioslla, cambajlla agllashcacunataca perdonahuayari. Cambajlla cachun can japishcacunataca, p'iñajcunaman ama cuhuangui. Paicunataca shujtaj llajtapi causajcuna mandachunpish ama saquihuangui ninguichij. Shujtajcunaca: ¿Maipitaj paicunapaj Diosca? ningacunami” ninmi.
18Shina nijpimi Mandaj Diosca, paipaj llajtamanca achca c'uyaita ricuchishpa, pai agllashcacunataca perdonanga.
19Mandaj Diosca pai agllashcacunamanca cashnami cutichinga: “Riquichij, ñucaca cancunamanca micunatapish, llullu vinotapish, aceitetapish pajtatami caragrini. Cancunata p'iñaj llajtacuna llaquichichunpish manataj saquishachu. 20Cancunata llaquichijcuna janaj ladomanta shamucujpica, carcushpami cachasha. Paicunataca chaquishca, shitashca pambapimi churasha. Ñaupashpa rijcunataca inti llujshin lado mama cuchapimi shitasha. Huashata catishpa rijcunataca inti huashicun lado mama cuchapimi shitasha. Chai huañushcacunapaj aicha ismushpaca, achcatami ashnanga. Jatun llaquicunata rurashcamantami, chashna rurasha” ninmi.
21Chaimanta cai llajtapi causajcunalla, ama imata manchaichijchu, achcata cushicuichigari. Mandaj Diosca jatun mancharinacunatamari ruranga. 22Sachapi causaj animalcunapish, ama manchaichijchu. Cancuna micuchunca, shitashca pambacunapi q'uihuacunaca cutinmi huiñanga. Yuracunapipish cutinllatajmi p'ucunga. Higocunapish, uvacunapish achcatami p'ucunga. 23Siónpi causajcunalla, cancunata Mandaj Taita Dioshuan cushicuichigari. Cancunamanca punta tamyataca tamyana punllallatajmi curca. Paimari punta tamyatapish, q'uipa tamyatapish ñaupaman cachashca shinallataj cancunamanca cachanga. 24Chaimantami trigotaca, erapi yallitaj parvanguichij. Vinotapish, aceitetapish yallitajmi charinguichij.
25Oruga c'urucunapish, p'ichachaucunapish, revoltón c'urucunapish, langosta c'urucunapish ñuca soldadocuna cajpimi, cancunata llaquichichun cacharcani. Paicunami tucui granocunata micushpa tucuchirca. Paicuna micushcamantaca, cancunamanca yallitami cutichisha. 26Cancunaca chai granocunataca mana nijtami micunguichij. Cancunaman achca allicunata cuj, Mandaj Taita Dios ñucatami: Sumajmari cangui ninguichij. Cunanmantapacha ñuca agllashcacunaca, ña mana cutin pingachishca canguichijchu. 27Chaipimi can israelcunaca cancunahuan ñuca cashcata yachanguichij. Ñucaca cancunata Mandaj Taita Diosmi cani, pi shujtajca mana tiyanchu. Ñuca agllashcacunaca cunanmantapacha ña mana cutin pingachishca cangacunachu.
Diospaj Espíritu shamunamanta
28Cai tucuita rurashca q'uipaca, ñuca Espiritutaca tucuicunapimi churasha. Chashna churajpimi cancunapaj churicunapish, ushushicunapish ñucamanta huillangacuna. Cancunata cunaj yuyajcunapish muscungacunami. Q'uipa huiñaicunapish ñuca ricuchishcatami, muscuipi shina ricungacuna. 29Shinallataj chai punllacunapica servij c'aricunamanpish, huarmicunamanpish ñuca Espiritutami churasha. 30Jahua pachapipish, cai pachapipish jatun mancharinacunatami ricuchisha. Yahuarta, ninata, achca cushnitapishmi ricuchisha. 31Mandaj Dios agllashca jatun mancharina punlla manaraj chayamujpica, intica amsayanga, lunapish yahuarmi tucunga. 32Mandaj Diosta mañajcunallami quishpiringacuna. Mandaj Dios nishca shinallatajmi Sión urcupi, Jerusalenpica quishpirina tiyanga. Chaipica israelcunapuramantaca, Mandaj Dios cayashcacunallami saquiringacuna.
Currently Selected:
JOEL 2: QCHI04
Highlight
Share
Copy
Want to have your highlights saved across all your devices? Sign up or sign in
Quichua Chimborazo Bible Revision 2010 © United Bible Societies, 2010.